ខ្សែប្រយុទ្ធ Real Madrid តេស្តវិជ្ជមានកូវីដ១៩ មុនប៉ះក្រុម Man City
ប្រទេសអេស្ប៉ាញ ៖ ក្លិប Real Madrid បានធ្វើការប្រកាសកាលពីថ្ងៃអង្គារថា ខ្សែប្រយុទ្ធ Mariano បានធ្វើតេស្តវិជ្ជមានកូវីដ១៩ ។…
ប្រទេសអេស្ប៉ាញ ៖ ក្លិប Real Madrid បានធ្វើការប្រកាសកាលពីថ្ងៃអង្គារថា ខ្សែប្រយុទ្ធ Mariano បានធ្វើតេស្តវិជ្ជមានកូវីដ១៩ ។
សេចក្តីថ្លែងការណ៍មួយបាននិយាយថា កីឡាករដែលមានដើមកំណើតអេស្ប៉ាញវ័យ ២៦ឆ្នាំរូបនេះ មានសុខភាពល្អជាធម្មតា បើទោះបីបានឆ្លងវីរុសនេះ។ ហើយបច្ចុប្បន្នកំពុងគោរពតាមពិធីសារ ដោយនៅដាច់ដោយឡែកអ្នកដទៃ។
Mariano មិនស្ថិតក្នុងបញ្ជីកីឡាករ សម្រាប់ការប្រកួតចុងក្រោយនៅ La Liga របស់ Real Madrid ស្មើ ២-២ ជាមួយក្រុម Leganes កាលពីថ្ងៃទី១៩ ខែកក្កដាកន្លងទៅ។
Mariano ទំនងជាអវត្តមានសម្រាប់ជំនួបរបស់ Real Madrid ទល់នឹងក្រុមម្ចាស់ផ្ទះ Manchester City សម្រាប់ជើងទី២ វគ្គ១៦ក្រុមចុងក្រោយ Champions League ដែលធ្វើឡើងនៅថ្ងៃសុក្រ ទី៧ ខែសីហាខាងមុខ នៅកីឡដ្ឋាន Etihad ចក្រភពអង់គ្លេស។
ដោយឡែកសហព័ន្ធបាល់ទាត់ទ្វីបអឺរ៉ុប UEFA បាននិយាយថា ខ្លួនកំពុងទាក់ទងជាមួយក្លិបជាញឹកញាប់ និងតាមដានទាំងស្ថានភាព និងការសម្រេចចិត្តរបស់អាជ្ញាធរអេស្ប៉ាញ ដែលពាក់ព័ន្ធទាំងអស់។ ហើយពួកគេមានទំនុកចិត្តថា ករណីនេះនឹងមិនប៉ះពាល់ដល់ការប្រកួតឡើយ។ ខណៈក្លិប Man City ក៏កំពុងឃ្លាំមើលស្ថានការណ៍ ដោយនឹងមានការរឹតបន្តឹងជាច្រើនសម្រាប់ជំនួបមួយនេះ ។
សូមរំលឹកថា Man City បាននាំមុខ ២-១ កាលពីជំនួបជើងទី១ នៅទឹកដី Bernabeu ដែលបានធ្វើឡើងកាលពីខែកុម្ភៈ មុនពេលការរីករាលដាលនៃវីរុសកូវីដ១៩ បណ្តាលឱ្យការប្រកួតត្រូវបានផ្អាកទាំងស្រុង៕ (ដកស្រង់ចេញពី BBC)
ចែករំលែកព័តមាននេះ