ខេត្តបាត់ដំបង ៖ គិតត្រឹមម៉ោង៨ព្រឹកថ្ងៃទី១៤ តុលា នេះ កំពស់ទឹកក្នុងស្ទឹងសង្កែ បានស្រកចុះជាង២ម៉ែត្រ បើប្រៀបធៀបកាលពីម្សិលមិញ ដែលសន្ទុះទឹកស្ទឹងបានហក់ឡើងវិញ ដល់កំពស់១៤ម៉ែត្រ…
ខេត្តបាត់ដំបង ៖ គិតត្រឹមម៉ោង៨ព្រឹកថ្ងៃទី១៤ តុលា នេះ កំពស់ទឹកក្នុងស្ទឹងសង្កែ បានស្រកចុះជាង២ម៉ែត្រ បើប្រៀបធៀបកាលពីម្សិលមិញ ដែលសន្ទុះទឹកស្ទឹងបានហក់ឡើងវិញ ដល់កំពស់១៤ម៉ែត្រ ប៉ុន្តែកំណាត់ផ្លូវនានានៅក្នុងខេត្បានរងផលប៉ះពាល់ និងខូចខាតអស់ជាច្រើនកន្លែង។ នេះបើយោងតាមសេចក្ដីរាយការណ៍បឋមនានា ពីតាមបណ្ដាស្រុក និងតាមការពិនិត្យជាក់ស្ដែងលើកំពស់ទឹកស្ទឹងសង្កែ នៅក្នងក្រុងបាត់ដំបង។
បើតាមព័ត៌មានទឹកស្ទឹងសង្កែ បានចាប់ផ្ដើមថមថយនៅជិតពាក់កណ្ដាលយប់ថ្ងៃទី១៣ តុលា ហើយរហូតដល់ព្រឹកថ្ងៃទី១៤ តុលានេះ ទឹកស្ទឹងបានស្រកចុះដល់កំរិត១១,៧ម៉ ហើយបាននិងកំពុងស្រកចុះជាបន្តបន្ទាប់ទៀត ប្រសិនបើគ្មានភ្លៀងធ្លាក់នៅប៉ែកខាងលើ នៃតំបន់ស្រុកសំឡូត។ ដោយឡែក តាមដងផ្លូវនានានៅក្នុងក្រុង ក៏បានស្រកអស់ជាច្រើនកន្លែងដែរ លើកលេងតែផ្លូវលេខ៤ (ផ្លូវទូលតាឯក) មួយខ្សែប៉ុណ្ណោះ ដែលកំពុងនៅលិចលង់នៅឡើយ។ រីឯនៅតាមទីផ្សារនានា លំនៅឋានរបស់ប្រជាពលរដ្ឋដែលបានបិទទ្វារផ្អាកការលក់ដូរមួយរយៈកន្លែងទៅនេះ ក៏បានចាប់ផ្ដើមបើកទ្វារដំណើរការមុខជំនួញរបស់ខ្លួនឡើងវិញជាបណ្ដើរៗហើយ។
យោងតាមសេចក្ដីរាយការណ៍បណ្ដោះអាសន្នពីតាមបណ្ដាស្រុកនានា បានឲ្យដឹងថា គឺស្ទើរគ្រប់បណ្ដាស្រុកដែលត្រូវជំនន់ទឹកភ្លៀងវាយប្រហារយ៉ាងចាស់ដៃ នាប៉ុន្មានថ្ងៃកន្លងទៅនេះ ហាក់បានធូរស្រាលច្រើនហើយ។ ប៉ុន្តែអ្វីដែលជាបញ្ហានោះ គឺរាល់ហេដ្ឋារចនាផ្លូវថ្នល់ បានរងផលប៉ះពាល់ និង ខូចខាតអស់ជាច្រើនកន្លែង។ នៅឯស្រុកបវេល បើតាមលោក សុខ សារិន អធិការស្រុកនេះ បានឲ្យដឹងថា សន្ទុះទឹកបានស្រកចុះស្ទើរគ្រប់ទីកន្លែង តែផលដំណាំនិងកំណាត់ផ្លូវជាច្រើនកន្លែង បានរងការខូចខាត។
