រាជធានីភ្នំពេញ ៖ ចាត់ទុកជាព័ត៌មានផ្លូវការមួយថ្មីៗនិងមានប្រយោជន៍សម្រាប់ប្រជាពលរដ្ឋខ្មែរដែលត្រូវការធ្វើដំណើរទៅកាន់ប្រទេសសិង្ហបុរីសម្រាប់ដំណើរធ្វើមុខជំនួញ ឬពិនិត្យសុខភាព ព្រោះការហោះហើរពីរាជធានីភ្នំពេញទៅកាន់ប្រទេសកូននាគមួយនេះនឹងចាប់ផ្តើមនាខែកញ្ញា ឆ្នាំ២០២០នេះហើយ ។
យោងតាមលោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានប្រាប់សារព័ត៌មានកោះសន្តិភាពនៅថ្ងៃទី ១៣ ខែ សីហា ឆ្នាំ២០២០ នេះថា «ការសម្រេចឱ្យមានការហោះហើរទៅប្រទេសសឹង្ហបុរីឡើងវិញនេះ ដោយសារយើងមើលឃើញថា ប្រទេសនេះជាប្រទេសដែលតូច និងការគ្រប់គ្រងស្ថានភាពបានគួរសម បើទោះបីជាប្រទេសនេះមានការឆ្លងថ្មី ប៉ុន្តែយើងឃើញថាការការពារ និងការអនុវត្តនូវវិធី និងវិធានការណ៍សុវត្ថិភាពរបស់ប្រទេសនេះ បានល្អ»។
លោកស្រី ឆាយ ស៊ីវលីន បានបន្តថា «ម្យ៉ាងវិញទៀត ការហោះហើរនេះ អាចដឹកជញ្ជូនពីភ្ញៀវពីប្រទេសផ្សេងៗ ពីព្រោះអីចង់មិនចង់ក៏គាត់នៅមានហោះហើរពីប្រទេសប្រទេសសិង្ហបុរី ទៅប្រទេសផ្សេងៗ គាត់នៅតែបន្តដដែលនឹង គ្រាន់តែគាត់មិនហោះហើរនៅកម្ពុជាកន្លងមក»។
លោកស្រី បានបន្ថែមទៀតថា «ចឹងប្រសិនបើគាត់តភ្ជាប់ពីប្រទេសគាត់មកប្រទេសកម្ពុជាមួយទៀតទៅ យើងនឹងបានទទួលពីប្រទេសផ្សេងៗផងដែរ នូវអ្នកទេសចរ និងអ្នកធ្វើដំណើរផ្សេងៗផងដែរ ចឹងអ្វីដែលយើងរំពឹង គឺរំពឹងពីប្រទេសផ្សេងៗ ដូចជាអូស្ត្រាលី ជាដើម ដែលប្រទេសនេះមិនសូវមានករណីឆ្លងខ្លាំង។ ដូចនេះ យើងនឹងបានចំណូលខ្លះ ពីការហោះហើរនឹងតាមរយៈហោះហើរ ការនាំចូល នូវអ្នកដំណើរនេះឯង»។
ទាក់នឹងព័ត៌មាននេះដែរ យោងតាមលោករដ្ឋលេខាធិការ ក្រសួងទេសចរណ៍កម្ពុជា លោកតុប សុភ័ក ក៏បានមានប្រសាសន៍ថា «ខ្ញុំមិនទាន់បានទទួលព័ត៌មាននេះច្បាស់លាស់នៅឡើយទេ គ្រាន់តែថាកន្លងមក នៅក្នុងដំណាក់កាលកូវីដ១៩ ក្រុមហ៊ុនអាកាសចរណ៍ខ្លះ បានប្រកាសថាហោះហើរពេល ពេលនោះ ថ្ងៃនេះថ្ងៃនោះ ជាក់ស្តែងមិនអាចធ្វើបាន តាមការប្រកាសនោះទេ ដោយសារតែបញ្ហាកូវីដ១៩នេះឯង ចឹងបើទោះបីជាមានការហោះហើរក្តី ក៏បច្ចុប្បន្នក៏យើងមានការរឹតបន្តឹង និងប្រយ័ត្នប្រយែងខ្ពស់ផងដែរ។
លោកតុប សុភ័ក បានបន្ថែមថា «ជាពិសេសទៅទៀត ទាក់ទងទៅនឹងការធ្វើដំណើរទេសចរណ៍ គឺអត់ទាន់មានទេ ដោយសារប្រទេសយើងគឺនៅជាប់បំរាមរឹតបន្តឹងនៅឡើយ ពោលគឺយើងអត់ទាន់មាន ទិដ្ឋការទេសចរណ៍ (tourist visa)។
បច្ចុប្បន្នយើងនៅមានការហោះហើរចូលមកស្រុកយើងហើយមាន ជនបរទេសដែលចូលមកស្រុកយើងនឹង មិនមែនជាទេសចរណ៍ ដែលធ្វើដំណើរកំសាន្តជាសាកលនោះទេ ភាគច្រើនគឺអ្នកដែលទេសចរធុរៈជន ជាអ្នកជំនួញ ដែលគាត់ត្រូវចូលមកមើលក្នុងក្រុមហ៊ុនរបស់គាត់ ក្នុងប្រទេសកម្ពុជាប៉ុណ្ណោះ និងមួយចំនួនទៀតជាអ្នកការទូត និងអង្គការសង្គមស៊ីវិល ឬជាសិស្សនិស្សិតត្រូវត្រឡប់មកស្រុកវិញជាដើម»៕ (កែសម្រួលដោយ ៖ ធីតា)
ចែករំលែកព័តមាននេះ