ខេត្តព្រះសីហនុ ៖ ទន្ទឹមនឹងខេត្តព្រះសីហនុកំពុងមានការអភិវឌ្ឍហេដ្ឋារចនាសម្ព័ន្ធនាពេលបច្ចុប្បន្ននេះ ក្រោយពីរាជរដ្ឋាភិបាលទម្លាក់កញ្ចប់ថវិកាយ៉ាងច្រើន ក្នុងការស្ថាបនាផ្លូវចំនួន៣៤ខ្សែ ដោយចាក់បេតុងនិងប្រព័ន្ធលូបានមួយរយភាគរយហើយនោះ សម្រាប់ជំហានបន្តគឺរៀបចំបំពាក់អំពូលភ្លើងតាមសួនច្បារ ដាំដើមឈើ ក្រាលថ្មក្រានីត ចាក់ក្រាលកៅស៊ូ គូសគំនូសចរាចរណ៍ និងបំពាក់កាមេរ៉ាសុវត្ថិភាព ដើម្បីឲ្យមានភាពងាយស្រួលក្នុងការធ្វើដំណើររបស់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិដែលមកលេងកម្សាន្ត ។
ក្រៅពីផ្លូវទាំង៣៤ខ្សែនេះ លោក បូរី វង្សសានិត្យ ប្រធានមន្ទីរសាធារណការនិងដឹកជញ្ជូនខេត្ត បានឲ្យដឹងថា រាជរដ្ឋាភិបាលក៏បានទម្លាក់កញ្ចប់ថវិកាប្រមាណ១០០លានដុល្លារសហរដ្ឋអាមេរិក ក្នុងការស្ថាបនាផ្លូវចំនួន១១ខ្សែបន្ថែមទៀត ដែលចាប់ពីចុងខែមិថុនា ឆ្នាំ២០២០ មកដល់ពេលនេះគឺបានប្រមាណ១៤ភាគរយហើយ ។
ការស្ថាបនាផ្លូវនេះរួមមានផ្លូវសម្ដេចព្រះសង្ឃរាជ ទេព វង្ស ដែលមានចម្ងាយជាង៤០គីឡូម៉ែត្រ ស្ថាបនាដោយក្រុមហ៊ុនចិន ការស្ថាបនាកំណាត់ផ្លូវជាតិលេខ៤ ដោយក្រុមកងវិស្វកម្មខេត្តសៀមរាប និងផ្លូវនៅក្នុងក្រុង៧ខ្សែ ស្ថាបនាដោយកងវិស្វកម្មក្រសួងការពារជាតិ និង២ខ្សែទៀតស្ថាបនាដោយមន្ទីរសាធារណការនិងដឹកជញ្ជូនខេត្ត ។
សមិទ្ធផលទាំងអស់នេះ គឺដោយការយកចិត្តទុកដាក់របស់រាជរដ្ឋាភិបាល ក៏ដូចជាអាជ្ញាធរខេត្ត ក្រោមការដឹកនាំរបស់ឯកឧត្តម គួច ចំរើន អភិបាលខេត្ត ក្នុងការរៀបចំហេដ្ឋារចនាសម្ព័ន្ធផ្លូវថ្នល់ សូនច្បារ អនាម័យបរិស្ថាន ក៏ដូចជាតំបន់ទេសចរណ៍នានា ធ្វើយ៉ាងណាក្នុងគោលបំណងរួមដើម្បីអភិវឌ្ឍន៍ខេត្តព្រះសីហនុ ជាបន្តបន្ទាប់ ៕
ចែករំលែកព័តមាននេះ