ខេត្តកំពង់ចាម ៖ «មនុស្សម្នាក់ត្រូវដាំដើមឈើមួយដើម» នេះជាប្រសាសន៍លើកឡើងរបស់លោកអ៊ុន ចាន់ដា អភិបាលខេត្តថ្លែងនៅក្នុងពិធីដាំដើមក្ងោកផ្កាពណ៌លឿងចំនួន៥០០ដើម នាព្រឹកថ្ងៃទី២ សីហា ២០២០ សម្រាប់លម្អតាមដងផ្លូវបេតុងជុំវិញប្រាសាទនគរបាជ័យ…
ខេត្តកំពង់ចាម ៖ «មនុស្សម្នាក់ត្រូវដាំដើមឈើមួយដើម» នេះជាប្រសាសន៍លើកឡើងរបស់លោកអ៊ុន ចាន់ដា អភិបាលខេត្តថ្លែងនៅក្នុងពិធីដាំដើមក្ងោកផ្កាពណ៌លឿងចំនួន៥០០ដើម នាព្រឹកថ្ងៃទី២ សីហា ២០២០ សម្រាប់លម្អតាមដងផ្លូវបេតុងជុំវិញប្រាសាទនគរបាជ័យ ដែលមានទីតាំងស្ថិតនៅឃុំអំពិល ស្រុកកំពង់សៀម ប្រយោជន៍សម្រាប់ផ្ដល់ម្លប់ និងចេញផ្កាពណ៌លឿងយ៉ាងស្រស់ស្អាត ដើម្បីទាក់ទាញដល់ភ្ញៀវទេសចរណ៍មកលេងកំសាន្ដនៅតំបន់រមណីយដ្ឋានវប្បធម៌ប្រវត្តិសាស្ត្រនេះកាន់តែច្រើនឡើង។
លោកស៊ាន សុគុណ ប្រធានមន្ទីរទេសចរណ៍ខេត្តមានប្រសាសន៍លើកឡើងថា ក្រោមការយកចិត្តទុកដាក់ពីសំណាក់លោកអភិបាលខេត្ត ក៏ដូចជាស្ថាប័នពាក់ព័ន្ធ ដោយបានរួមគ្នាដាំដើមក្ងោក សម្រាប់លម្អនៅផ្លូវបេតុងជុំវិញប្រាសាទនគរបាជ័យ ។ នាពេលខាងមុខផ្កាក្ងោករីកស្រស់នោះនឹងបានបង្ហាញពីសោភ័ណភាពនៅតំបន់មួយនេះឲ្យកាន់តែមានភាពស្រស់បំព្រង ព្រមទាំងផ្ដល់ម្លប់បន្ថែមទៀត។
លោកប្រធានមន្ទីរទេសចរណ៍ខេត្តមានប្រសាសន៍បន្តថា នៅក្នុងឱកាសថ្ងៃឈប់សម្រាកចំនួន៥ថ្ងៃចាប់ពីថ្ងៃទី១៧ សីហា រួមទាំងថ្ងៃសៅរ៍អាទិត្យនឹងកើនដល់៩ថ្ងៃ ។ ដោយនៅក្នុងខេត្តកំពង់ចាមមានរមណីយដ្ឋានទេសចរណ៍ជាច្រើនកន្លែងក្នុងនោះរួមមាន ទឹកឆា, ភ្នំប្រុសភ្នំស្រី, ប្រាសាទនគរបាជ័យ, ឆ្នេរខ្សាច់កោះប៉ែន ភ្នំហាន់ជ័យ និងអាចទាក់ទាញមនុស្សមកកម្សាន្តលេងពីគ្រប់ទិសទីកាន់តែច្រើន ក្រោមការណែនាំពីសំណាក់អភិបាលខេត្ត ក៏ដូចជាមន្ទីរសុខាភិបាលខេត្ត គឺឲ្យមានការរៀបចំអាល់កុល ឬជែល និងឧបករណ៍វាស់កំដៅដើម្បីបង្ការកុំអោយឆ្លងជំងឺ covid-19 ព្រមទាំងមានកន្លែងសង្គ្រោះទៀតផង។
