ខេត្តប៉ៃលិន ៖ បន្ទាប់ពីជំនន់ទឹកភ្លៀងបានបង្កឱ្យលិចលង់ដល់ភូមិជាច្រើន នៅឃុំស្ទឹងត្រង់ ស្រុកសាលាក្រៅ ខេត្តប៉ៃលិន ហើយអាជ្ញាធរខេត្តបានដឹកនាំក្រុមការងារយុវជន ស.ស.យ.ក. ខេត្ត ចុះត្រួតពិនិត្យ…
ខេត្តប៉ៃលិន ៖ បន្ទាប់ពីជំនន់ទឹកភ្លៀងបានបង្កឱ្យលិចលង់ដល់ភូមិជាច្រើន នៅឃុំស្ទឹងត្រង់ ស្រុកសាលាក្រៅ ខេត្តប៉ៃលិន ហើយអាជ្ញាធរខេត្តបានដឹកនាំក្រុមការងារយុវជន ស.ស.យ.ក. ខេត្ត ចុះត្រួតពិនិត្យ និងត្រៀមលក្ខណៈជួយសង្គ្រោះបន្ទាន់ ។
ការចុះត្រួតពិនិត្យជំនន់ទឹកភ្លៀងជន់លិចភូមិខាងលើនេះបានធ្វើឡើងកាលពីព្រឹកថ្ងៃទី២១ ខែកញ្ញា ឆ្នាំ២០២០ នៅភូមិចំនួន៥ ស្ថិតក្នុងឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
លោក ហុក សុផល អភិបាលរងខេត្ត បានរៀបរាប់ឱ្យដឹងថា ក្រោយពីមានភ្លៀងធ្លាក់ជាប់ៗគ្នាប៉ុន្មានថ្ងៃមុន រហូតមកដល់ថ្ងៃទី២១ ខែកញ្ញានេះ បង្កទៅជាជំនន់លិចផ្ទះសម្បែងប្រជាពលរដ្ឋអស់ចំនួន៥ភូមិ ។ លោកបានបន្តថា ភូមិដែលទទួលរងការលិចលង់មានដូចជា ១-ភូមិទំនប់ លិចផ្ទះចំនួន៤ខ្នងផ្ទះ ២-ភូមិកូនដំរីចំនួន១៣ខ្នងផ្ទះ ៣-ភូមិផ្ទះស្បូវចំនួន៣៤ខ្នងផ្ទះ ៤-ភូមិព្រៃសន្ទះចំនួន២១ខ្នងផ្ទះ និង៥-ភូមិអូរដូនតាលើ លិចអស់ចំនួន៩ខ្នង ស្ថិតក្នុងឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
លោកបានបញ្ជាក់ថា រហូតមកដល់រសៀលថ្ងៃដដែលនេះ ទឹកជំនន់មិនទាន់មានការស្រកចុះនៅឡើយទេ ខណៈទឹកភ្លៀងហាក់ដូចជាថយចុះបន្តិច ហើយមនុស្សឬសត្វចិញ្ចឹម ក៍មិនមានការរងគ្រោះបាត់បង់អាយុជីវិតនោះដែរ ។ ចំណែកឯដំណាំដាំដុះរបស់កសិករមិនការខូចខាតអ្វីធ្ងន់ធ្ងរនោះទេ តែបើបន្តលិចលង់រយៈពេលយូរទៀតអាចនឹងមានការខូចខាតអស់ច្រើនផងដែរ ។
លោកអភិបាលរងខេត្តក៍បានផ្តាំផ្ញើដល់ប្រជាពលរដ្ឋទាំអស់ ឱ្យមានការប្រុងប្រយ័ត្នខ្ពស់ចំពោះកុមារតូចៗ ពីបញ្ហាទឹកដែលកំពុងតែជន់ខ្លាំង ព្រមទាំងចេះការពារខ្លួនមិនឱ្យឆ្លងជម្ងឺដង្កាត់ ជាពិសេសត្រូវរួមគ្នាទប់ស្កាត់ជម្ងឺកូវីដ១៩ ដោយលាងដៃនឹងសាប៊ូ ឬទឹកអាល់កុលឱ្យបានញឹកញាប់ផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