សៀមរាប ៖ ស្ទឹងសៀមរាបនឹងក្លាយជាតំបន់ទេសចរណ៍សំខាន់នៅក្នុងព្រឹត្តិការណ៍សប្បាយៗ ដែលអាជ្ញាធរខេត្តកំពុងរៀបចំ ដើម្បីស្វាគមន៍អ្នកទេសចរនៅក្នុងឱកាសឈប់សម្រាកច្រើនថ្ងៃ ដែលផ្តើមពីថ្ងៃទី ១៥ ខែសីហា សប្តាហ៍ក្រោយនេះ ។
បើតាមផែនការរបស់អាជ្ញាធរ គឺនឹងសង់ផែមួយនៅលើដងស្ទឹងសៀមរាប នៅត្រង់ព្រះរាជដំណាក់ ។ ផែឈើនេះសម្រាប់ភ្ញៀវទេសចរចុះឡើងជិះទូកទៅទិញទំនិញ និងទិញអាហារដែលអាជ្ញាធររៀបចំឲ្យមានការលក់ដូរនៅលើទឹក ក្នុងស្ទឹងសៀមរាបនេះ ។ បន្ទាប់ពីការជិះទូកទិញចំណីចំណុកពីផ្សារលើទឹកហើយពលរដ្ឋដែលដើរកម្សាន្តអាចយកអាហារទាំងនោះមកទទួលទានតាមដងស្ទឹង ដែលបានរៀបចំកន្លែងអង្គុយយ៉ាងស្រស់ស្អាត ខ្យល់អាកាសត្រជាក់ បែបធម្មជាតិ ។
ពេលនេះ រដ្ឋបាលខេត្តសៀមរាប ដោយមានការសហការជាមួយសហភាពសហព័ន្ធយុវជនកម្ពុជា និងសាខាកាកបាទក្រហមកម្ពុជា បាននឹងកំពុងរៀបចំ តុបតែងលម្អស្ទឹងសៀមរាប ដើម្បីធ្វើឲ្យមានសោភ័ណភាពកាន់តែស្រស់ត្រកាលយ៉ាងមម៉ាញឹក ដើម្បីទទួលស្វាគមន៍ភ្ញៀវទេសចរជាតិ អន្តរជាតិ នៅសប្តាហ៍ក្រោយនេះ ។ ទូកតូចៗ សម្រាប់ដាក់ឲ្យភ្ញៀវទេចរជិះកំពុងរៀបចំលាបពណ៌យ៉ាងស្រស់ស្អាត ។
អាជ្ញាធរអះអាងថា ការរៀបចំលម្អរស្ទឹងនេះដែរ គឺត្រូវរៀបចំយ៉ាងណា ដើម្បីរំលេចនូវសោភ័ណភាពសម្រស់បៃតងនៅតាមដងស្ទឹង និង រុក្ខវិថីនានាក្នុងក្រុង នាពេលរាត្រីឲ្យកាន់ តែមានការទាក់ទាញអារម្មណ៍ភ្ញៀវទេសចរ ។
សូមជម្រាបថា ក្រៅការពីការរៀបចំឲ្យមានការកម្សាន្តតាមដងស្ទឹងផ្សារទឹកនេះ អាជ្ញាធរខេត្តសៀមរាបមានរៀបចំកម្មវិធីជាច្រើនទៀតជា មានទាំងពិធីបែបសាសនា បួងសួងសុំសេចក្តីសុខ កម្មវិធីពិព័រណ៍ បន្លែផ្លែឈើ កសិផល ផលិតផល ក្រុង-ស្រុកទាំង១២ កម្មវិធីប្រកួតម្ហូបអាហារ ពានរង្វាន់មាន់អាំង ឆ្ងាញ់ជាងគេនៅខេត្តសៀមរាប ការបើកឲ្យដំណើរការឡើងវិញ នៅ Pub Street ផាប់ស្ទ្រីត កម្មវិធីជិះកង់ កម្មវិធីកីឡាវាយកូនហ្គោល កម្មវិធីដើរព្រៃ ចង្ក្រានរយភ្នំគូលែនជាដើម ៕
ចែករំលែកព័តមាននេះ