ខេត្តកំពង់ឆ្នាំង ៖ មន្ត្រីការិយាល័យផលិតកម្មនិងបសុព្យាបាល នៃមន្ទីរកសិកម្មរុក្ខាប្រមាញ់និងនេសាទខេត្តកំពង់ឆ្នាំងដឹកនាំដោយលោក ហ៊ុន លី កាលពីព្រឹកថ្ងៃទី១៤ ខែតុលា ឆ្នាំ២០២០ បានចុះអប់រំផ្សព្វផ្សាយស្ដីអំពី…
ខេត្តកំពង់ឆ្នាំង ៖ មន្ត្រីការិយាល័យផលិតកម្មនិងបសុព្យាបាល នៃមន្ទីរកសិកម្មរុក្ខាប្រមាញ់និងនេសាទខេត្តកំពង់ឆ្នាំងដឹកនាំដោយលោក ហ៊ុន លី កាលពីព្រឹកថ្ងៃទី១៤ ខែតុលា ឆ្នាំ២០២០ បានចុះអប់រំផ្សព្វផ្សាយស្ដីអំពី ជម្ងឺអុតក្តាម ព្រមទាំងចែកថ្នាំព្យាបាល សត្វដល់ប្រជាពលរដ្ឋចំនួន៣ ភូមិក្នុងឃុំច្រណូក ស្រុកកំពង់លែង ដែលកំពុងតែជួបហានិភ័យលើសត្វពាហនៈ ។
លោក ហ៊ុន លី អនុប្រធានការិយាល័យ ផលិតកម្ម និងបសុព្យាបាលខេត្តកំពង់ឆ្នាំង បាន មានប្រសាសន៍ថា ខែនេះជារដូវធ្លាក់ភ្លៀង រួមផ្សំនឹងទឹកជំនន់ផងបណ្ដាលឲ្យសត្វពាហនៈគោក្របី តែងកើតជំងឺអុតក្តាមជារៀងរាល់ឆ្នាំ។
លោកបានណែនាំដល់ប្រជាពលរដ្ឋឱ្យត្រូវចេះអនាម័យការពារដល់សត្វកុំឲ្យកើតជំងឺអុតក្តាម ដូចជាឱ្យដេកកន្លែងទីទួលស្ងួតមានសុវត្ថិភាព ។ ចំពោះសត្វគោ ក្របីដែលកើតជំងឺអុតក្តាម ត្រូវព្យាបាលដោយយកទឹកម្ជូរ មានដូចជាទឹកក្រូចឆ្មារ ឬយកស្លឹកអំពិលមកដាំធ្វើជាទឹកម្ជូរ មកលាងសម្អាត ដូចយើងលាងរបួស បន្ទាប់មកយើង យកថ្នាំដែលបានចែកនៅពេលនេះ មកលាងនូវចំណុចដែលសត្វពាហនៈឈឺជាការស្រេច ។ ត្រូវរកស្មៅខ្ចីឲ្យគោក្របី បរិភោគ សត្វខ្លះអាចកើតជំងឺមាត់ផងដែរដែលវាពិបាកនឹងទំពារចំណីរឹង ដូចជាចំបើងជាដើម ។
លោកបានណែនាំបន្តថា ចំពោះថ្នាំដែលបានចែកជូនបងប្អូននៅពេលនេះគឺជាថ្នាំដែលមានប្រសិទ្ធិភាពបំផុត ពេលបងប្អូនលាងជើងគោក្របី ដែលកើតជំងឺរួចលាប ទៅលើវារយៈពេលត្រឹមតែមួយថ្ងៃឬពីរថ្ងៃវានឹង ធូរស្រាល ហើយរយៈពេលប្រហែលជា ៤ទៅ៥ថ្ងៃវានឹង ជាសះស្បើយអាចដើរ ស៊ីស្មៅបាន ជាពុំខានឡើយ ។
សូមបញ្ជាក់ដែរថា ប្រជាពលរដ្ឋដែលនាំគោក្របីមកទទួលថ្នាំវ៉ាក់សាំងការពារនិងព្យាបាលជំងឺអុតក្តាម នឹងថ្នាំបាញ់សម្លាប់មេរោគនៅព្រឹកនោះមានចំនួន ១១០គ្រួសារ ដែលមានគោ ក្របីសរុប ១ ៦៥០ចំនួន ក្បាល ក្នុងនោះ ក្របី ៥៨៩ ក្បាល៕ (កែសម្រួលដោយ ៖ ធីតា)
ចែករំលែកព័តមាននេះ