អភិបាលខេត្តដឹកនាំមន្ត្រីជំនាញ ចុះពិនិត្យស្ថានភាពកម្ពស់ទឹកនៅទំនប់អូរស្យា
- កំពង់ស្ពឺ
ខេត្តកំពង់ស្ពឺ ៖ នាព្រឹកថ្ងៃទី១២ ខែតុលា ឆ្នាំ២០២០ លោក វ៉ី សំណាង អភិបាលខេត្តកំពង់ស្ពឺ បានដឹកនាំមន្ត្រីជំនាញ…
ខេត្តកំពង់ស្ពឺ ៖ នាព្រឹកថ្ងៃទី១២ ខែតុលា ឆ្នាំ២០២០ លោក វ៉ី សំណាង អភិបាលខេត្តកំពង់ស្ពឺ បានដឹកនាំមន្ត្រីជំនាញ ដោយមានការអញ្ជើញចូលរួមពីអាជ្ញាធរស្រុក និងមន្ត្រីមន្ទីរពាក់ព័ន្ឋបានចុះពិនិត្យស្ថានភាពកម្ពស់ទឹកនៅទំនប់ចាន់ថ្នាលទំនប់អូរស្យា ហើយបន្តចុះពិនិត្យមើលផ្លូវទឹកលិច នៅឃុំអមលាំង ស្រុកថ្ពង ខេត្តកំពង់ស្ពឺ ព្រមទាំងពិនិត្យស្ថានភាពជំនន់ទឹកភ្លៀងក្នុងភូមិសាស្ត្រ ឃុំនានាជាច្រើនទៀត។
មានប្រសាសន៍នាឱកាសចុះពិនិត្យនេះ អភិបាលខេត្ត បានណែនាំដល់មន្ទីរធនធានទឹក អាជ្ញាធរស្រុក និងអង្គភាពពាក់ព័ន្ធនានា ត្រូវយកចិត្តទុកដាក់ខ្ពស់ តាមដាននូវរាល់ស្ថានភាពទឹក នឹងត្រូវចុះជួយប្រជាពលរដ្ឋឲ្យបានទាន់ពេលវេលា ក្នុងករណីមានទឹកជន់លិចផ្ទះរបស់ប្រជាពលរដ្ឋ។ ជាងនេះទៀតអាជ្ញាធរស្រុក ត្រូវត្រៀមគ្រប់មធ្យោបាយក្នុងការចុះជួយប្រជាពលរដ្ឋ ដើម្បីធ្វើយ៉ាងណាមិនឱ្យមានប្រជាពលរដ្ឋណាម្នាក់ទទួលរងគ្រោះថ្នាក់បានឡើយ។ សូមបងប្អូនរស់នៅតំបន់ទំនប់ចាន់ថ្នាល នៃទ្វារទឹករលាំងជ្រៃ និងតាមបណ្ដោយដងស្ទឹងព្រែកត្នោតទាំងអស់ សូមមេត្តាប្រុងប្រយ័ត្ន និងត្រៀមបង្ការឲ្យបានខ្ពស់។
លោកអភិបាលខេត្តបញ្ជាក់ថា យោងតាមស្ថានភាពធាតុអាកាសនៅបន្តធ្លាក់ភ្លៀងគ្របដណ្ដប់ទូទាំងប្រទេស ដោយឡែកខេត្តកំពង់ស្ពឺ ក៏បន្តទទួលរងនូវឥទ្ធិពលវិសម្ពាធទាបនេះផងដែរ។ ក្នុងនោះរដ្ឋបាលខេត្តកំពង់ស្ពឺ មានកិត្តិយសសូមជម្រាបជូនដំណឹងដល់បងប្អូនប្រជាពលរដ្ឋទាំងអស់ ជាពិសេសប្រជាពលរដ្ឋដែលរស់នៅផ្នែកខាងក្រោមនៃទំនប់ចាន់ថ្នាល ផ្នែកខាងលើ និងខាងក្រោម នៃទ្វារទឹករលាំងជ្រៃ និងតាមបណ្ដោយដងស្ទឹងព្រែកត្នោតទាំងអស់ សូមមេត្តាប្រុងប្រយ័ត្ន និង ត្រៀមបង្ការឲ្យបានខ្ពស់ ដោយជំនន់ទឹកភ្លៀងនេះ នឹងអាចកើតមានឡើងនៅតាមតំបន់ដូចជម្រាបជូនខាងលើ។
យោងតាមសេចក្តីជូនដំណឹង ស្តីពីស្ថានភាពជំនន់ទឹកភ្លៀងក្នុងខេត្តកំពង់ស្ពឺ នៅព្រឹកថ្ងៃទី១២ ខែតុលា ឆ្នាំ២០២០ ស្នើឲ្យបងប្អូន រស់នៅតំបន់ទំនប់ចាន់ថ្នាល នៃទ្វារទឹករលាំងជ្រៃ និងតាមបណ្ដោយដងស្ទឹងព្រែកត្នោតទាំងអស់ សូមមេត្តាប្រុងប្រយ័ត្ន និងត្រៀមបង្ការឲ្យបានខ្ពស់។ លោក ញាញ់ ជៀបហ័ង ប្រធានមន្ទីរធនធានទឹក បានឲ្យដឹងថា តំបន់ខ្លះនៃខេត្តកំពង់ស្ពឺចាប់ផ្តើមគំរាមកំហែងដោយជំនន់ទឹកភ្លៀងហើយក្នុងនោះ កម្ពស់ទឹកភ្លៀង មានធ្លាក់ភ្លៀងនៅគ្រប់ក្រុង-ស្រុក។
លោកបន្តថា មកទល់ពេលនេះមានភូមិមួយរបស់ឃុំអមលាំង ទទួលរងនូវការលិចលង់់ដោយទឹកបានហូរឆ្លងកាត់ផ្លូវតែមិនមានស្ថានភាពអ្វីប៉ះពាល់អាយុជីវិតរបស់ប្រជាពលរដ្ឋឡើយ។ លោក គាវ លាងគា អភិបាលស្រុកថ្ពង បានបញ្ជាក់ប្រាប់ថា ដោយសារស្ថានភាពទឹកជន់ខ្លាំងធ្វើឲ្យប្រជាពលរដ្ឋចំនួន៧៤គ្រួសាររស់នៅតំបន់ទឹកធ្លាក់ជ្រាវឃុំអមលាំង ស្រុកថ្ពង បានរងនូវការជន់លិចក្នុងនោះ១៣គ្រួសារខូចខាតធ្ងន់ធ្ងរ ហើយត្រូវបានអាជ្ញាធរជម្លៀសមកកាន់ទីទួលសុវត្ថិភាពអស់ហើយ៕ ដោយ ៖ វង្ស សន
ចែករំលែកព័តមាននេះ