រាជធានីភ្នំពេញ ៖ ក្រុមចោរឆក់មានគ្នា៦នាក់ ក្នុងចំណោមបក្ខពួក៧នាក់ ត្រូវបានកម្លាំងនគរបាលខណ្ឌសែនសុខ សហការជាមួយនគរបាលប៉ុស្តិ៍ភ្នំពេញថ្មី ធ្វើការស្រាវជ្រាវហើយឈានទៅឃាត់ខ្លួន បន្ទាប់ពីធ្វើសកម្មភាពឆក់កាបូបយួរពីស្ត្រីម្នាក់បានប្រាក់ប្រមាណ១ពាន់ដុល្លារ ហើយនាំទៅផឹកស៊ីជុំគ្នាអបអរជោគជ័យរបស់ខ្លួនក៏ត្រូវបានខ្ចប់ទាំងអស់តែម្តង ។…
រាជធានីភ្នំពេញ ៖ ក្រុមចោរឆក់មានគ្នា៦នាក់ ក្នុងចំណោមបក្ខពួក៧នាក់ ត្រូវបានកម្លាំងនគរបាលខណ្ឌសែនសុខ សហការជាមួយនគរបាលប៉ុស្តិ៍ភ្នំពេញថ្មី ធ្វើការស្រាវជ្រាវហើយឈានទៅឃាត់ខ្លួន បន្ទាប់ពីធ្វើសកម្មភាពឆក់កាបូបយួរពីស្ត្រីម្នាក់បានប្រាក់ប្រមាណ១ពាន់ដុល្លារ ហើយនាំទៅផឹកស៊ីជុំគ្នាអបអរជោគជ័យរបស់ខ្លួនក៏ត្រូវបានខ្ចប់ទាំងអស់តែម្តង ។
ការឃាត់ខ្លួនក្រុមចោរឆក់នេះបានធ្វើឡើង កាលពីវេលាម៉ោងប្រមាណ២រសៀលថ្ងៃទី២៦ខែសីហា ឆ្នាំ២០២០ នៅលើភ្នំប្រសិទ្ធិ៍ក្នុងសង្កាត់ពញាពន់ ខណ្ឌព្រែកព្នៅ រាជធានីភ្នំពេញដោយមានការសហការពីនគរបាលមូលដ្ឋានផងដែរ ។ ជនសង្ស័យដែលឃាត់ ខ្លួន៖
១-ឈ្មោះស្រេង បាលី អាយុ១៨ឆ្នាំស្នាក់នៅបន្ទប់ជួល ផ្លូវបេតុង ភូមិរោងចក្រ សង្កាត់គោកឃ្លាង ខណ្ឌសែនសុខ ។
២-ឈ្មោះ មាស ចាន់វីរៈ អាយុ២០ឆ្នាំ ស្នាក់នៅផ្ទះសង់ថ្មី ផ្លូវបេតុង ភូមិព្រៃព្រីងខាងត្បូង សង្កាត់ចោមចៅ៣ ខណ្ឌពោធិ៍សែនជ័យ ។
៣-ឈ្មោះ អៀម ពិសិទ្ធ អាយុ១៥ឆ្នាំ ស្នាក់នៅផ្ទះសង់ថ្មី ផ្លូវបេតុង ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។
៤-ឈ្មោះ ថន ប៊ុនឆាយ អាយុ១៧ឆ្នាំ ស្នាក់នៅផ្ទះសង់ថ្មី ផ្លូវបេតុងភូមិត្រពាំងជើងស្រុក សង្កាត់ក្រាំងធ្នង់ ខណ្ឌសែនសុខ ។
៥-ឈ្មោះ វ៉ាត់ ថារ៉ាត់ អាយុ១៧ឆ្នាំ ស្នាក់នៅផ្ទះសង់ថ្មី ផ្លូវបេតុង ភូមិត្រពាំងជើងស្រុក ។
៦-ឈ្មោះ អ៊ុច ម៉េងលី អាយុ១៨ឆ្នាំ ស្នាក់នៅតាមផ្លូវបេតុង ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ។
នគរបាលខណ្ឌសែនសុខបានឱ្យដឹងថា ការឃាត់ខ្លួនជនសង្ស័យ បានធ្វើឡើងបន្ទាប់
ពីជនសង្ស័យ រួមទាំងបក្ខពួកទាំងអស់ចំនួន៧នាក់ជិះម៉ូតូចំនួន៣គ្រឿង បានធ្វើសកម្ម ភាពឆក់កាបូបយួរពីស្ត្រីម្នាក់ឈ្មោះ ហេង ចិន្តា អាយុ៣៧ឆ្នាំ បានមួយថ្ងៃ រួចនាំគ្នាទៅជួបជុំគ្នាផឹកស៊ីនៅមណ្ឌលកម្សាន្តលើភ្នំប្រសិទ្ធិ៍ ។
តាមនគរបាលបានឱ្យដឹងទៀតថា កាលពីវេលាម៉ោង៣និង៥៥នាទីរសៀលថ្ងៃទី២៥ ខែសីហា ឆ្នាំ២០២០ ជនសង្ស័យបានធ្វើសកម្មភាពឆក់នៅចំណុចមុខសាលាអន្តរជាតិវេស្ទើន ផ្លូវ១៩៦៦ ភូមិទំនប់ សង្កាត់ភ្នំពេញថ្មី ខណ្ឌសែនសុខ ។ នៅក្នុងសកម្មភាព ជន សង្ស័យឆក់បានសម្រេចដែលក្នុងកាបូបនោះមានទូរស័ព្ទដៃ ម៉ាកអាយហ្វូន មួយគ្រឿង ប្រាក់អាមេរិកចំនួន១.០០០ដុល្លារ និងឯកសារមួយចំនួន ។
នគរបាលឱ្យដឹងទៀតថា បន្ទាប់ពីមានសកម្មភាពឆក់ នគរបាលព្រហ្មទណ្ឌខណ្ឌសែនសុខ ធ្វើការស្រាវជ្រាវហើយឈានទៅឃាត់ខ្លួនជនសង្ស័យ៦នាក់ ដែលកំពុងតែជួបប្រមូលផ្តុំគ្នាផឹកស៊ី ដោយដកហូតបានម៉ូតូ២គ្រឿង ម៉ាកនិច ពណ៌សលាយទឹកក្រូច ផលិតឆ្នាំ២០២០ ពាក់ផ្លាកលេខភ្នំពេញ 1IH-8261មួយគ្រឿង និងម៉ាក SCOPY ពណ៌ស ផលិតឆ្នាំ២០២០ ពាក់ផ្លាកលេខភ្នំពេញ 1IH-0363 មួយគ្រឿង ។ ជនសង្ស័យចោរឆក់ត្រូវបានសមត្ថកិច្ច ឃាត់ខ្លួននៅអធិការដ្ឋានខណ្ឌសែនសុខ ដើម្បីសាកសួរនិងអនុវត្តតាមនីតិវិធី ។
ក្រុមជនសង្ស័យនេះ មិនមែនត្រឹមតែឆក់លើកនេះទេ តែក៏ធ្លាប់បានប្រព្រឹត្តកន្លងមកច្រើនដងហើយ គឺញ៉ាមនិងជំនាញខាងឆក់យូរមកហើយ ។ មុខរបរនេះហាក់ដូចកាក់កបណាស់ ប៉ុន្តែគ្រោះថ្នាក់ក៏ផុយស្រួយដែរ ៕
ចែករំលែកព័តមាននេះ