ខេត្តមណ្ឌលគិរី ៖ អភិបាលរងស្រុកកែវសីមាមួយរូប ដែលសកម្មក្នុងប្រតិបត្តិការបង្ក្រាបក្រុមជួញដូរឈើខុសច្បាប់ បែរជាត្រូវប្រជាពលរដ្ឋមួយគ្រួសារធ្វើពាក្យបណ្តឹងសុំដកអភិបាលរងនោះ ដោយអះអាងថា មានប្រជាពលរដ្ឋប្រមាណ ជាង២០០នាក់ ស្ម័គ្រចិត្តផ្តិតមេដៃ ព្រោះតែលោកអភិបាលរងស្រុកធ្វើទុក្ខមុបុកម្នេញមិនឲ្យប្រជាពលរដ្ឋ…
ខេត្តមណ្ឌលគិរី ៖ អភិបាលរងស្រុកកែវសីមាមួយរូប ដែលសកម្មក្នុងប្រតិបត្តិការបង្ក្រាបក្រុមជួញដូរឈើខុសច្បាប់ បែរជាត្រូវប្រជាពលរដ្ឋមួយគ្រួសារធ្វើពាក្យបណ្តឹងសុំដកអភិបាលរងនោះ ដោយអះអាងថា មានប្រជាពលរដ្ឋប្រមាណ ជាង២០០នាក់ ស្ម័គ្រចិត្តផ្តិតមេដៃ ព្រោះតែលោកអភិបាលរងស្រុកធ្វើទុក្ខមុបុកម្នេញមិនឲ្យប្រជាពលរដ្ឋ រកស៊ីដឹកឈើបាន។ យោងតាមពាក្យបណ្តឹងដែលកោះសន្តិភាពទទួលបាននាព្រឹកថ្ងៃទី០២ សីហា ២០២០ មានខ្លឹមសារថា នាងខ្ញុំឈ្មោះ ឈាង តៃស្រ៊ីន ភេទស្រី អាយុ៥៦ឆ្នាំ សព្វថ្ងៃរស់នៅភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី នាងខ្ញុំ និងប្រជាពលរដ្ឋរស់នៅស្រុកកែវសីមា កើតទុក្ខមិនសុខចិត្ត សូមដាក់ពាក្យប្ដឹង ពីឈ្មោះ ហឿន សុខណា ភេទប្រុស ជាអភិបាលរងស្រុកកែវសីមា។
ដោយរូបនេះមានបំណងប៉ុនប៉ងធ្វើបាប ប្រជាពលរដ្ឋក្នុងស្រុកកែវសីមា ដែលមានចេតនាប្រើអំពើហិង្សាទៅលើប្រជាពលរដ្ឋដែលជាកូនចៅក្នុងស្រុករបស់ខ្លួន ក្នុងស្រុកកែវសីមា។ ពាក្យបណ្តឹងដដែលបន្តថា លោក ហឿន សុខណា នេះគាត់អាងអំណាចធំបានយកកាំភ្លើងខ្លី ភ្ជង់គំរាមបាញ់សម្លាប់ប្រជាពលរដ្ឋស្លូតត្រង់។ ហើយគាត់បានយកឡានទៅដេញបំបុក និងប៉ុនប៉ងធ្វើឃាត ប្រជាពលរដ្ឋដែលគ្នាដឹកចំនៀរឈើបន្តិចបន្តួច យកទៅលក់តាមគេតាមឯងគ្រាន់បានកម្រៃចិញ្ចឹមគ្រួសារ។
