កូវីដ-១៩ ៖ កំណើននៃការរកឃើញកូវីដ-១៩ នៅខែកក្កដាកន្លងមកនេះបានធ្វើឲ្យមានការព្រួយបារម្ភខ្លាំង អំពីលទ្ធភាពដែលអាចនឹងមានការរាលដាលជាសហគមន៍នៅប្រទេសកម្ពុជា បើទោះបីជាមកដល់ពេលនេះ វាមិនទាន់កើតមានក្តី។ ក្រសូងសុខាភិបាលបានព្រមានថា ការរាលដាលជាសហគមន៍មិនមែនប្រាកដ ជានឹងមិនអាចកើតមាននៅប្រទេសកម្ពុជាឡើយ ហើយជំរុញឲ្យប្រជាជនកម្ពុជាទាំងអស់បង្កើនការប្រុងប្រយ័ត្ន ពិសេសនៅពេលឈប់សម្រាករយៈពេលប្រាំថ្ងៃខាងមុខគឺពីថ្ងៃទី១៧ ដល់២១ ខែសីហា ដែលគេគិតថា ប្រជាជនជាច្រើននឹងធ្វើដំណើរកម្សាន្តក្នុងប្រទេស។
ការព្រួយបារម្ភអំពីលទ្ធភាពនៃការរាលដាល ជាសហគមន៍កើតមាននៅពេលដែលចំនួនអ្នក ផ្ទុកមេរោគកូវីដ-១៩ នៅកម្ពុជាត្រូវបានរកឃើញកើនឡើង ដល់២២៥នាក់។ តើកត្តាអ្វីខ្លះដែលនឹងអាចនាំដល់ការរាលដាលជាសហគមន៍? រហូតមដល់ពេលនេះ វាប្រាកដណាស់ថា ករណីកូវីដ-១៩ទាំងអស់ទាក់ទងនឹងការនាំចូលពីខាងក្រៅ បន្ទាប់ពីកម្ពុជាបើកការហោះហើរ ទូលាយចូលប្រទេសកម្ពុជាដោយហេតុផលសេដ្ឋកិច្ច។
កត្តាទីមួយដែលគួរឲ្យព្រួយបារម្ភនោះគឺករណីដែល អាចកើតមានបានថាអ្នកផ្ទុកមេរោគកូវីដ-១៩បានមកដល់ព្រលានយន្តហោះបានធ្វើតេស្តដែរ ប៉ុន្តែរកមិនឃើញមានផ្ទុកមេរោគ ដែលករណីនេះគេហៅថា false negative ក្នុងករណីនេះជននោះនឹង អាចឆ្លងផុតខ្សែត្រៀមការពារទីមួយរបស់កម្ពុជា។ ក្នុងករណីនេះ វានឹងនឹងអាចនាំឲ្យមានការរាលដាល មេរោគកូវីដ-១៩ បើសិនជាជននោះមិនអនុវត្តបានល្អការដាក់ខ្លួនឯងដាច់ដោយឡែកពីគេក្នុងរយៈពេល១៤ថ្ងៃដើម្បីតាមដាន។
ក្នុងចំណុចនេះ វាមានសារសំខាន់ណាស់ដែលអ្នកធ្វើដំណើរ ចូលប្រទេសកម្ពុជា ទាំងអស់ត្រូវតែអនុវត្តឲ្យបានល្អបំផុតការដាក់ខ្លួនដោយឡែក១៤ថ្ងៃនេះ បើទោះ បីជាពួកគេមិនត្រូវបានធ្វើតេស្តរកឃើញកូវីដ-១៩ នៅពេលមកដល់ព្រលានយន្តហោះក្តី។ កត្តាហានិភ័យទីពីរគឺ ប្រជាជនកម្ពុជាហាក់ដូចជាអនុវត្តមិនបានល្អឡើយគោលការណ៍គម្លាតសង្គមពីរម៉ែត្រ។ ការគោរពគោលការណ៍នេះ នឹងកាត់បន្ថយការចម្លងកូវីដ-១៩ទៅកាន់អ្នកដទៃ ឬក៏សហគមន៍។
នៅពេលដែលប្រជាជនកម្ពុជា ជាច្រើនបានត្រៀមខ្លួនសម្រាប់ការធ្វើដំណើរកម្សាន្តនៅថ្ងៃទី១៧ ដល់ថ្ងៃទី២១ ខែសីហា ខាងមុខនេះ វានឹងនាំឲ្យ មានការព្រួយបារម្ភខ្លាំង បើសិនជាគោលការណ៍គម្លាតសង្គមនេះមិនត្រូវបានអនុវត្តឲ្យបានត្រឹមត្រូវបំផុត។ កត្តាហានិភ័យទីបីគឺ ប្រជាជនកម្ពុជាដូចជាមិនសូវឃើញមានពាក់ម៉ាសច្រើនដូចមុនឡើយ។ ការពាក់ម៉ាសគឺមានសារៈសំខាន់ណាស់នៅក្នុងការទប់ស្កាត់ការឆ្លង និងចម្លងមេរោគកូវីដ-១៩។ ទីក្រុងហុងកុងបានចេញគោលការណ៍ឲ្យប្រជាជនទាំងអស់ពាក់ម៉ាស នៅទីសាធារណៈដើម្បីជាវិធានការ មួយនៅក្នុងការទប់ស្កាត់មេរោគកូវីដ-១៩នេះ។
ដូច្នេះ បើសិនជាចង់ចៀសវាងការចម្លងកូវីដ-១៩ ចូលសហគមន៍នោះ ប្រជាជនកម្ពុជាទាំងអស់ និងអ្នកធ្វើដំណើរចូលប្រទេសកម្ពុជាទាំងអស់មិនត្រូវ ប្រហែសបីយ៉ាងនេះឡើយ ហើយទន្ទឹមនោះត្រូវតែរស់នៅតាមគន្លងធម្មតាបែបថ្មីប្រកបដោយអនាម័យ ដោយលាង សម្អាតដៃគ្រប់ពេលដែលគិតថាអាចនឹងប៉ះពាល់ជាមួយអ្វីដែលអាចចម្លងមេរោគ៕ ដោយ ៖ អ.សួស្តី
ចែករំលែកព័តមាននេះ