វត្តមួយនៅថៃ ប្រើប្រាស់បាល់ទាត់ដើម្បីអប់រំ និងបំពេញក្តីស្រមៃក្មេងៗក្នុងតំបន់
ប្រទេសថៃ ៖ Wat United គឺជាឈ្មោះក្រុមបាល់ទាត់មួយ ដែលបង្កើតឡើងដោយវត្តបាងយ៉ៃ (Bang Yai) មានទីតាំងស្ថិតនៅក្នុងស្រុកផុនហ្វីន (Phunphin)…
ប្រទេសថៃ ៖ Wat United គឺជាឈ្មោះក្រុមបាល់ទាត់មួយ ដែលបង្កើតឡើងដោយវត្តបាងយ៉ៃ (Bang Yai) មានទីតាំងស្ថិតនៅក្នុងស្រុកផុនហ្វីន (Phunphin) ខេត្តស៊ូរ៉ាតថានី ដោយមានព្រះសង្ឃមួយអង្គជាគ្រូបង្វឹកផ្ទាល់។
ជារៀងរាល់ល្ងាចចាប់ពីម៉ោង៥ ដល់ម៉ោង ៨យប់គេតែងឃើញវត្តមានក្មេងៗមួយក្រុម ដែលមានអាយុចន្លោះពី ១១-១៦ឆ្នាំ តែងតែមកហ្វឹកហាត់បាល់ទាត់នៅលើទីលានហ្វូតសាល (futsal) ដែលសង់ឡើងក្នុងបរិវេណវត្តបាងយ៉ៃផ្ទាល់តែម្តង។
បើតាមការបញ្ជាក់ពីព្រះអង្គ Baimut Nanthachot មានព្រះជន្ម ២៩ព្រះវស្សា ដែលមានចំណង់ចំណូលចិត្ត ចំពោះបាល់ទាត់តាំងពីកុមារភាព បានមានសង្ឃដីកាឱ្យដឹងថា «គោលបំណងដ៏ធំក្នុងការបង្កើតក្រុមបាល់ទាត់ហ្វូតសាលនេះឡើង គឺដើម្បីឱ្យក្មេងៗធ្វើការហ្វឹកហាត់បាល់ទាត់យ៉ាងស្ទាត់ជំនាញ ដើម្បីបំពេញក្តីសម្រៃពួកគេក្នុងវិស័យនេះ។ ជាពិសេស គឺដើម្បីប្រើប្រាស់ពេលវេលាទំនេរពួកគេឱ្យដើរលើផ្លូវល្អ និងពង្រឹងសហគមន៍ជៀសឆ្ងាយពីការសេពគប់គ្រឿងញៀន»។
ព្រះអង្គបានសិក្សាស្រាវជ្រាវលើបណ្តាញ Youtube ពីជំនាញរបស់កីឡាករ និងក្រុមបាល់ទាត់ល្បីៗ ដើម្បីយកមកបង្រៀនណែនាំដល់កុមារទាំងនោះ អស់រយៈពេល ២ឆ្នាំកន្លងមកហើយ។ ព្រមទាំងមានការណែនាំខ្លះៗ ពីសំណាក់គ្រូបង្វឹក និងកីឡាករបាល់ទាត់អាជីពមួយចំនួន ដែលបានធ្វើដំណើរមកកាន់អារាមមួយនេះ។
ក្រុម Wat United ក៏ធ្លាប់បានចូលរួមការប្រកួតជាច្រើនក្នុងតំបន់កន្លងមក ហើយបានឈ្នះពានរង្វាន់មួយចំនួនផងដែរ។ ព្រះអង្គ Baimut Nanthachot បានបន្ថែមទៀតថា «ការលេងកីឡាអាចរាប់បញ្ចូលក្នុងគោលការណ៍ព្រះពុទ្ធសាសនា ហើយក្មេងៗក៏ចូលចិត្តមកព្រះវិហារកាន់តែច្រើន។ ក្នុងនោះលោកអភិបាលស្រុកផ្ទាល់ និងសហគមន៍ រួមទាំងអង្គការមូលដ្ឋានផ្សេងទៀត ក៏បានគាំទ្រថវិកាក្នុងការកែលម្អទីលានបាល់ទាត់ និងសំភារៈកីឡាផ្សេងទៀត។ ខណៈដែលអាណាព្យាបាលរបស់ក្មេងៗទាំងនោះ បានគាំទ្រដល់មធ្យោបាយធ្វើដំណើរ ដើម្បីទៅចូលរួមការប្រកួតប្រជែង»៕ (ដកស្រង់ចេញពី Springnews | រូបភាពពី Siamsport)
ចែករំលែកព័តមាននេះ