រាជធានីភ្នំពេញ ៖ លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ហៅកាត់ថា CAMSOC និងជាអនុប្រធានសហព័ន្ធកីឡាគុនល្បុក្កតោកម្ពុជាផងដែរនោះ…
រាជធានីភ្នំពេញ ៖ លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ហៅកាត់ថា CAMSOC និងជាអនុប្រធានសហព័ន្ធកីឡាគុនល្បុក្កតោកម្ពុជាផងដែរនោះ បានឲ្យដឹងថា ដើម្បីសម្រួចគោលដៅឆ្ពោះទៅស៊ីហ្គេម លើកទី៣២ ឆ្នាំ២០២៣ នៅព្រះរាជាណាចក្រកម្ពុជានេះ ប្រភេទកីឡាគុនល្បុក្កតោមានការងារច្រើនណាស់ដែលត្រូវធ្វើបន្តទៀត ពីព្រោះគុនល្បុក្កតោ គឺជាអត្តសញ្ញាណជាតិ ព្រលឹងជាតិទាំងមូល។
លោក វ៉ាត់ ចំរើន ថ្លែងថា ក្នុងការដាក់ប្រភេទកីឡាប្រពៃណីជាតិកម្ពុជាក្នុងស៊ីហ្គេម២០២៣នេះ មានការលំបាកបន្តិច ដើម្បីបញ្ចុះបញ្ចូលឲ្យប្រទេសមួយចំនួនហ្វឹកហាត់គុនល្បុក្កតោ ទើបយើងអាចរៀបចំការប្រកួតបាន ។ យើងត្រូវទៅបង្រៀនគេអំពីច្បាប់ បទបញ្ជានៃការប្រកួត ដើម្បីឲ្យគេចេះពីបច្ចេកទេសក្នុងការប្រកួតប្រជែងជាមួយយើង ។ ចាប់ពីពេលនេះតទៅ យើងត្រូវត្រៀមរៀបចំបទបញ្ជាការប្រកួតក្នុងកម្រិតអន្តរជាតិ ដោយពិនិត្យលើគោលការណ៍ប្រភេទកីឡាប្រយុទ្ធមួយចំនួនរបស់អន្តរជាតិ ក៏ដូចជាគោលការណ៍ នៃការប្រកួតស៊ីហ្គេម។
លោកអគ្គលេខា CAMSOC បន្តថា នៅឆ្នាំ២០២២ កម្ពុជានឹងរៀបចំការប្រកួត Pre-SEA Games (មុនការប្រកួតផ្លូវការ)។ ឲ្យតែប្រភេទកីឡាថ្មី ត្រូវរៀបចំការប្រកួត Pre-SEA Gamesដែលនេះជាគោលការណ៍របស់ស៊ីហ្គេម ។
អ្វីដែលជាកង្វល់របស់យើងបច្ចុប្បន្ន គឺគុណភាពកីឡាករ កីឡាការិនីរបស់យើង ដែលយើងគឺជាម្ចាស់ផ្ទះ និងជាម្ចាស់ក្បាច់គុន គឺយើងត្រូវតែប្រឹងប្រែងឲ្យអស់ពីកម្លាំងកាយចិត្ត ឆន្ទៈមោះមុត ជាពិសេសគឺសាមគ្គីភាពផ្ទៃក្នុង ដើម្បីសម្រួចគោលដៅក្នុងដំណើរឆ្ពោះទៅដណ្ដើមមេដាយជូនជាតិ ក្នុងឋានៈជាម្ចាស់ផ្ទះស៊ីហ្គេម លើកទី៣២ ឆ្នាំ២០២៣។
លោក អ៊ុក សិទ្ធិជាតិ អគ្គនាយកកីឡានៃក្រសួងអប់រំ យុវជន និងកីឡា បានបញ្ជាក់ឲ្យដឹងអំពីការស្នើសុំការឧបត្ថម្ភលើការរៀបចំកិច្ចប្រជុំក្នុងកម្រិតអាស៊ីអាគ្នេយ៍ ដើម្បីរៀនសូត្រពីគ្នាផង ការប្រកួតប្រជែង និងផ្សព្វផ្សាយផង ពីប្រភេទកីឡាគុនល្បុក្កតោរបស់កម្ពុជាយើងទៅកាន់ប្រទេសមួយចំនួននៅក្នុងអាស៊ីអាគ្នេយ៍ ដែលទទួលយកការហ្វឹកហាត់គុនល្បុក្កតោ ដូចជាប្រទេសវៀតណាម ហ្វីលីពីន ឡាវ ម៉ាឡេស៊ី មីយ៉ាន់ម៉ាជាដើម ដែលយល់ព្រមជួយដល់គុនល្បុក្កតោ ក្នុងការរៀបចំការប្រកួតស៊ីហ្គេម ឆ្នាំ២០២៣។
សូមបញ្ជាក់ថា ជាចក្ខុវិស័យ និងគោលការណ៍រួមរបស់សហព័ន្ធកីឡាគុនល្បុក្កតោកម្ពុជា គឺរួមគ្នាអភិរក្ស និងអភិវឌ្ឍគុនល្បុក្កតោ ដែលជាក្បាច់គុនអត្តសញ្ញាណជាតិ វប្បធម៌ជាតិ ព្រលឹងជាតិ ។ នេះជាការលើកឡើងរបស់លោកបណ្ឌិតច័ន្ទ សារុន ប្រធានសហព័ន្ធកីឡាគុនល្បុក្កតោកម្ពុជា កាលពីពេលថ្មីៗកន្លងមកនេះ នៅក្នុងកិច្ចប្រជុំបូកសរុបការងារនិងទិសដៅអនុវត្តបន្តក្នុងឆ្នាំ២០២០ ។
លោកបានស្នើសុំការយោគយល់ពីព្រឹទ្ធាចារ្យ និងលោកគ្រូ អ្នកគ្រូ សិស្សគុនល្បុក្កតោទាំងអស់ ឲ្យយកស្មារតីជាតិ ស្មារតីព្រលឹងដូនតាមកតម្កល់ឲ្យខ្ពស់ បង្រួបបង្រួមគ្រួសារគុនល្បុក្កតោឲ្យមានការឯកភាពជាធ្លុងមួយក្នុងការពង្រឹងស្មារតីសាមគ្គីភាពផ្ទៃក្នុង ចាប់ពីពេលនេះតទៅ ដើម្បីជោគជ័យ នៃគុនល្បុក្កតោ ក្នុងដំណើរឆ្ពោះទៅ SEA Games ឆ្នាំ២០២៣ ៕
ចែករំលែកព័តមាននេះ