រាជធានីភ្នំពេញ ៖ សត្តឃាតដ្ឋានសេនគ្រីយ៉ា(កុងស៊ីកាប់គោ-ក្របី)នៅតែបង្កអោយប៉ះពាល់ដល់បរិស្ថានយ៉ាងធ្ងន់ធ្ងរ ដោយសារតែការបង្ហូរកាកសំណល់ និងឈាមចូលទៅក្នុងព្រែក(ប្រឡាយ) ។ ប៉ុន្មានថ្ងៃនេះ ស្របពេលដែលភ្លៀងធ្លាក់ជាបន្តបន្ទាប់ ឈាម និងលាមកគោ-ក្របី…
រាជធានីភ្នំពេញ ៖ សត្តឃាតដ្ឋានសេនគ្រីយ៉ា(កុងស៊ីកាប់គោ-ក្របី)នៅតែបង្កអោយប៉ះពាល់ដល់បរិស្ថានយ៉ាងធ្ងន់ធ្ងរ ដោយសារតែការបង្ហូរកាកសំណល់ និងឈាមចូលទៅក្នុងព្រែក(ប្រឡាយ) ។ ប៉ុន្មានថ្ងៃនេះ ស្របពេលដែលភ្លៀងធ្លាក់ជាបន្តបន្ទាប់ ឈាម និងលាមកគោ-ក្របី បានធ្វើអោយទឹកជន់លិចភូមិលាយឈាម មានពណ៌ខ្មៅស្អុយឆ្អាបពេញភូមិ ធ្វើអោយអ្នកភូមិដែលមានទឹកជន់លិចស្ទើរទ្រាំលែងបានទៅហើយ ។
ទីសត្តឃាត សេនគ្រីយ៉ា ដែលកំពុងបំផ្លាញបរិស្ថាននេះ ស្ថិតនៅចំណុចស្ពានលេខ៦ ក្នុងភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ។ តាមប្រជាពលរដ្ឋ ដែលរស់នៅផ្នែកខាងក្រោមព្រែក បានអោយដឹងថា កុងស៊ីកាប់គោ-ក្របី សេនគ្រីយ៉ា នេះ កំពុងតែបង្កអោយប៉ះពាល់ដល់បរិស្ថាននៅជុំវិញធ្ងន់ធ្ងរ ដោយសារកាប់គោក្របីមួយថ្ងៃរាប់រយក្បាល បង្ហូរកាកសំណល់មានលាមកសត្វ ឈាម ចូលទៅក្នុងប្រឡាយ ព្រមទាំងបង្កសម្លេងរំខានទាំងយប់ទាំងថ្ងៃ រកពេលសម្រាកមិនបាន ។
ក្រៅពីនោះ រាល់ថ្ងៃមានរថយន្តតូចធំចេញចូលដឹកគោ-ក្របីចំណីសត្វចេញចូល បង្កអោយខូចផ្លូវ និងសាចទឹកដាក់សិស្សដែលធ្វើដំណើរទៅរៀន ព្រមទាំងដុតឆ្អឹងគោក្របី បណ្តាលអោយក្លិនឈ្ងៀមពេញភូមិ បង្កអោយប៉ះពាល់ដល់អ្នកមានផ្ទៃពោះ និងចាស់ជរា ក្លិនស្អុយបានជះតាមខ្យល់ទៅដល់វិមានឈ្នះ=ឈ្នះ រំខានដល់ភ្ញៀវទស្សនាទៀតផង ។
ប្រជាពលរដ្ឋក៍បានអោយដឹងទៀតថា កន្លងមក ពួកគាត់តែងតែលើកឡើងនៅក្នុងវេទិកាសាធារណៈ និងប្តឹងទៅអាជ្ញាធរមូលដ្ឋានអោយជួយដោះស្រាយ តែស្ងាត់រហូត ហើយកុងស៊ីនៅតែបន្តកាប់ គោ-ក្របីបង្ហូរឈាម និងកាកសំណល់ចូលក្នុងប្រឡាយដដែល ។ នៅពេលថ្មី ភ្លៀងធ្លាក់ប៉ុន្មានមេនេះ ទឹកព្រែកដែលពីមុនធ្លាប់តែប្រើបាន ពេលនេះទឹកឡើងខ្មៅ និងក្រហមព្រឿងៗ ហើយឡើងព្រៀបព្រែកជិតលិចផ្ទះ ព្រមទាំងមានក្លិនឆ្អាបពេញភូមិ ។ ក្រៅពីនោះ នៅជំុវិញក្នុងភូមិសុទ្ធតែរោងចិញ្ចឹមគោ ដែលមានភក់ជ្រាំ បង្កក្លិនស្អុយ គ្រាន់តែជិះកាត់ក៍ជាប់ក្លិនស្អុយតាមខ្លួនដែរ ។