រូបនាងខ្ញុំ ឈាង តៃស្រ៊ីន និងប្រជាពលរដ្ឋក្នុងស្រុកកែវសីមា សំណូមពរគ្រប់មន្ត្រីមេត្តាដកឈ្មោះ ហឿន សុខណា ដែលជាមន្ត្រីឃោរឃៅគ្មានសីលធម៌ ប្រើអំពើហិង្សាទៅលើប្រជាពលរដ្ឋ។ ម្យ៉ាងទៀតឈ្មោះ ហឿន សុខណា នេះមើលឃើញតែអ្នកដឹកចំនៀរឈើតិចបន្តួច បើឈ្មួញមានឡានធំដឹកយកទៅលក់ឲ្យយួន លោក ហឿន សុខណា មិនដែលឃើញទេ ពីព្រោះមន្ត្រីរូបនេះស៊ីសំណូកសូកប៉ាន់ពីឈ្មួញធំៗច្រើនណាស់ ។ អាស្រ័យដូចខាងលើនាងខ្ញុំ ឈាង តៃស្រ៊ីន និងប្រជាពលរដ្ឋក្នុងស្រុកកែវសីមាទាំងមូល ដាក់ពាក្យបណ្ដឹងទៅតុលាការ ដើម្បីជួយរកយុត្តិធម៌ ដល់នាងខ្ញុំ និងប្រជាពលរដ្ឋផងចុះ។
ឆ្លើយតបករណីខាងលើ លោក នួន សារ៉ន អភិបាលស្រុកកែវសីមា បានឲ្យដឹងនៅព្រឹកថ្ងៃទី០២ សីហា ថា នេះជាសិទ្ធរបស់បងប្អូនប្រជាពលរដ្ឋ បើពួកគាត់មានការមិនសប្បាយចិត្ត គាត់អាចប្តឹងបាន។ តែរហូតមកដល់ពេលនេះរដ្ឋបាលស្រុកនៅមិនទាន់ទទួលពាក្យបណ្តឹងនៅឡើយទេ។ ចំពោះករណីនេះលោកអភិបាលស្រុកលើកឡើងថា សកម្មភាពកន្លងមកលោក ហឿន សុខណា បានបំពេញការងារ ជាមួយអ្នកពាក់ព័ន្ធដើម្បីសហការទប់ស្កាត់បទល្មើសព្រៃឈើ ខណៈប្រតិបត្តិការខ្លះសមត្ថកិច្ចត្រូវប្រើវិធានការក្តៅ ព្រោះតែជនល្មើសមានចរិតកាចសាហាវ។ ប៉ុន្តែមិនមែនធ្វើបាបប្រជាពលរដ្ឋស្លូតត្រង់នោះទេ។
លោក នួន សារ៉ន ក៏បានបញ្ជាក់ដែលថា ចំពោះស្នាមមេដៃដែលប្រជាពលរដ្ឋបានផ្តឹតធ្វើពាក្យបណ្តឹងនោះ សមត្ថកិច្ចកំពុងស្រាវជ្រាវមើលថា តើពិតជាត្រឹមត្រូវមែន ឬស្នាមមេដៃក្លែងក្លាយ។ ដ្បិតរឿងនេះមន្ត្រីជំនាញ បានបញ្ជូនសំណុំរឿងទៅស្ថាប័នអយ្យការរួចរាល់ហើយ តែមិនទាន់ឃើញ អ្នកពាក់ព័ន្ធត្រូវបានហៅទៅបំភ្លឺបែរជា លេចឮថា គេប្តឹងមន្ត្រីទៅវិញ។ ដោយឡែករដ្ឋបាលស្រុកកែវសីមា នៅថ្ងៃទី២៣ កក្កដា ២០២០ បានចេញសេចក្តីប្រកាសព័ត៌មានមួយ ក្រោយមហាជន មានការភាន់ច្រឡំទៅនឹងប្រតិបត្តិការបង្ក្រាប បទល្មើសព្រៃឈើរបស់លេខាធិការដ្ឋាននៃ គណៈបញ្ជាការឯកភាពស្រុកកែវសីមាថាជាការបើកបំបុក ឡានរបស់ក្រុមឈ្មួញដើម្បីចាប់។
