ខេត្តសៀមរាប ៖ មានករណីជម្លោះរវាងបងថ្លៃនិងប្អូនថ្លៃ ខណៈបងថ្លៃមកពីផឹកស្រវឹងស្រាជាមួយមិត្តភ័ក្ត្រ ហើយដើរកាត់មុខផ្ទះ លុះឃើញប្អូនថ្លៃនិយាយឌឺដងផ្លែផ្កាជាច្រើនដងធ្វើឱ្យបុរសជាបងថ្លៃទ្រាំមិនបានក៏ស្ទុះទៅវាយប្អូនថ្លៃចំនួន២ដៃ បណ្តាលឱ្យរងរបួសធ្ងន់ ចំណែកជនសង្ស័យជាបងថ្លៃត្រូវសមត្ថកិច្ចឃាត់ខ្លួន ។ ហេតុការណ៍ខាងលើនេះបានកើតឡើងកាលពីវេលាម៉ោង៦យប់ថ្ងៃទី៥…
ខេត្តសៀមរាប ៖ មានករណីជម្លោះរវាងបងថ្លៃនិងប្អូនថ្លៃ ខណៈបងថ្លៃមកពីផឹកស្រវឹងស្រាជាមួយមិត្តភ័ក្ត្រ ហើយដើរកាត់មុខផ្ទះ លុះឃើញប្អូនថ្លៃនិយាយឌឺដងផ្លែផ្កាជាច្រើនដងធ្វើឱ្យបុរសជាបងថ្លៃទ្រាំមិនបានក៏ស្ទុះទៅវាយប្អូនថ្លៃចំនួន២ដៃ បណ្តាលឱ្យរងរបួសធ្ងន់ ចំណែកជនសង្ស័យជាបងថ្លៃត្រូវសមត្ថកិច្ចឃាត់ខ្លួន ។
ហេតុការណ៍ខាងលើនេះបានកើតឡើងកាលពីវេលាម៉ោង៦យប់ថ្ងៃទី៥ ខែតុលា ឆ្នាំ២០២០ ស្ថិតនៅភូមិខ្ទីង ឃុំពាក់ស្នែង ស្រុកអង្គរធំ ខេត្តសៀមរាប។
លោកឧត្តមសេនីយ៍ត្រី ភឹង ចិន្តា រ៉េត ស្នងការរងនគរបាលទទួលផែនការងារព្រហ្មទណ្ឌ នៃស្នងការដ្ឋាននគរបាលខេត្តសៀមរាប បានប្រាប់នៅព្រឹកថ្ងៃទី៦ ខែតុលា ឆ្នាំ២០២០នេះថា ជនរងគ្រោះឈ្មោះ ស៊ត់ ស៊ាង ភេទប្រុស អាយុ៥០ឆ្នាំ រស់នៅភូមិឃុំកើតហេតុខាងលើ ត្រូវជាប្អូនថ្លៃ ។ ចំណែកជនសង្ស័យត្រូវជាបងថ្លៃ ឈ្មោះ ឡិប លឿម ភេទប្រុស អាយុ៥០ឆ្នាំ ។ អ្នកទាំង២រស់នៅភូមិឃុំកើតហេតុខាងលើ។
លោកបានបញ្ជាក់ថា មុនពេលកើតហេតុ នៅវេលាម៉ោង៣រសៀលថ្ងៃកើតហេតុខាងលើ ជនសង្ស័យជាបងថ្លៃ បានមកពីផឹកស្រា លុះពេលដើរមកដល់មុខផ្ទះជនរងគ្រោះជាប្អូនថ្លៃ ហើយត្រូវប្អូនថ្លៃបាននិយាយរករឿងឈ្លោះជាមួយខ្លួន ពេលនោះធ្វើឱ្យជនសង្ស័យខឹងក៏ស្ទុះទៅវាយលើជនរងគ្រោះចំនួនពីរដៃ បណ្ដាលឱ្យជនរងគ្រោះដួលទៅលើដីហូរឈាមតាមមាត់ ហើយត្រូវបានគេបញ្ជូនមកមណ្ឌលសុខភាពពាក់ស្នែង ប៉ុន្តែដោយសារស្ថានភាពរបួសធ្ងន់ធ្ងរពេក គ្រូពេទ្យក៏បញ្ជូនបន្ដទៅមន្ទីរពេទ្យបង្អែកខេត្តសៀមរាប ដើម្បីជួយសង្គ្រោះបន្ទាន់ ។
ក្រោយទទួលបានព័ត៌មានខាងលើនេះភ្លាម កម្លាំងសមត្ថកិច្ចបាននាំជនសង្ស័យខាងលើមកធ្វើការសាកសួរ ហើយជនសង្ស័យបានសារភាពថា ខ្លួនពិតជាបានប្រើអំពើហិង្សាដូចបានរៀបរាប់របស់ជនរងគ្រោះខាងលើពិតប្រាកដមែន ។ ដោយឡែកកម្លាំងសមត្ថកិច្ចក៏បានធ្វើតេស្តជនសង្ស័យដើម្បីរកសារធាតុញៀនផងដែរ ជាលទ្ធផលគឺអវិជ្ជមាន។
បច្ចុប្បន្ន ជនសង្ស័យត្រូវបានកម្លាំងនគរបាលស្រុកអង្គរធំ រៀបចំកសាងសំណុំរឿងបញ្ជូនមកការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត ដើម្បីសួរនាំបន្ត និងរៀបចំកសាងសំណុំរឿងបញ្ជូនខ្លួនបន្តទៅតុលាការខេត្ត ដើម្បីចាត់ការតាមនីតិវិធីច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