រាជធានីភ្នំពេញ ៖ មានរឿងគួរឲ្យហួសចិត្តដែលស្ត្រីស្អាតម្នាក់បានមកដាក់ពាក្យបណ្តឹងដើម្បីឱ្យសមត្ថកិច្ចប៉ុស្តិ៍នគរបាលរដ្ឋបាលទឹកថ្លាជួយអន្តរាគមន៍រឿងម្ចាស់ផ្ទះជួលបានខ្ចីម៉ូតូស៊េរីទំនើបជិះ
រាជធានីភ្នំពេញ ៖ មានរឿងគួរឲ្យហួសចិត្តដែលស្ត្រីស្អាតម្នាក់បានមកដាក់ពាក្យបណ្តឹងដើម្បីឱ្យសមត្ថកិច្ចប៉ុស្តិ៍នគរបាលរដ្ឋបាលទឹកថ្លាជួយអន្តរាគមន៍រឿងម្ចាស់ផ្ទះជួលបានខ្ចីម៉ូតូស៊េរីទំនើបជិះ តែបែរជាយកទៅបញ្ចាំបាត់ ពេលជនរងគ្រោះទារយកម៉ូតូញឹកញាប់ពេកម្ចាស់ផ្ទះជួលម្នាក់នេះបានបណ្តេញឲ្យជនរហងគ្រោះទៅប្តឹងថែមទៀត។ ជាមួយគ្នានោះកាលពីវេលាម៉ោង១ និង២០នាទីរសៀល ថ្ងៃទី០៩ ឧសភា ២០១៥ ស្ត្រីរងគ្រោះបានមកដាក់ពាក្យប្តឹងនៅប៉ុស្តិ៍រដ្ធបាលទឹកថ្លាឲ្យប៉ូលិសចាត់ការទៅតាមផ្លូវច្បាប់តែម្តង។
នារីរងគ្រោះខាងលើមានឈ្មោះនេង ឡៃហ៊ួយ អាយុ២៤ឆ្នាំ ជានិស្សិតឆ្នាំទី៤ សាកលវិទ្យាល័យភូមិន្ទភ្នំពេញ ស្នាក់នៅបន្ទប់ជួលក្រុម១៤ ភូមិត្រពាំងឈូក សង្កាត់ទឹកថ្លា ខណ្ឌសែនសុខ និងមានស្រុកកំណើតភូមិត្រពាំងក្រឡៃ ឃុំសំរោងលើ ស្រុកអង្គស្នួល ខេត្តកណ្តាល។
ចំណែកស្ត្រីជាម្ចាស់ផ្ទះជួល និងបានខ្ចីម៉ូតូគេយកទៅបញ្ចាំខាងលើឈ្មោះអ៊ុំ បូរ៉ា អាយុជាង៣០ឆ្នាំ ស្នាក់នៅក្រុម១៤ ភូមិត្រពាំងឈូក សង្កាត់ទឹកថ្លា ខណ្ឌសែនសុខ។ ជនរងគ្រោះបានឲ្យដឹងថា នៅវេលាម៉ោង៦ព្រឹកថ្ងៃទី០៤ ឧសភា ២០១៥ ស្ត្រីជាម្ចាស់ផ្ទះជួលបានខ្ចីម៉ូតូរបស់ខ្លួនធុនសេ១២៥ពណ៌ខ្មៅ ស៊េរី២០០៨ ពាក់ស្លាកលេខភ្នំពេញ1T5190 ដោយប្រាប់ថា យកទៅផ្ទះម្តាយគាត់មួយភ្លែត។
ប៉ុន្តែរហូតដល់ម៉ោង៤ និង៣០នាទីថ្ងៃដដែល ស្ត្រីជាម្ចាស់ផ្ទះបានទូរស័ព្ទមកនាង ដោយប្រាប់ថា ម៉ូតូនាងថ្លៃប៉ុន្មានពេលនេះគាត់ធ្វើបាត់ហើយចាំគាត់ចេញសង។ ជនរងគ្រោះបន្តថា រហូតដល់ព្រឹកថ្ងៃទី៥ ឧសភា២០១៥ នាងបានទៅប្តឹងមេប៉ុស្តិ៍៥០ខ្នងឱ្យជួយអន្តរាគមន៍ ប៉ុន្តែមិនបានសម្រេច។
ក្រោយមកត្រូវបានស្ត្រីម្ចាស់ផ្ទះជួលបានប្រាប់មកវិញថា ម៉ូតូខាងលើត្រូវបានគាត់យកទៅបញ្ចាំបាត់ហើយ ដោយបានសន្យាថាចាំទៅលោះយកមកសងវិញ។ ប៉ុន្តែក្រោយពីជនរងគ្រោះចាំបាត់ៗមិនឃើញយកម៉ូតូមកឲ្យរហូតដល់ថ្ងៃទី០៩ ឧសភា ទើបស្ត្រីរងគ្រោះសម្រេចមកដាក់ពាក្យបណ្តឹងឱ្យសមត្ថកិច្ចប៉ុស្តិ៍ទឹកថ្លាជួយអន្តរាគមន៍តែម្តង។
លោកសុខ សុផល មេប៉ុស្ដិ៍ប៉ូលិសរដ្ឋបាលទឹកថ្លាឲ្យដឹងថា លោកនឹងចាត់វិធានការ ដោយដាក់លិខិតអញ្ជើញដើម្បីហៅស្ត្រីជាអ្នកដែលបានខ្ចីមូតូ និងយកទៅបញ្ចាំនោះឲ្យចូលខ្លួនមកសាកសួរក្នុងពេលឆាប់ៗនេះតែម្ដង៕
ចែករំលែកព័តមាននេះ