សព្វថ្ងៃមាននិន្នាការមួយគួរឱ្យចាប់អារម្មណ៍នៅប្រទេសអេហ្ស៊ីប គឺ ស្រីៗអេហ្ស៊ីបកាន់តែច្រើនឡើងបបួលគ្នាហាត់ក្បាច់គុនការ៉ាតេ ដែលពីមុនសភាពបែបនេះកម្រឃើញមានណាស់ ។ តាមតួលេខបូកសរុបឃើញថា
សព្វថ្ងៃមាននិន្នាការមួយគួរឱ្យចាប់អារម្មណ៍នៅប្រទេសអេហ្ស៊ីប គឺ ស្រីៗអេហ្ស៊ីបកាន់តែច្រើនឡើងបបួលគ្នាហាត់ក្បាច់គុនការ៉ាតេ ដែលពីមុនសភាពបែបនេះកម្រឃើញមានណាស់ ។ តាមតួលេខបូកសរុបឃើញថា ក្លឹបការ៉ាតេដូដុះព្រោងព្រាតចំនួន១.២៥០ក្លឹប នៅទូទាំង២៧ខេត្ត-ក្រុងរបស់អេហ្ស៊ីប និងមានសិស្សចូលហាត់ចំនួន៣៥០.០០០នាក់ភាគច្រើនជានារី ។
ហាត់គុនដើម្បីការពារខ្លួន
អ្នកស្រាវជ្រាវពីសង្គមអេហ្ស៊ីបសម្គាល់ឃើញថា ស្រីៗអេហ្ស៊ីបបបួលគ្នាហាត់ក្បាច់គុនការ៉ាតេគគ្រឹកគគ្រេងខុសពីមុនមកពីអំពើហិង្សាផ្លូវភេទផ្ទុះខ្លាំងនៅប្រទេសនេះ ។ ក្នុងរយៈពេល៤ឆ្នាំកន្លងមក ស្រីៗអេហ្ស៊ីបរងគ្រោះដោយអំពើហិង្សាផ្លូវភេទ ច្រើនឡើងៗ អត់មាននិន្នាការស្រកស្រុតស្រាកស្រាន្តសោះ ។ ករណីកម្លាំងសមត្ថកិច្ចចាប់បង្ខំពិនិត្យព្រហ្មចារីស្រីក្រមុំ ករណី ស្រីៗចាប់ពីអាយុ១៥ឆ្នាំដល់៤៩ឆ្នាំ ត្រូវបៀតបៀនផ្លូវភេតតាមទីសាធារណៈ បង្កឱ្យមានការក្តៅក្រហាយខ្លាំងក្នុងមជ្ឈដ្ឋាននារីភេទ ។ កីឡាការិនីការ៉ាតេឈ្មោះ Yilmaz និយាយដោយក្តៅក្រហាយ «បើកុំតែវាជ្រុលពេក ខ្ញុំក៏ខ្ជិលហាត់ការ៉ាតេនាំឱ្យឈឺខ្លួនដែរ ។ ស្រីៗទាំងអស់ វៀរលែងតែយាយចាស់អាយុ៧០ ឬ៨០ឆ្នាំ ពេលត្រូវទៅណា ម្តងៗ ភ្នែកនៅកញ្ចឹងក មើលជុំវិញខ្លួនទាំងទ្រូងលោត ឌឹបៗ ឌាក់ៗ ។ កាលណោះខ្ញុំក៏ដូច ស្រីៗឯទៀតដែរ ។ ប៉ុន្តែឥឡូវខ្ញុំលែងខ្លាចទៀតហើយ ។ វាហ៊ានចូលមកម្នាក់ ខ្ញុំវាយម្នាក់ ចូលមកពីរនាក់ ខ្ញុំវាយទាំងពីរនាក់ ។ ខ្ញុំគិតថា ស្រីៗទាំងអស់គួរហាត់ក្បាច់គុនការ៉ាតេ ឬក្បាច់គុនការពារខ្លួនណាមួយ ដើម្បីឱ្យមានសមត្ថភាពការពារខ្លួនឯង ។ បើយើងមិនខិតខំពង្រឹងសមត្ថភាពការពារខ្លួនឯងទេ តើអ្នកណាការពារឱ្យយើង» ។