ប្រជាពលរដ្ឋបានចេញធ្វើដំណើរដំណើរប្រកបមុខរបរជាធម្មតាឡើងវិញ រីឯក្រុមអាជីវករលក់ដូរក្នុងផ្សារដែលផ្អាកលក់ដូរប៉ុន្មានថ្ងៃកន្លងទៅនេះ ក៏បានចាប់ផ្ដើមបើកទ្វារតូបលក់ដូរវិញជាបណ្ដើរៗវិញ នៅព្រឹកថ្ងៃទី១៤ តុលា នេះដែរ។ ចំពោះនៅស្រុកមោងប្ញស្សីឯណោះវិញ ក៏មិនខុសគ្នាពីតាមបណ្ដាស្រុកផ្សេងៗដែរ អាជ្ញាធរស្រុកបានរាយ
ការណ៍ថា ទឹកបានស្រកអស់ពីលើថ្នល់ហើយ តែផលប៉ះពាល់មានច្រើន។ កំណាត់ផ្ឡូវជាច្រើនកន្លែងបានខូចខាត និង ផលដំណាំរាប់រយហិកតាក៏កំពុងប្រឈម និង ការខូចខាតដែរ។ ដោយឡែក នៅតាមបណ្ដាស្រុកជាប់ព្រំដែនខ្មែរ-ថៃ វិញ បើតាមសេចក្ដីរាយការណ៍នៅព្រឹកថ្ងៃទី១៤ តុលា នេះដែរ បានឲ្យដឹងថា នៅតាមអូរបន្ទាត់ព្រំដែន បានស្រកចុះអស់ដូចប្រក្រតីវិញហើយ រីឯនៅត្រង់ចំណុចច្រកទ្វារអន្តរជាតិ«ដូង» ក្នុងស្រុកកំរៀង ដែលប៉ុន្មានថ្ងៃមុននេះ ជំនន់ទឹកភ្លៀងបានវាយលុកខ្លាំងបំផុតនោះ តែពេលនេះបានស្រកចុះដល់បាតអូរហើយ។
ចំពោះការគ្រោះថ្នាក់វិញ បើតាមយោងរបាយការណ៍ដែលកោះសន្តិភាពទទូលបានត្រឹមថ្ងៃទី១៣ តុលា ចំនួនមនុស្សស្លាប់នៅក្នុងមានជំនន់ទឹកភ្លៀង គឺមានជំនួន០៥នាក់ ក្នុងនោះ មាន០៤នាក់ស្លាប់ដោយលង់ទឹក និង ក្មេងស្រីម្នាក់ស្លាប់ដោយសារពុលដំឡូមី នៅស្រុកសំពៅលូន។ របាយការណ៍បឋមនេះ គិតចាប់ពីថ្ងៃទី០៩ ដល់ ទី១៣ តុលា ប៉ុន្តែគេនូវមានរបាយការណ៍ស្ដីពីការខូចខាតផលដំណាំ លំនៅឋានប្រជាពលរដ្ឋ ឬ ការខូចខាតហេដ្ឋារចនាសម្ព័ន្ធនានានៅឡើយទេ។
យ៉ាងណាក៏ដោយពេលនេះ អាជ្ញាធរខេត្ត ស្រុក បាននិងកំពុងមមារញឹកក្នុងការចុះត្រួតពិនិត្យ ដើម្បីវាយតំលៃពីផលប៉ះពាល់ដោយសារគ្រោះទឹកជំនន់នេះហើយ ខណៈអំណោយនានា ត្រូវបានអាជ្ញធរ និង សាខាកាក្កបាទក្រហមខេត្ត រួមទាំងសប្បុរសជននានាផង ចុះផ្ដល់ជួនជនរងគ្រោះដោយជំនន់ទឹកភ្លៀងនេះជាបន្តបន្ទាប់ ដែលជាការជួយសង្គ្រោះបណ្ដោះអាសន្ន៕
ចែករំលែកព័តមាននេះ