ខេត្តកំពង់ឆ្នាំង ៖ គួរឱ្យសោកស្ដាយជីវិតមន្ត្រីយោធាម្នាក់ ដែលបានស្លាប់ដោយសារធ្លាក់ចូលទឹកស្រះលង់ហើយជួយមិនទាន់ ខណៈព្យាយាមជួយដេញចាប់ចោរស្រីប្រុស២នាក់ ដែលបានធ្វើសកម្មភាពកាច់សោកលួចម៉ូតូមួយគ្រឿង ។ ហេតុការណ៍នេះ កើតឡើងកាលពីវេលាម៉ោងប្រមាណ៣រសៀលថ្ងៃទី២៧ ខែកញ្ញា ឆ្នាំ២០២០ នៅចំណុចមាត់ទន្លេក្នុងភូមិកំពង់ត្រឡាចក្រោម ឃុំកំពង់ត្រឡាច ស្រុកកំពង់ត្រឡាច ។
ទោះជាយ៉ាងនេះក្តី ក្រុមចោរស្រីប្រុសទាំង២នាក់ ត្រូវបានកម្លាំងសមត្ថកិច្ចសហការជាមួយប្រជាការពារ និងប្រជាពលរដ្ឋស្ទាក់ចាប់បាន ដើម្បីកសាងសំណុំរឿងតាមផ្លូវច្បាប់ ។
អធិការនគរបាលស្រុកកំពង់ត្រឡាច លោក នន ស៊ីណាត បានឱ្យដឹងថា មន្ត្រីយោធាដែលមានគ្រោះថ្នាក់រហូតដល់បាត់បង់ជីវិតនេះឈ្មោះ សាយ វិសាល ភេទប្រុស អាយុ១៨ឆ្នាំ ជាយោធានៅវរៈទី៣ កងពលតូចអន្តរាគមន៍លេខ១លង្វែក មានទីលំនៅក្នុងស្រុកសាមគ្គីមានជ័យ ។ ចំណែកជនសង្ស័យទាំង២នាក់ ម្នាក់ឈ្មោះ សេន ឡឹប ភេទប្រុស អាយុ៣៤ឆ្នាំ រស់នៅភូមិកញ្ជោង ឃុំច្រេស ស្រុកកំពង់ត្រឡាច និងម្នាក់ទៀតឈ្មោះ សេង ពេជ្រ ភេទស្រី អាយុ៣៥ឆ្នាំ រស់នៅស្រុកពញាឮ ខេត្តកណ្តាល ។
លោកអធិការបន្តថា មុនពេលកើតហេតុ នៅហាងលក់គ្រឿងក្លែមរបស់ឈ្មោះ ឡាន មានករណីលួចកាច់សោកយកម៉ូតូ១គ្រឿងជារបស់ឈ្មោះ សាំង សុភ័ក្ត្រ ភេទប្រុស អាយុ២៤ឆ្នាំ មានទីលំនៅភូមិដំណាក់អំពិល ឃុំត្បែងខ្ពស់ ស្រុកសាមគ្គីមានជ័យ ហើយក៏មានការឆោឡោឡើង ។ ភ្លាមនោះ លោកបានបញ្ជាតាមវិទ្យុទាក់ទងដល់នគរបាលប៉ុស្តិ៍ឲ្យសហការជាមួយប្រជាការពារដើម្បីអន្តរាគមន៍ស្ទាក់ចាប់មុខសញ្ញា ។ ជាមួយគ្នា
នេះ មន្ត្រីយោធាម្នាក់ឈ្មោះ សាយ វិសាល ដែលនៅជិតកន្លែងកើតហេតុបានឃើញសកម្មភាពនេះ ក៏ចូលរូមដេញចាប់ជនសង្ស័យដែរ ។
លោកអធិការបន្តទៀតថា ដោយសារមានភ្លៀងរលឹមធ្វើឱ្យភាពផ្លូវរអិល ជនសង្ស័យទាំង២នាក់មិនអាចបើកម៉ូតូលឿនបានទេ លុះទៅដល់ពាក់កណ្តាលផ្លូវជួបនឹងសមត្ថកិច្ចដែលកំពុងស្ទាក់ចាប់ ជនល្មើសក៏ផ្តួលម៉ូតូបំណងរត់គេចខ្លួន ប៉ុន្តែត្រូវសមត្ថកិច្ចចាប់បានម្នាក់ជាមនុស្សស្រី ចំណែកជនសង្ស័យជាមនុសុ្សប្រុសបានបន្តរត់គេចខ្លួន ហើយត្រូវកម្លាំងសមត្ថកិច្ចដេញតាមចាប់បន្ត ។
ប៉ុន្តែប្រការគួរឱ្យសោកស្តាយ ក្នុងពេលដែលសមត្ថកិច្ចបន្តដេញតាមចាប់ខ្លូនជនម្នាក់ទៀតនោះ ស្រាប់តែមន្ត្រីយោធាដែលចូលរួមដេញចាប់ចោរនោះដែរ បានរអិលធ្លាក់ចូលទឹកស្រះមានជម្រៅជ្រៅ បណ្តាលឱ្យលង់ស្លាប់តែម្តងព្រោះមិនចេះហែលទឹក ។ ចំណែកជនសង្ស័យម្នាក់ទៀតដែលព្យាយាមរត់គេចខ្លួន ក៏ត្រូវសមត្ថកិច្ចចាប់ខ្លួនបានដែរ ។
ជនសង្ស័យទាំង២នាក់រួមនឹងវត្ថុតាងមានម៉ូតូ១គ្រឿង និងដែកអក្សរ T សម្រាប់ធ្វើសកម្មភាពកាច់សោកម៉ូតូ ត្រូវបានសមត្ថកិច្ចកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្តដើម្បីបន្តនីតិវិធី ។ ដោយឡែក សពមន្ត្រីយោធាដែលរងគ្រោះក្នុងហេតុការណ៍ជួយដេញចាប់ចោរលួចម៉ូតូនេះ ត្រូវបានបញ្ជូនទៅឲ្យក្រុមគ្រួសារដើម្បីធ្វើបុណ្យតាមប្រពៃណី ៕
ចែករំលែកព័តមាននេះ