រាជធានីភ្នំពេញ ៖ បុរសម្នាក់ជាអ្នករត់ម៉ូតូកង់បីមួយគ្រឿងនៅម្តុំមាត់ទន្លេ ក្នុងរាជធានីភ្នំពេញ បានប្រើប្រាស់គ្រឿងញៀនរហូតដល់ថ្នាក់បែកថ្នាំ បន្ទាប់មកបានបើកម៉ូតូកង់បីរត់ចេញពីផ្ទះជួលនៅឯក្នុងសង្កាត់ស្ទឹងមានជ័យអស់រយៈ២ទៅ៣ថ្ងៃកន្លងមកហើយ លុះចូលដល់ក្នុងភូមិសាស្ត្រខណ្ឌកំបូលបានទុកម៉ូតូកង់បីមួយគ្រឿងនោះចោល រួចរត់គេចខ្លួន ដោយស្រែកថាមាននគរបាលតាមចាប់ខ្លួន ខណៈនោះប្រជាពលរដ្ឋបានរាយការណ៍ជូននគរបាលឱ្យតាមរកដែរ តែរកមិនឃើញសោះ ។
រហូតមកដល់វេលាម៉ោង៩និង៣០នាទីព្រឹកថ្ងៃទី៦ ខែសីហា ឆ្នាំ២០២០ ស្រាប់តែប្រទះឃើញបាត់បង់ជីវិតក្រោមដើមអំពិលទឹកលើដីវាលមួយកន្លែង ស្ថិតក្នុងភូមិស្ងួនពេជ្រ សង្កាត់កន្ទោក ខណ្ឌកំបូល រាជធានីភ្នំពេញ បង្កការភ្ញាក់ផ្អើលទាំងព្រឹក ។
បុរសរងគ្រោះឈ្មោះខុន សុភ័ក្ត្រ អាយុ២៥ឆ្នាំ មុខបររត់ម៉ូតូកង់បីនៅម្ដុំមាត់ទន្លេ ក្នុងរាជធានីភ្នំពេញ មានទីលំនៅក្នុងភូមិពាម ឃុំរកាកោង ស្រុកមុខកំពូល ខេត្តកណ្ដាល និងស្នាក់នៅផ្ទះជួលនៅម្ដុំផ្លូវ៦០ម៉ែត្រក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
តាមការពិនិត្យកោសល្យវិច័យរបស់នគរបាលការិយាល័យបច្ចេកទេសវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ និងគ្រូពេទ្យពិនិត្យសាកសពបានបញ្ជាក់ថា ជនរងគ្រោះបានបាត់បង់ជីវិតដោយសារថប់ដង្ហើម ដែលជាការបញ្ចប់ជីវិតដោយយកថង់ប្លាស្ទិករឹត.កខ្លួនឯង ព្រោះតែញៀនថ្នាំរហូតដល់ម្រិតបែកថ្នាំទៅហើយ។
តាមប្រភពពីប្រជាពលរដ្ឋបានឲ្យដឹងថា កាលពីវេលាម៉ោង៧ព្រឹកថ្ងៃទី៥ ខែសីហា ឆ្នាំ២០២០ បុរសខាងលើបានបើកបរម៉ូតូកង់បី១គ្រឿងទៅឈប់នៅជិតកន្លែងកើតហេតុ រួចរត់យ៉ាងស្លន់ស្លោរស្រែកថានគរបាលដេញតាមចាប់ខ្លួនគាត់ ខណៈនោះអ្នកភូមិស្មានថាជាចោរបានក៏បានរាយការណ៍ឲ្យនគរបាលចុះទៅអន្តរាគមន៍តាមរកដែរ តែរកមិនឃើញសោះ ហើយនគរបាលបាននាំយកម៉ូតូកង់បីទៅរក្សាទុក ។
តាមប្រភពដដែលបានបន្តថា លុះក្រោយមក នៅវេលាល្ងាចថ្ងៃដដែលនោះ មានបុរសអ្នកលក់នំបុ័ងម្នាក់បានប្រទះឃើញបុរសរងគ្រោះដើរផងអង្គុយផង ហើយក្នុងដៃមានកាន់ថង់ប្លាស្ទិករឹតកខ្លួនឯងលេង ប៉ុន្តែអ្នកលក់នំបុ័ងខាងលើមិនបានចាប់អារម្មណ៍ឬយកចិត្តទុកដាក់នោះទេ ព្រោះស្មានថាជាមនុស្សវិកលចរិត។
តាមប្រភពដដែលបានបន្តទៀតថា លុះដល់វេលាព្រឹកថ្ងៃទី៦ ខែសីហា ស្រាប់តែប្រទះឃើញបុរសរងគ្រោះបាត់បង់ជីវិតនៅក្រោមដើមអំពិលទឹកនៅលើដីវាលមួយកន្លែង ដោយមានថង់ប្លាស្ទិករុំកថែមទៀតផង បន្ទាប់មកក៏បានរាយការណ៍ជូននគរបាលប៉ុស្តិ៍កន្ទោកនិងនគរបាលខណ្ឌកំបូលឲ្យចុះពិនិត្យមើលតាមជំនាញ ។ ចំណែកខាងនគរបាលការិយាល័យបច្ចេកទេសវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ និងគ្រូពេទ្យពិនិត្យសពក៏បានទៅធ្វើកោសល្យវិច័យផងដែរ។
តាមប្រភពពីក្រុមគ្រួសារជនរងគ្រោះបានប្រាប់នគរបាលថា បុរសរងគ្រោះគឺជាអ្នករត់ម៉ូតូកង់បីនៅឯម្តុំមាត់ទន្លេក្នុងរាជធានីភ្នំពេញ ហើយបានសេពគប់មិត្តភក្តិប្រើប្រាស់គ្រឿងញៀនរហូតដល់ញៀនកម្រិតបែកថ្នាំ ។ មិនតែប៉ុណ្ណោះដោយសារតែអំណាចថ្នាំញៀនបានធ្វើឲ្យមិត្តភក្ដិរបស់គាត់រត់ចោលម៉ូតូកង់បែបនេះដែរ ដោយរវើរវាយថាមាននគរបាលដេញតាមចាប់ខ្លួន ហើយរហូតពេលនេះមិត្តភក្ដិនោះអត់ទាន់ចូលផ្ទះនៅឡើយ។ដោយឡែកបុរសរងគ្រោះក៏បានបើកម៉ូតូកង់បីចេញបាត់ពីផ្ទះរយៈពេល២ទៅ៣ថ្ងៃកន្លងមកហើយ រហូតដល់ឥឡូវក៏បានរត់ចោលម៉ូតូកង់បី និងឈានដល់ការបញ្ចប់ជីវិតដោយខ្លួនឯងបែបនេះទៀត។
ក្រោយពីការពិនិត្យកោសល្យវិច័យរួចមក ជាលទ្ធផលគឺបុរសរងគ្រោះបានបាត់បង់ជីវិតដោយសារថប់ដង្ហើម ដែលជាការបញ្ចប់ជីវិតខ្លួនឯងដោយរឹតក ព្រោះតែបែកថ្នាំ ហើយសពត្រូវបានក្រុមគ្រួសារនាំយកទៅធ្វើបុណ្យតាមប្រពៃណីនៅឯខេត្តកណ្ដាល៕ (កែសម្រួលដោយ ៖ ធីតា)
ចែករំលែកព័តមាននេះ