ក្រសួង​អប់រំ​បង្ហាញ​ការ​គាំទ្រ​ការ​ធ្វើ​សមាធិ​ក្នុង​វិស័យ​កីឡា


រាជធានី​ភ្នំពេញ ៖ បន្ទាប់​ពី​អគ្គនាយក​ស្ថានីយទូរទស្សន៍​ប៉ុស្តិ៍​លេខ​៥ លោក ស៊ុ​ប៉ា​ឆៃ ដែល​ត្រូវ​គេ​ស្គាល់​ផង​ដែរ​ថា ជា​ប្រធាន​ក្រុមបាល់ទាត់​ក្រសួងការពារជាតិ ដែល​ទើប​ប្ដូរ​ឈ្មោះ​ថ្មី ដឹកនាំ​កីឡា ករ​បាល់ទាត់​ប្រមាណ​៦០​រូប​ឱ្យធ្វើ​សមាធិ​នៅ​វត្ត​សំរោង​អណ្ដែត នៅ​តាម​បណ្ដា​ក្លិប​បាល់ទាត់​ផ្សេង​ទៀត ក៏​បាន​ដឹកនាំ​ក្រុម​កីឡាករ​របស់​ខ្លួន​ឱ្យធ្វើ​សមាធិ​បែប​នេះ​ដែរ ។ ជា​ការ​កត់សម្គាល់​នា​ពេល​ថ្មី​ៗ​នេះ គឺ​ក្រសួង​អប់រំ យុវជន និង កីឡា ក៏​បាន​បង្ហើប​ជា​ផ្លូវការ​ថា ក្រសួង​នឹង​ឈាន​ទៅ​ដល់​ដាក់​ការ​ធ្វើ​សមាធិ​ជា​ពិធី​ផ្លូវការ​មួយ​នៅ​ក្នុង​វិស័យ​កីឡា​គ្រប់​ប្រភេទ​ដោយ​មិន​គ្រាន់តែ​ក្មុ​ង​វិស័យ​កីឡាបាល់ទាត់​នោះ​ឡើយ​។

យោង​តាម​ការ​បញ្ជាក់​របស់​លោក ស សុខា រដ្ឋលេខាធិការ​ក្រសួង​អប់រំ យុវជន និង កីឡា ថា លោក​នឹង​សហការ​ជាមួយ​លោក សុ​ប៉ា​ឆៃ វី​រៈ​ពូ​ជុង អគ្គនាយក​ស្ថានីយទូរទស្សន៍​ប៉ុស្តិ៍​លេខ ៥ ដើម្បី​បង្កើត​វគ្គ​សិក្សា​ខ្លី​ៗ​ស្តី​ពី​ការ​ធ្វើ​សមាធិ ។ ការ​ប្រកាស​របស់​មន្ត្រីជាន់ខ្ពស់​រូប​នេះ គឺ​បន្ទាប់​ពី​លោក​បាន​កត់​សម្គាល់ថា ការ​ធ្វើ​សមាធិ គឺជា​ការ​រម្ងាប់​ចិត្ត​ក្រេវក្រោធ និង​ធ្វើ​ឱ្យ​កីឡាករ​កាត់​បន្ថយ​​ការ​កាច់​កុង​គ្នា គុំ​គួ​ន​គ្នា និង​មានគំនិត​ចង់​ឈ្នះ​ចាញ់​គ្នា​ដោយ​ការ​សងសឹក ឬ​កំហឹង​ជាដើម។

ស្រប​ពេល​ដែល​កីឡាករ​ធ្វើ​សមាធិ​រួច​ហើយ ហាក់​មានចិត្ត​ស្ងប់ ខុស​ពី​អ្នក​មិន​ទាន់​ធ្វើ​សមាធិ​ផង ទើប​ក្រសួង​យល់​ថា ពិធី​សមាធិ​គួរតែ​មាន​ចំពោះ​គ្រប់​រូប​កីឡាករ ។ ក្រសួង​នឹង​ឈាន​ទៅ​ដាក់​កម្មវិធី​ធ្វើ​សមាធិ​នេះ​ក្នុង​កាលវិភាគ​ហ្វឹក​ហាត់​របស់​ក្រុម​យុវជន​ថ្នាល និង​ក្រុម​ជម្រើស​ជាតិ បើ​ទោះ​មិន​ទាន់​ដឹង​នៅឡើយ​ថា​នឹង​ចាប់​អនុវត្ត​នៅ​ពេល​ណា ។ ដកស្រង់​សម្ដី​នា​ពេល​ថ្មី​ៗ​លោក ស សុខា និយាយ​ថា « ខ្ញុំ​នឹង​ធ្វើការ ជាមួយ​លោក ស៊ុ​ប៉ា​ឆៃ ដើម្បី​បង្កើត​វគ្គ​ខ្លី​ៗ និង ទៅ​រៀន​ពី​គាត់​ដើម្បី​ធ្វើ​តាម ។ ទាល់តែ​យើង បាន​ចូលរួម​ខ្លួនឯង​ទើប​ដឹង​ថា​ប្លែក ហើយ ពេល​ចេញ​មក​នៅ​ក្នុង​ខ្លួន​នៅ​ឈឺ តែ​មាន អារម្មណ៍​មួយ​អត់​ដឹង​ឈឺ យើង​ចង់បាន​អ៊ីចឹង ។

