រាជធានីភ្នំពេញ ៖ ព្រឹត្តិការណ៍បាល់ទាត់ពានរង្វាន់អាស៊ីអាគ្នេយ៍-AFF Suzuki Cup ដែលតែងតែធ្វើនៅរៀងរាល់ឆ្នាំនោះ សម្រាប់ឆ្នាំ២០២០នេះត្រូវបានលើកពេលទៅធ្វើនៅឆ្នាំក្រោយដោយសារតែការរាតត្បាតនៃមេរោគកូវីដ-១៩។
ការប្រកាសលើកពេលព្រឹត្តិការណ៍បាល់ទាត់ប្រចាំតំបន់អាស៊ាននេះ ធ្វើឡើងកាលពីរសៀល
ថ្ងៃទី២៧ កក្កដា ក្នុងកិច្ចប្រជុំតាមអនឡាញនៃគណៈកម្មាធិការគ្រប់គ្រងគ្រោះអាសន្នរបស់សហព័ន្ធកីឡាបាល់ទាត់អាស៊ីអាគ្នេយ៍(AFF)ក្រោមអធិបតីភាពលោកឧត្តមសេនីយ៍ខៀវ សាម៉េត ប្រធានសហព័ន្ធ AFF ។
កិច្ចប្រជុំនេះធ្វើឡើងដើម្បីវាយតម្លៃផលប៉ះពាល់និងហានិភ័យទូទៅពីការរីករាលដាលនៃជំងឺកូវីដ-១៩ មុនពេលព្រឹត្តិការណ៍ដែលមិនអាចទាយទុកជាមុនបាន ។ បន្ទាប់ពីពិភាក្សាគ្នាក្នុងគោលបំណងធានាសុវត្ថិភាពព្រឹត្តិការណ៍នេះ សមាជិកបានស្នើពន្យារពេលការប្រកួតបាល់ទាត់ពានរង្វាន់ AFF Suzuki Cup ឆ្នាំ២០២០ ទៅធ្វើនៅឆ្នាំ២០២១ ។
ទោះបីយ៉ាងណា មានការបារម្ភថា ឆ្នាំ២០២១គឺជាឆ្នាំមានការលំបាកខ្លាំងដោយសារមានកាលវិភាគប្រកួតអន្តរជាតិយ៉ាងក្រាស់ក្រែល ចាប់ពីកម្រិតទ្វីបរហូតដល់អូឡាំពិក ។ ដូច្នេះការគណនាពេលវេលាដើម្បីរៀបចំព្រឹត្តិការណ៍ AFF Suzuki Cupត្រូវគិតគូរឱ្យបានហ្មត់ចត់នៅក្នុងកិច្ចប្រជុំបន្ទាប់របស់គណៈកម្មាធិការគ្រប់គ្រងគ្រោះអាសន្ន ដែលនឹងរៀបចំធ្វើនៅថ្ងៃទី៣០ កក្កដា ។ តាមគម្រោង ការចាប់ពូលសម្រាប់ព្រឹត្តិការណ៍ AFF Suzuki Cup 2020 នឹងធ្វើឡើងនៅខែសីហា ខាងមុខនេះ នៅប្រទេសវៀតណាម ។
សូមបញ្ជាក់ថា ពានរង្វាន់ជើងឯកប្រចាំតំបន់អាស៊ីអាគ្នេយ៍ (AFF Suzuki Cup 2020) គ្រោងនឹងប្រព្រឹត្តទៅចាប់ពីថ្ងៃទី២៣ ខែវិច្ឆិកា ដល់ថ្ងៃទី៣១ ខែធ្នូ បន្ទាប់ពីបញ្ចប់ការប្រកួតនៅជុំទី២ នៃព្រឹត្តិការណ៍ជម្រុះបាល់ទាត់ពិភពលោក (World Cup) ឆ្នាំ២០២២ ៕
ចែករំលែកព័តមាននេះ