ខេត្តបន្ទាយមានជ័យ ៖ ទឹកជំនន់ធ្លាក់ពីថៃ បានជន់លិចលំនៅឋានប្រជាពលរដ្ឋនៅស្រុកចំនួន២ជាប់ជាយដែនជិត១០០គ្រួសារ និងបានជម្លៀសរកទីទួលសុវត្ថិភាពចំនួន១៤គ្រួសារ ប៉ុន្តែមកដល់ល្ងាចថ្ងៃទី២៤ ខែកញ្ញា ឆ្នាំ២០២០ ទឹកបានស្រកបន្តិចហើយ ក្នុងខេត្តបន្ទាយមានជ័យ…
ខេត្តបន្ទាយមានជ័យ ៖ ទឹកជំនន់ធ្លាក់ពីថៃ បានជន់លិចលំនៅឋានប្រជាពលរដ្ឋនៅស្រុកចំនួន២ជាប់ជាយដែនជិត១០០គ្រួសារ និងបានជម្លៀសរកទីទួលសុវត្ថិភាពចំនួន១៤គ្រួសារ ប៉ុន្តែមកដល់ល្ងាចថ្ងៃទី២៤ ខែកញ្ញា ឆ្នាំ២០២០ ទឹកបានស្រកបន្តិចហើយ ក្នុងខេត្តបន្ទាយមានជ័យ ។
លោក លី សុវណ្ណារិទ្ធ អភិបាលស្រុកអូរជ្រៅបានប្រាប់នៅល្ងាចថ្ងៃទី២៤ ខែកញ្ញា ឆ្នាំ២០២០ថា ទឹកជំនន់ដែលហូរធ្លាក់ពីថៃបានលិចផ្ទះសម្បែងបងប្អូនប្រជាពលរដ្ឋចំនួន៦៤គ្រួសារ ក្នុងនោះមាន១៤គ្រួសារ ត្រូវជម្លៀសទៅរកទីទួលមានសុវត្ថិភាពនៅសាលាឃុំអូរបីជាន់សម្រាប់ប្រជាពលរដ្ឋដែលរស់នៅតាមបន្ទាត់ព្រំដែនក្នុងភូមិអូរបីជាន់ ឃុំអូរបីជាន់ ។
លោកអភិបាលស្រុកបញ្ជាក់ថា ទឹកជំនន់មិនមែនប៉ះពាល់ត្រឹមតែផ្ទះសម្បែងប្រជាពលរដ្ឋប៉ុណ្ណោះទេ តែក៏ជន់លិចផលដំណាំផងដែរ កាលពីល្ងាចថ្ងៃទី២៣ ខែកញ្ញា ។ ប៉ុន្តែមកដល់ល្ងាចថ្ងៃទី២៤ ខែកញ្ញា ឆ្នាំ២០២០ បានស្រកបន្តិចហើយ ហើយបើគ្មានភ្លៀងធ្លាក់ទៀតទេទឹកអាចបន្តស្រកទៀត ។ ទោះបីជាបែបណា ទឹកដែលជន់លិចមិនទាន់ប៉ះពាល់ដល់ផ្ទះប្រជាពលរដ្ឋធ្ងន់នៅឡើយទេ គឺលិចតែក្រោមផ្ទះនិងដំណាំប៉ុណ្ណោះ ។
លោក អែម សុខា អភិបាលស្រុកម៉ាឡៃថ្លែងថា នៅស្រុកម៉ាឡៃទឹកជំនន់ដែលហូរធ្លាក់ពីខេត្តប៉ៃលិនមក បានហូរយ៉ាងគំហុកតាមអូរព្រំដែន បណ្តាលឱ្យលិចលង់បះពាល់ផ្ទះពលរដ្ឋជាង១០គ្រួសារនិងដំណាំមួយចំនួនរយៈពេល២ថ្ងៃមកហើយ គឺចាប់ពីថ្ងៃទី២៣ដល់២៤ ខែកញ្ញា ឆ្នាំ២០២០ ។ ប្រជាពលរដ្ឋដែលប៉ះបាល់ គឺអ្នករស់នៅតាមព្រំដែន ក្នុងភូមិសង្កែ ឃុំបឹងបេង ហើយរហូតមកដល់ល្ងាចថ្ងៃទី២៤ ខែកញ្ញា ឆ្នាំ២០២០ ទឹកក៏កំពុងជន់ឡើងបន្ថែមទៀត ។
លោកអភិបាលស្រុកអូរជ្រៅ និងស្រុកម៉ាឡៃ ថ្លែងទៀតថា ក្រោយពីទឹកជំនន់បានគំរាមកំហែងប្រជាពលរដ្ឋរស់នៅតាមជាយដែន ឯកឧត្តមឧបនាយករដ្ឋមន្ត្រី កែ គឹមយ៉ាន ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ បានដាក់វិធានការដល់អាជ្ញាធរស្រុក ក្រុងជាប់ជាយដែន និងកងកម្លាំង ត្រូវត្រៀមបម្រុងសម្រាប់អន្តរាគមន៍ជួយប្រជាពលរដ្ឋ បើសិនជាទឹកជំនន់បន្តជន់ឡើង ដើម្បីជម្លៀសរកទីទួលមានសុវត្ថិភាព ៕
ចែករំលែកព័តមាននេះ