រាជធានីភ្នំពេញ ៖ ខណៈមហាជនជាច្រើនរួមទាំងមន្ត្រីរាជការស្ត្រីជាន់ខ្ពស់ផង ក៏មានប្រតិកម្មជុំវិញរឿងរ៉ាវអំពើហិង្សាលើស្ត្រីវ័យក្មេងស្រស់ស្អាតមួយរូប នៅសង្កាត់ភ្នំពេញថ្មី រហូតឈានដល់ការឃាត់ខ្លួនជនដៃដល់ផងនោះ ស្រាប់តែនារីរូបស្រស់ដែលជាជនរងគ្រោះក៏បានបង្ហោះសារបង្កប់អត្ថន័យយ៉ាងជ្រាលជ្រៅថា មិនអាចលើកលែងបានចំពោះបុរសមួយរូបដែលវាយដំរាងកាយនាងយ៉ាងដូច្នេះដែរ ។
នារីរងគ្រោះដែលមានឈ្មោះ ថា គ.ឡ បានបង្ហោះសារលើហ្វេសប៊ុករបស់នាងថា «បងធ្លាប់សន្យា ថាឈប់វៃអូនបងសន្យាថា មើលថែអូន បងធ្វើបានអត់បាន អូនសុំទោស សង្ឃឹមថា បងនឹងកែខ្លួន Brös Rith » ។ បើទោះបីជានាងមិនបានបញ្ជាក់លម្អិតថា នាងនឹងអនុគ្រោះដល់ជនដៃដល់ ឬក៏យ៉ាងណានោះទេ តែអត្ថន័យរបស់នាងហាក់បញ្ជាក់ថា នាងចង់ឲ្យច្បាប់ធ្វើការលើករណីនេះ និងបង្ហាញនូវសុទិដ្ឋិនិយមថា បុរសជាជនដៃដល់នឹងកែប្រែខ្លួន ។
សូមរម្លឹកថា សមត្ថកិច្ចប៉ុស្តិ៍នគរបាលរដ្ឋបាលភ្នំពេញថ្មី នៅថ្ងៃទី២០ ខែកញ្ញា ឆ្នាំ២០២០ វេលាម៉ោង០៦និង០០នាទី បានធ្វើការឃាត់ខ្លួនជនសង្ស័យ ០១នាក់ ករណីហិង្សាដោយចេតនា(ប្រើដៃវាយឲ្យរបួស) នៅចំណុចក្នុងបន្ទប់ជួលលេខ៤០១ ជាន់ទី៤ ផ្លូ១៩៧៦ ភូមិពោងពាយ សង្កាត់ភ្នំពេញថ្មី ខណ្ឌសែនសុខ បង្កដោយជនសង្ស័យ ០១នាក់ កាលពីថ្ងៃទី២០-០៩-២០២០វេលាម៉ោង ០១ និង៣០នាទីរំលងអធ្រាត្រ ។
សមត្ថកិច្ចបានឲ្យដឹងថា ជនសង្ស័យឈ្មោះ ប៉ា សុវណ្ណារិទ្ធ អាយុ២០ឆ្នាំ ជនជាតិខ្មែរ មុខរបរអ្នកដឹកអីវ៉ាន់ ស្នាក់នៅផ្ទះលេខ៥៦៣ ផ្លូវលំ ភូមិព្រៃជីសាក់ សង្កាត់ចោមចៅ១ ខណ្ឌពោសែនជ័យ (គ្មានសរធាតុញៀន) បានធ្វើសកម្មភាពប្រើដៃវាយភ្នែកជនរងគ្រោះ ឈ្មោះ នួន គឹមឡាង ភេទស្រី អាយុ២៥ឆ្នាំ ជនជាតិខ្មែរ មុខរបរស្នាក់នៅបន្ទប់ជួលលេខ៤០១ជាន់ទី៤ ផ្លូ១៩៧៦ ភូមិពោងពាយ សង្កាត់ភ្នំពេញថ្មី ខណ្ឌសែនសុខ(របួសហើមជាំភ្នែកទាំង២ និងគុំត្រចៀកខាងស្តាំ ។ បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តបន្តតាមនីតិវិធីច្បាប់ ។
ក្រឡេកទៅមើលប្រតិកម្មរបស់មហាជន ដែលក្នុងនោះក៏មានថ្នាក់ដឹកនាំជាស្ត្រីមួយរូបនៅជួរទាហានផងនោះ បានចែករំលែកនូវទស្សនៈជុំវិញរូបថត ជនបង្កដៃជាប់ខ្នោះ ឱបដៃនារីរងគ្រោះ សុំការលើកលែង ។ មតិមហាជន បានបង្ហាញការគាំទ្រដល់សមត្ថកិច្ចក្នុងការអនុវត្តច្បាប់លើជនបង្ក ជាមួយគ្នានោះផងដែរ មានមតិហាជនជាច្រើនបានរិះគន់ផងដែរ ឪពុកម្តាយបង្កើតកូនមកមិនហ៊ានវ៉ៃ សូម្បីតែមួយដៃ តែនេះជនបង្កប្រើហិង្សាយ៉ាងធ្ងន់ដៃលើនារីរងគ្រោះ ៕
ចែករំលែកព័តមាននេះ