លោកអ៊ុន ចាន់ដា អភិបាលខេត្តមានប្រសាសន៍ឲ្យដឹងថា ដើមក្ងោកដែលត្រូវបានយកមកដាំលំអតាមដងផ្លូវបេតុង ជុំវិញប្រាសាទនគរបាលជ័យ គឺនាំចូលមកពីបរទេសក្រោមការជួយឧបត្ថម្ភពីសំណាក់លោកសាយ សំអាល់ រដ្ឋមន្ត្រីក្រសួងបរិស្ថាន ដែលជាប្រភេទដើមក្ងោកផ្កាពណ៌លឿង ។ ពេលដែលផ្កាចេញមកក្នុងពេលខាងមុខ អ្នកដែលមកកម្សាន្តលេងនៅតំបន់ទេសចរណ៍នេះថតរូបភាពបង្ហោះតាមបណ្ដាញសង្គមនោះ នឹងធ្វើឲ្យភ្ញៀវមកលេងកាន់តែច្រើនឡើងនៅក្នុងខេត្តកំពង់ចាម។
លោកអ៊ុន ចាន់ដា អភិបាលខេត្តមានប្រសាសន៍បន្តថា តាមរយៈការដាំដើមក្ងោករួមនឹងដើមឈើប្រណីតជាច្រើនប្រភេទទៀត ទាំងនៅខាងក្រៅទាំងនៅខាងក្នុងនិងជួយឲ្យប្រែក្លាយតំបន់វប្បធម៌ប្រវត្តិសាស្ត្រនេះ ធ្វើយ៉ាងណាឲ្យប្រជាពលរដ្ឋ ចេះស្រឡាញ់ធនធានធម្មជាតិព្រៃឈើ ព្រោះថា មនុស្សមានតម្រូវការឈើគ្រប់ពេលវេលា។ រដ្ឋបាលខេត្តនឹងធ្វើការបំផុសឲ្យប្រជាពលរដ្ឋគ្រប់ស្រទាប់វណ្ណៈ ត្រូវរួមគ្នាដាំដើមឈើឲ្យបានច្រើនឡើងបន្ថែមទៀត ព្រោះវាផ្ដល់អត្ថប្រយោជន៍ជាច្រើនក្នុងនោះរួមមានទប់ទល់បម្រែបម្រួល អាកាសធាតុ ការពារគ្រោះរាំងស្ងួត បង្កើតគម្របបៃតង ទាក់ទាញទឹកភ្លៀង។
ជាក់ស្ដែងកន្លែងដែលកំពុងប្រារព្ធពិធីនេះក្រោមការយកចិត្តទុកដាក់ពីសំណាកអភិបាលខេត្តជំនាន់មុន បានដាំដើមឈើប្រណិតដែលកំពុងតែផ្ដល់ម្លប់ត្រជាក់ ធ្វើឲ្យអ្នកចូលរួមរាប់រយនាក់មានអារម្មណ៍ស្រស់ថ្លា។ ជាមួយនោះអាជ្ញាធរខេត្តសំណូមពរឲ្យប្រជាពលរដ្ឋ ដែលរស់នៅតំបន់ជុំវិញប្រាសាទក្នុងមួយគ្រួសារ ត្រូវថែរក្សាដើមក្ងោក១ដើមធ្វើយ៉ាងណាពូនជ្រុំស្រោចទឹក លូតលាស់ឲ្យបានល្អសម្រាប់ផ្ដល់ជាម្លប់នឹងអាចឱ្យយើងលក់ដូរនៅក្រោមដើមឈើបង្កើនប្រាក់ចំណូល បានមួយកម្រិតបន្ថែមទៀតដល់ក្រុមគ្រួសារ។
សម្រាប់គោលដៅក្នុងពេលខាងមុខក៏ស្នើសុំឲ្យប្រជាពលរដ្ឋ ជួយឧបត្ថម្ភអំពូលសូឡាក្នុងមួយគ្រួសារមួយគ្រឿង ដើម្បីដាក់បំភ្លឺតាមដងផ្លូវបេតុងជុំវិញប្រាសាទនគរបាជ័យ ដែលពេលនោះតំបន់រមណីយដ្ឋានប្រវត្តិសាស្ត្រនេះ នឹងកាន់តែមានភាពស្រស់បំព្រងបន្ថែមទៀត ហើយក៏ក្លាយទៅជាគោលដៅទេសចរណ៍របស់ភ្ញៀវជាតិនិងអន្តរជាតិ មកកំសាន្តលេងគយគន់មើលផ្កាក្ងោករីកស្រស់បំព្រង៕(ចាន់ ថេត)
ចែករំលែកព័តមាននេះ