ខ្ញុំ​គិត​ថា​ក្នុង​វិស័យ​កីឡា មិនមែន​តែ​បាល់ទាត់ គឺ កីឡា​ផ្សេង​ៗ​ទៀត​ក៏​អាច​ធ្វើ​សមាធិ​ដែរ យើង នឹង​រៀបចំ​ពាក់ព័ន្ធ​បញ្ហា​ហ្នឹង​» ។ លោក​បន្ត​ថា គម្រោង​ដាក់​ការ​ធ្វើ​សមាធិ​ក្នុង​កម្មវិធី​ហ្វឹកហាត់ របស់​ក្រុម​យុវជន​ថ្នាល និង​ជម្រើសជាតិ​នេះ នឹង​ក្លាយជា​ផ្នែក​មួយ​ក្នុង​ការ​រួមចំណែក​ជួយ​អភិវឌ្ឍ​ផ្នែក​ស្មារតី​បន្ថែម​លើ​ការ​ពង្រឹង​ផ្នែក​បច្ចេកទេស របស់​កីឡាករ ដោយ​តាម​គម្រោង​លោក​គ្រោង ដាក់​ឲ្យ​មាន​រយៈពេល​១​ថ្ងៃ ក្នុង​មួ​យស​ប្តា​ហ៍ ។

ជាមួយនឹង​ការ​ប្រកាស​នេះ លោក​អគ្គនាយក ទូរទស្សន៍​ប៉ុស្តិ៍​លេខ​៥ ធ្លាប់​អះអាង​កន្លង​មក​ថា ការ​ធ្វើ​សមាធិ​នឹង​ធ្វើ​ឲ្យ​កីឡាករ​មានចិត្ត​ស្ងប់ អារម្មណ៍​ស្រស់ថ្លា និង​ប្រាជ្ញា​វាងវៃ ពិសេស ជួយ​បង្កើត​ស្មារតី​កីឡាករ​ឲ្យ​មានការ​ប្រុង​ប្រយ័ត្ន ខ្ពស់​ក្នុង​ការ​ប្រកួត ។ ការ​ធ្វើ​បែប​នេះ ក៏​ជា​ការ​រួមចំណែក​កាត់​បន្ថយ​ភាព​ខឹង​ក្រោធ​របស់ កីឡាករ​ពេល​ជួប​បញ្ហា​បាន​មួយ​កម្រិត​ផង​ដែរ ។

លោក​សាទរ​យ៉ាង​ខ្លាំង​ប្រសិនបើ​ពិធី​មួយ​នេះ ត្រូវ​បាន​ដាក់​បញ្ចូល​នៅ​ក្នុង​វិស័យ​កីឡា ដោយ​លោក​បញ្ជាក់​ថា សមាធិ គឺជា​ដំណើរ​តាំងស៊ប់ មាំ​នៃ​ចិត្ត​ឱ្យ​ស៊ប់ ឬ​ស្លុង​ចិត្ត​ក្នុង​គន្លង​អារម្មណ៍ ដែល​រំពឹង​, ការ​នឹក​រំពឹង​ស្លុង​ចិត្ត ឬ ដំណើរ​ស្លុង ចិត្ត​ស៊ប់​នៅ​ក្នុង​អង្គ​ឈាន​ជាដើម ពោល​គឺ​ធ្វើ​ឱ្យ​ចិត្ត​មោហៈ ទោសៈ បាត់បង់ ។ លោក​បន្ត​ថា នា​ពេល​កន្លង​មក លោក និង​ក្រុមការងារ​ធ្លាប់​បាន​ដឹកនាំ​កីឡាករ​បាល់ទាត់ និង​ក្រុម​គ្រូបង្វឹក​ប្រមាណ​៦០​រូប​រួច​មក​ហើយ​ឱ្យ​ចូល​រួម​ធ្វើ​សមាធិ​រម្ងាប់​ភាព​ឆេវឆាវ កាលពី​ព្រឹក​ថ្ងៃ​ទី​២៧ មិថុនា ឆ្នាំ​២០២០ បន្ទាប់​ពី​កត់​សម្គាល់ថា កីឡាករ​មួយ​ចំនួន​បាន​បង្ក​ជា​ជម្លោះ​ដាក់​គ្នា​ផង នៅ​ពេល​មានការ​ប្រកួត​ម្ដង​ៗ ។