ប្រជាពលរដ្ឋក៍បានសំណូមពរដល់អាជ្ញាធរខណ្ឌជ្រោយចង្វារមកដល់កោះសន្តិភាព ក៍ដូចជារដ្ឋបាលរាជធានីភ្នំពេញ មេត្តាចុះទៅត្រួតពិនិត្យជាក់ស្តែង និងដោះស្រាយផង កុំជឿតែមន្ត្រីមួយចំនួនដែលទទួលបានលាភរាយការណ៍នោះ ។ គួរបញ្ជាក់ថា ទីតាំងកុងស៊ីនេះ បានដំណើរការ៣ឆ្នាំមកហើយ ពុំបានលើកស្លាកនោះទេ ទើបតែលើកក្នុងឱកាសបុណ្យភ្ជុំបិណ្ឌកន្លងមកនេះ ក្រោយពេលផ្ទុះការប្រឆាំងតវ៉ាដោយមានឈ្មោះ
«ជំទាវ»លើស្លាកយីហោនេះផងដែរ ។ បើតាមលិខិតអនុញ្ញាតរបស់មន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ ទីសត្តឃាតមួយនេះនឹងផុតសុពលភាពនៅថ្ងៃទី១៦ ខែតុលា ឆ្នាំ២០២០ ។
ទន្ទឹមនោះ ម្ចាស់កុងស៊ីឈ្មោះ សេន គ្រីយ៉ា ក៍បានដាក់ពាក្យស្នើសុំបន្តច្បាប់បង្កើតសត្ត ឃាតដ្ឋាននេះបន្តទៀត តែរដ្ឋបាលខណ្ឌជ្រោយចង្វារមិនចុះហត្ថលេខាបញ្ជូនសំណើសុំអនុញ្ញាតបន្តបង្កើតសត្តឃាតនេះបានទៀតឡើយ ដោយហេតុថា ទីតាំងនេះស្ថិតនៅបណ្តុំប្រជាពលរដ្ឋរស់នៅកកកុញ ដែលធ្វើអោយប៉ះពាល់ដល់បរិស្ថានរស់នៅរបស់ប្រជាពលរដ្ឋក្បែរនោះ និងតែងតែបង្កសម្លេងរំខាន ជាហេតុធ្វើអោយប្រជាពលរដ្ឋមាន ការថ្នាំងថ្នាក់ និងបានលើកឡើងពីទុក្ខកង្វល់គ្រប់វេទិកាសាធារណៈ កន្លងមកល្មមឱ្យរដ្ឋអំណាចគិតគូរភាពសុខសាន្តក្នុងមូលដ្ឋានរបស់ខ្លួនហើយ ។
រដ្ឋបាលខណ្ឌស្នើឱ្យរកទីតាំងថ្មីសមស្រប កុំនៅកន្លែងដែលនាំបញ្ហាមិនឈប់ ដែលល្មមរកទីតាំងថ្មីទៅទើបសុខ ។ លុះក្រោយមកនៅរសៀលថ្ងៃទី២៥ ខែកញ្ញា ឆ្នាំ២០២០ នៅពេលដែលមន្ត្រីជំនាញចុះទៅត្រួតពិនិត្យ ប្រជាពលរដ្ឋប្រមាណ២០នាក់ បានលើកបដាតវ៉ាសូមអោយបិទកុងស៊ី តែត្រូវបានម្ចាស់នាំគ្នាដកហូតយកអស់ ខណៈពេលដែលទីតាំងរៀបចំស្អាតបាត ដើម្បីអោយមន្ត្រីជំនាញចុះទៅត្រួតពិនិត្យនោះ ។
ទាក់ទិនការចោទប្រកាន់នេះ លោក សេនគ្រីយ៉ា ម្ចាស់កុងស៊ីក៍ធ្លាប់បានបំភ្លឺអោយដឹងថា កុងស៊ីរបស់លោកពុំបង្កអោយប៉ះពាល់ដល់បរិស្ថាន ហើយពុំមានអ្នកណាប្តឹងផ្តល់ឡើយ គឺជារឿងភូតកុហកលើគោក ។ ចំណែកការបន្តច្បាប់ ត្រូវគេភូតកុហកថា លោកអភិបាលខណ្ឌបានស៊ីញ៉េបញ្ជូនហើយ ដែលផ្ទូយពីលិខិតរបស់រដ្ឋបាលខណ្ឌជ្រោយ ចង្វារ មិនព្រមឱ្យបន្តច្បាប់កាប់គោ-ក្របីក្នុងតំបន់ប្រជុំជននេះទៀតទេ ។
ទោះបីជាយ៉ាងណា មហាជនចាំមើលតើច្បាប់អនុញ្ញាតអោយបន្ត ឬយ៉ាងណា បើកុងស៊ីកាប់គោ-ក្របី បង្ហូរឈាម និងកាកសំណល់ចូលទឹកព្រែកបែបនេះ? មតិខ្លះថា អ្នកដែលបន្តច្បាប់ សង្ស័យត្រូវថ្នាំសណ្ដំមិនខាន ៕
ចែករំលែកព័តមាននេះ