ក្នុងសេចក្តីប្រកាសព័ត៌មានបានបង្ហាញថា នៅវេលាម៉ោង៤ និង៤៥នាទីទៀបភ្លឺ ថ្ងៃទី២២ ខែកក្កដា ឆ្នាំ២០២០ ក្រុមការងារលេខាធិការដ្ឋាន នៃគណៈបញ្ជាការឯកភាពស្រុក ដឹកនាំដោយលោក ហឿន សុខណា អភិបាលរងស្រុក និងជាប្រធានក្រុមការងារលេខាធិការដ្ឋាន បានធ្វើការចាប់ឃាត់រថយន្តកាមរីឆ្លាម ពណ៌ទឹកប្រាក់ ១គ្រឿងគ្មា នស្លាកលេខ ដែលដឹកឈើប្រភេទលេខ១ សុក្រំចំនួន៣ដុំ ក្រោមការដឹកនាំបញ្ជាផ្ទាល់ ដោយលោក អៀងសុគន្ធ ព្រះរាជអជ្ញារងនៃអយ្យការអមសាលាដំបូងខេត្តមណ្ឌលគិរី។
ក្នុងសកម្មភាពនោះ ក៏បានធ្វើការឆែកឆេរផ្ទះជនល្មើស ដោយបានរកឃើញគំនរឈើប្រភេទលេខ១ សុក្រំ និងគគីរ ដែលក្រុមជនល្មើសបានដឹកយកមកទុក ចំនួន៣៤ដុំ ក្នុងនោះមានសុក្រំចំនួន២៨ដុំ និងគគីរចំនួន៦ដុំ នៅចំណុច បរិវេណផ្ទះរបស់ឈ្មោះ ណាង តៃស្រ៊ាន ស្ថិតនៅក្នុងភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី។ ក្នុងសេចក្តីប្រកាសព័ត៌មាន បានបញ្ជាក់ប្រាប់ថា វត្ថុតាងដែលរឹបអូសរួមមាន៖ រថយន្តឆ្លាម ពណ៌ទឹកប្រាក់ ចង្កូតឆ្វេងគ្មានស្លាកលេខ ១គ្រឿង ឈើអារបួនជ្រុង ចំនួន៣៤ដុំ ដែលឈើទាំងនោះ ត្រូវប្រគល់ជូនផ្នែករដ្ឋបាល ព្រៃឈើជាអ្នកគ្រប់គ្រង។
ការប្រកាសព័ត៌មាននោះ បានបន្តទៀតថា ករណីខាងលើមានការភាន់ច្រឡំ ដល់មហាជនថា ជាករណីគ្រោះថ្នាក់ចរាចរណ៍ ដោយបានធ្វើការចោទប្រកាន់ ថាក្រុមការងារបង្ក្រាបបទល្មើស របស់លេខាធិការដ្ឋាន គណៈបញ្ជាការឯកភាពស្រុក បានបើកបំបុករថយន្តដឹកជញ្ជូនឈើខុសច្បាប់ ពីក្រោយ ធ្វើឲ្យអ្នកបើកបរមានរបួសធ្ងន់ ត្រូវបានបញ្ជូនទៅមន្ទីរពេទ្យនៅភ្នំពេញ។ ជាក់ស្ដែង ករណីខាងលើនេះ ជាករណីបង្ក្រាបទប់ស្កាត់បទល្មើសព្រៃឈើ ដោយក្រុមជនល្មើសដឹកឈើខុសច្បាប់ បានបើករថយន្តកាមរីឆ្លាម ពណ៌ទឹកប្រាក់ បំបុកសមត្ថកិច្ចចម្រុះបម្រុងគេចខ្លួន តែត្រូវបានជាប់ជាមួយនឹងកាងរថយន្តមន្ត្រី កងកម្លាំងសមត្ថកិច្ចចម្រុះទៅមុខពុំរួច នៅចំណុចកើតហេតុតែម្ដង។ ក្រុមគ្រួសារជនល្មើស បានចេញមកជួយ និងបានធ្វើសកម្មភាពប្រើហិង្សា និងជេរបញ្ចោរក្រុមសមត្ថកិច្ចគ្រប់បែបយ៉ាង ព្រមទាំងបានរារាំងសមត្ថកិច្ចជំនាញ ពុំឲ្យរឹបអូសវត្ថុតាង និងជនបង្កថែមទៀតផង៕ ដោយ ៖ សាយ ករុណា
ចែករំលែកព័តមាននេះ