ពិធី​នោះ​ត្រូវ​បាន​ធ្វើ​ឡើង​នៅ​ក្នុង​បរិវេណ​វត្ត​សំរោង​អណ្ដែត ក្រោម​អធិបតី​សម្ដេច រ័​ត្ន សា​រឿ​ន ជា​ព្រះ​ចៅអធិការ​វត្ត ថ្នាក់ដឹកនាំ​សហព័ន្ធ​ប្រដាល់ និង​មន្ត្រីជាន់ខ្ពស់​ប្រចាំ​ប៉ុស្តិ៍​លេខ​៥ ដោយ​មាន​ទាំង​កម្មវិធី​អាហារ​សាមគ្គី នៅ​បន្ទាប់​ពី​ធ្វើ​សមាធិ និង​ស្ដាប់​ឳ​វាទ​ព្រះសង្ឃ​សម្រួល​ផ្លូវចិត្ត​នោះ​ផង។

លោក​អគ្គនាយក​ទូរទស្សន៍​ប៉ុស្តិ៍​លេខ​៥ និង​ជា​ប្រធាន​ក្រុមបាល់ទាត់ Tyfi Army FC អតីត​ក្រុមបាល់ទាត់​ក្រសួងការពារជាតិ បាន​បន្ត​ទៀត​ថា ពិធី​ដែល​បាន​ធ្វើ​នេះ មិនមែន​គ្រាន់តែ​ក្រើនរំលឹក​ឱ្យ​កីឡាករ​បាល់ទាត់​ដែល​បាន​ចូលរួម​ស្ងប់ចិត្ត និង​បាត់​អារម្មណ៍​តានតឹង​ប៉ុណ្ណោះ​ទេ តែ​ក៏​ដើម្បី​ឱ្យ​កីឡាករ​ទាំងនោះ​មានចិត្ត​សន្តិភាព និង​គ្មាន​ភាព​ឆេវឆាវ​ដាក់​គ្នា នៅ​ក្នុង​ករណី​មានការ​ប៉ះទង្គិច​ណាមួយ​នៅ​ពេល​មានការ​ប្រកួត​បាល់ទាត់​នោះ​ផង​ដែរ ។

លោក​ថា ពិធី​នេះ​ដ្បិតថា​មើលទៅ​សាមញ្ញ ប៉ុន្តែ​លទ្ធផល​ដែល​ទទួល​បាន​មក​វិញ គឺ​នឹង​ធ្វើ​ឱ្យ​កីឡាករ​មានចិត្ត​ធ្ងន់​ជាង​មុន មានចិត្ត​អភ័យ និង​គ្មាន​គំនិតអាក្រក់​លើ​គ្នា ដែល​មិន​ខុស​ពី​ជួយ​ឱ្យ​វិស័យ​បាល់ទាត់​មាន​តែ​ការ​ប្រកួត​ដោយ​មិត្តភាព និង​ពោរពេញ​ដោយ​កម្លាំង​សាមគ្គី​។

ក្នុង​នោះ​ក៏​ជា​ការ​ជួបជុំ​រវាង​កីឡាករ​ជាមួយ​គ្រូ​បង្វឹក និង​ជាមួយ​ថ្នាក់ដឹកនាំ ដែល​កាន់តែ​បង្កើន​កម្លាំង​សាមគ្គី​។លោក​ក៏​សម្ដែង​ការ​កោតសរសើរ​ចំពោះ​ថ្នាក់ដឹកនាំ​ក្រុមបាល់ទាត់ កីឡាករ គ្រូបង្វឹក និង មន្ត្រី​បម្រើ​ការ​នៅ​ប៉ុស្តិ៍​លេខ​៥​ទាំងអស់​ដែល​បាន​សហការ​ចូលរួម​នៅ​ក្នុង​ពេល​នោះ ។ លោក​មាន​គម្រោង​ដឹកនាំ​ធ្វើ​ពិធី​នោះ​ឱ្យ​បាន​ញឹកញាប់​សម្រាប់​ក្រុម​របស់​ខ្លួន ដើម្បី​ជា​ការ​បំផុស​ឱ្យ​កាន់តែ​មើលឃើញ​ពី​តម្លៃ​នៃ​ពិធី​សមាធិ​នៅ​ក្នុង​វិស័យ​កីឡា ។

លោក​ថា បើ​ការ​ធ្វើ​សមាធិ​នេះ មាន​សកម្មភាព​ជា​ទូទៅ​នៅ​ក្នុង​វិស័យ​កីឡា នោះ​មិន​ខុស​ពី​ធ្វើ​ឱ្យ​វិស័យ​កីឡា​កាន់តែ​មាន​សន្តិភាព​ផ្លូវចិត្ត និង​គ្មាន​ការ​ចង់​ឈ្នះ​ចង់​ចាញ់​គ្នា​ដោយ​ភាព​អវិជ្ជមាន​នៅ​ខាងក្រោយ​ខ្នង​នោះ​ទេ​៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