ខេត្តបាត់ដំបង ៖ កម្លាំងអន្តរាគមន៍របស់យោធភូមិភាគទី៥ បាននិងកំពុងមមារញឹក ចុះជួយសង្គ្រោះប្រជាពលរដ្ឋនៅក្នុងសង្កាត់រតន: ដែលភូមិមួយចំនួននៅក្នុងសង្កាត់នេះ កំពុងរងគ្រោះធ្ងន់ធ្ងរជាងគេ ក្នុងចំណោមសង្កាត់ទាំង១០ នៅក្នុងក្រុងបាត់ដំបង។ នេះបើតាមសេចក្ដីរាយការណ៍បណ្ដោះអាសន្នពីមន្ត្រីយោធាដែលកំពុងចុះអន្តរាគមន៍ជួយសង្គ្រោះពលរដ្ឋ បានប្រាប់កោះសន្តិភាពនៅព្រឹកថ្ងៃទី១២ តុលា។
មន្ត្រីយោធភូមិភាគទី៥បាននិយាយថា នៅព្រឹកនេះ (១២ ១០ ២០) ទឹកជំនន់ដែលបែកចេញពីដងស្ទឹងសង្កែ បានវាយប្រហារទៅលើភូមិចំនួន០៣ នៅក្នុងសង្កាត់រតន: បណ្ដាលឲ្យលិចលង់ធ្ងនកជាងគេ។ ប្រភពយោធាបានបន្តទៀតថា ភូមិទាំង០៣ ដែលប្រឈមនឹងការលិចលង់ធ្ងន់ធ្ងរនោះ មានភូមិសូភី១ ភូមិសូភី២ និង ភូមិសូភី៣ សង្កាត់រតន: ក្រុងបាត់ដំបង។
បើតាមប្រភពដដែលបានបញ្ជាក់ថា នៅកន្លែងខ្លះនៃភូមិទាំង០៣នេះ ទឹកបានឡើងដល់កំពស់ចន្លោះពី១,២ម៉ ទៅ១,៥ម៉ ដែលធ្វើឱ្យលំនៅឋានរបស់ប្រជាពលរដ្ឋនៅក្នុងភូមិរងគ្រោះលិចលង់យ៉ាងធ្ងន់ធ្ងរ។ ស្ថានភាពទឹកជំនន់យ៉ាហក់នេះ ចាំបាច់ត្រូវតែជួយជម្លៀសពលរដ្ឋចេញពីលំនៅឋាន រួមទាំងទ្រព្យសម្បត្តិនានាផង។
សូមបញ្ជាក់ថា គិតត្រឹមព្រឹកនេះ ស្ថានភាពទឹកស្ទឹងសង្កែ ហាក់នៅកំពស់ស្ថេរជាង១៤ម៉ដដែល ដែលលើសពីកម្រិតប្រកាសអាសន្ន។ បើតាមការពិនិត្យជាក់ស្ដែង កំពស់ទឹកនៅក្នុងស្ទឹងសង្កែ នៅកន្លែងខ្លះនាពេលនេះ ហាក់មានកំពស់ខ្ពស់ជាងផ្លូវនានានៅក្នុងក្រុង ធ្វើឱ្យទឹកហូរបែកចេញតាមប្រព័ន្ធមួយចំនួនចូលតាមភូមិនានាដែលទាមជាងស្ទឹង ទើបបណ្ដាឱ្យលំនៅឋានប្រជាពលរដ្ឋនៅសង្កាត់នានារងគ្រោះធ្ងន់ធ្ងរបែបនេះ។ ជាពិសេសនៅសង្កាត់រតន: តែម្ដង ដែលពេលនេះកំពុងប្រឈមនឹងជំនន់ទឹកភ្លៀង បែកចេញពីស្ទឹងចាស់ដៃជាងគេ។
ប៉ុន្តែពេលនេះ គេឃើញកម្លាំងយោធភូមិភាគទី៥ រាប់សិបនាក់ភ្ជាប់ទៅជាមួយនូវឧបករណ៏សង្គ្រោះ និង មានទាំងកាណូតជាច្រើនគ្រឿងផង បានចេញទៅអន្តរាគមន៏ជួយសង្គ្រោះពលរដ្ឋ ជួយដឹកជញ្ជូនសម្ភារ: និងទ្រព្យសម្បត្តិផ្សេងៗ ដើម្បីជន្លៀសទៅកាន់ទីសុវត្ថិភាព ខណ:នៅតាមបណ្ដាសង្កាត់ដទៃទៀតក៏កំពុងប្រឈមនឹងការលិចលង់ជាបណ្ដើរៗដូចគ្នាដែរ៕
ចែករំលែកព័តមាននេះ