លោកបណ្ឌិត Aldel Hameed ប្រធានសហព័ន្ធការ៉ាតេអេហ្ស៊ីប សម្តែងការយល់ស្របថា ក្បាច់គុនការ៉ាតេពិតជាជួយឱ្យ ស្រីៗដោះស្រាយបញ្ហាដ៏ពិបាកនេះបានមែន ។ មិនត្រឹមតែសម្រាប់ការពារខ្លួនទេ ការ៉ាតេនៅបង្រៀនឱ្យចេះគោរពអ្នកដទៃ ដំបូងបំផុតគឺបង្រៀនក្មេងពីរបៀបងក់ក្បាលគោរពគ្នា របៀបគោរពគ្រូបង្វឹក មិត្តភក្តិ និងអ្នកហាត់រៀនជាមួយគ្នា ។ ការ៉ាតេនាំមកនូវការជឿជាក់លើខ្លួនឯង ពិសេសនារីភេទសមហាត់ការ៉ាតេក្នុងសម័យអេហ្ស៊ីបសព្វថ្ងៃណាស់ ។ សហព័ន្ធការ៉ាតេអេហ្ស៊ីបចាប់កំណើតនៅឆ្នាំ១៩៧២ ។ កាលណោះមានតែ ប្រុសៗទេហាត់ការ៉ាតេ តែឥឡូវប្រុស-ស្រីស្មើគ្នា ហើយខ្ញុំត្រេកអរណាស់ ត្រេកអរមែនទែន ។
ហ៊ានផ្លោះរបងអគតិទើបមានថ្ងៃនេះ
នាង Shymaa Abou el-Yazed អាយុ២៨ឆ្នាំ ប្រធានក្រុមការ៉ាតេនារីដែលចេញទៅប្រកួតជាលក្ខណៈអន្តរជាតិនៅបរទេស ។ នាងបញ្ចេញទស្សនៈផ្ទាល់ខ្លួន «បើ ស្រីៗយើងមិនហ៊ានផ្លោះរបងអគតិទេ មកដល់ពេលនេះយើងនៅតែមុខសញ្ញាត្រូវគេធ្វើបាបដដែល ។ គេជាអ្នកធ្វើបាបយើង តែគេមិនចង់ឱ្យយើងមានសមត្ថភាពការពារខ្លួនឯង ។ យើងហាត់ក្បាច់ប្រយុទ្ធដើម្បីការពារខ្លួនយើង គេរិះគន់ គេថា ស្រីៗគិតតែធ្វើការងារផ្ទះបម្រើប្តីទៅបានហើយ ហាត់វាយតប់មិនសមជាស្រីសោះ ។ ឥឡូវ ស្រីៗយើងមានសមត្ថភាពចេញទៅប្រកួតជាលក្ខណៈអន្តរជាតិនៅបរទេសបានមេដាយមាសជាក្រុមក៏មាន មេដាយមាសផ្ទាល់ខ្លួន ម្នាក់ៗក៏មាន ។ ដល់អីុចឹងទៅ ពួកអ្នករិះគន់យើងពីដំបូងបាត់មាត់ដូចគេចុក លែងមានអ្នកណាចេញមុខមករិះគន់ទៀត»។
នាង Shymaa Abou el-Yazed ត្រូវបានចាត់ទុកជានារីទី១ ដែលហ៊ានផ្លោះរបងអគតិដើម្បីបានក្លាយជាអ្នកមានកេរ្តិ៍ឈ្មោះល្បីល្បាញ ហើយក៏ជានារីទី១ក្នុងប្រវត្តិសាស្ត្រអេហ្ស៊ីប ដែលមានគ្រួសារហើយនៅតែវិលត្រឡប់មកភ្ជាប់ខ្លួនជាមួយការ៉ាតេដដែល ។ សព្វថ្ងៃនាងមានបរិញ្ញាបត្រជាន់ខ្ពស់ខាងកីឡាផង ។ នាងសង្ឃឹមថា នឹងបានទទួលការងារអ្វីមួយនៅក្រសួងយុវជន និងកីឡាក្នុងពេល ឆាប់ៗខាងមុខនេះ ។
ថ្វីបើសព្វថ្ងៃនារីកាន់តែច្រើននិយមហាត់ក្បាច់គុនការពារខ្លួន តែតាមការវាយតម្លៃរបស់អ្នកស្រាវជ្រាវជាច្រើនឃើញថា ផ្លូវតស៊ូដើម្បីសមភាពនារីនៅអេហ្ស៊ីបនៅវែងឆ្ងាយនៅឡើយ។ ប្រទេសនេះរត់របត់ឱ្យតម្លៃតែលើ ប្រុសៗតាំងពីយូរលង់ណាស់មកហើយ មិនងាយកែវិញបានភ្លាមៗទេ ដូច្នេះស្ត្រីត្រូវតែរឹងមាំដោយខ្លួនឯង ៕
ចែករំលែកព័តមាននេះ