រាជធានីភ្នំពេញ ៖ ក្នុងប៉ុន្មានថ្ងៃនេះ កីឡាករប្រដាល់ល្បីឈ្មោះ លោក វង្ស ណយ បានប្រកាសដដែលជាដដែលថា លោកនឹងសម្រេចចិត្តលាឈប់ពីអាជីពអ្នកប្រដាល់ហើយ ក្រោយទ្រាំទ្រនឹងការជេរប្រមាថរបស់អ្នករិះគន់មួយចំនួនតូចមិនបាន ទោះបីលោកមានចិត្តអាឡោះអាល័យចង់បន្ដអាជីពឈឺសាច់នេះទៀតក៏ដោយ ។ យ៉ាងណាក៏ដោយ ជំហរលាឈប់របស់លោក ត្រូវបានគេគិតថាគឺគ្រាន់តែជាការប្រកាសដើម្បីឱ្យមានការចាប់អារម្មណ៍តែប៉ុណ្ណោះ ដោយសារតែលោកប្រកាសបែបនេះច្រើនលើកមកហើយតែមិនដែលបោះបង់ការប្រដាល់ដូចការប្រកាសទាល់តែសោះ។
ថ្លែងប្រាប់បណ្ដាញព័ត៌មានក្នុងស្រុក វង្ស ណយ ថា លោកពិតជាសម្រេចចិត្តលាឈប់ពីអាជីពអ្នកប្រដាល់ប្រាកដមែន ដោយលោកលើកហេតុផលថា ដោយសារបញ្ហាការគាំទ្រនាពេលចុងក្រោយនៅមានកម្រិត និងទី២ គឺដោយសារតែជ្រក់ជ្រេញនឹងការជេរប្រមាថធ្វើឲ្យលោកបាក់ទឹកចិត្តមិនអាចប្រកបអាជីពមួយនេះបានបន្ដទៀត ។
អ្នកលេងគុនខ្មែរវ័យ៣៣ឆ្នាំរូបនេះបានពន្យល់ថា ការសម្រេចចិត្តរបស់លោកគឺជារឿងច្បាស់លាស់ ដោយសារតែលោកគិតថា ការគាំទ្រគុនខ្មែរនៅមានកម្រិត គាំទ្រតែមាត់ អត់គាំទ្របែបជួយទី១ ហើយទី២ពេលលោកវ៉ៃឈ្នះអត់បានអីមកវិញទេបានតែតម្លៃ តែដល់ពេលវ៉ៃចាញ់ គឺរងនូវការជេរប្រមាថ ដែលលោកយល់ថា តើមានហេតុផលអ្វីដែលលោកត្រូវតស៊ូទៀត ។ លោកនិយាយថា បើលោកតស៊ូទៅមុខ ក៏មិនបានល្អជាងហ្នឹងនោះដែរ ទើបលោកយល់ថាដល់ពេលហើយដែលត្រូវចាកចេញ ។ លោកថា ដំបូងឡើយ ចិត្តចង់វ៉ៃទៀតដែរ តែដោយតូចចិត្តនឹងមនុស្សមួយចំនួនចូលចិត្តជាន់ពន្លិចធ្វើឱ្យលោកបាក់ទឹកចិត្ត អស់រលីង ។ លោកនិយាយថា វ៉ៃឈ្នះគេថាយើងឈ្នះដោយសារប៉ះអ្នកអន់ ដល់យើងវ៉ៃឈ្នះអ្នកខ្លាំងថាយើងសំណាង និយាយទៅសម្រាប់ប្រជាជនមួយភាគតូច គាត់ចាំតែតែជេរ។
កីឡាករមានប្រវត្ដិឡើងសង្វៀនរាប់រយដងនេះបានបង្ហើបថា ទោះលាឈប់ពីអាជីពកីឡាករមែន តែខ្លួនក៏មិនទាន់សម្រេចចិត្តថា ត្រូវឈប់ពាក់ព័ន្ធនឹងវិស័យមួយនេះដែរ ពោលគឺលោកនឹងពិចារណា ប្រសិនបើមានការផ្ដល់ឱកាសឲ្យលោកធ្វើជាមន្ដ្រីបច្ចេកទេសក្នុងសហព័ន្ធកីឡាប្រដាល់គុនខ្មែរ។
ដោយឡែកពាក់ព័ន្ធនឹងអនាគតកូនៗលើវិថីប្រដាល់គុនខ្មែរវិញ លោកបានសង្កត់ធ្ងន់ថា អាស្រ័យទៅលើភាពជាក់ស្ដែង បើសិនថ្ងៃក្រោយទៅកីឡាកររីកចម្រើន អ្នករិះគន់គាត់មានការយល់ដឹងច្រើន បានលុយច្រើនកាន់តែសប្បាយចិត្ត តែបើបានលុយតិច លោកអត់ទេ អត់ឲ្យកូនឈឺសាច់ដូចលោកឡើយ។
គួរបញ្ជាក់ផងដែរថា កីឡាករ វង្ស ណយ បានប្រកាសលាឈប់ពីអាជីពគុនខ្មែរនេះ នៅលើបណ្ដាញសង្គមផ្លូវការរបស់លោក ដោយលោកសរសេរថា «ខ្ញុំវ៉ៃយូរណាស់ហើយ ល្បីតែឈ្មោះ គ្មានសល់អីទេ ពេលនេះខ្ញុំអស់កម្លាំងវ៉ៃទៀតហើយ ទើបខ្ញុំសម្រេចចិត្តឈប់វ៉ៃនៅពេលនេះ ព្រោះខ្លាចពិការ ខានបានរកស៊ីចិញ្ចឹមកូន។ បើខ្ញុំពិការទៅគ្មានអ្នកណាចិញ្ចឹមកូនខ្ញុំទេ»។
កីឡាករពូកែវាយកែងនេះ បានចូលប្រឡូកអាជីពប្រដាល់គុនខ្មែរដំបូងនៅឆ្នាំ២០០៣ បន្ទាប់មកលោកបានសាងកេរ្ដិ៍ឈ្មោះល្បីល្បាញកាន់តែខ្លាំងឡើងៗ រហូតត្រូវបានផ្គូផ្គងឲ្យជួបកីឡាករបរទេសជាបន្ដបន្ទាប់ ក្រោយត្រូវបានចាត់ទុកជាកីឡាករកម្រិត A នៅកម្ពុជា។
ហើយដៃគូក្នុងស្រុកដែលអ្នកគាំទ្រចងចាំមិនភ្លេចពេលប៉ះ វង្ស ណយ មានដូចជា កែវ រំចង់, ឡុង សុភី និងអតីតកីឡាករ ឡៅ ស៊ីណាត ជាដើម ។ បច្ចុប្បន្ន មុនប្រកាសឈប់ឡើងសង្វៀន លោកក៏មានរបរលក់ម្ហូបតាម Online ដើម្បីទ្រទ្រង់ជីវភាពផងដែរ ។ យ៉ាងណាការប្រកាសលាឈប់របស់លោកមិនត្រូវបានអ្នកគាំទ្រទុកចិត្តនោះទេ ខណៈដែលលោកមិនមានលំនឹងការងារណាមួយច្បាស់លាស់ជំនួសឱ្យការប្រដាល់នាពេលនេះ ។
ម្នាក់ៗយល់ថា វាគឺជារឿងសាំហើយ ដោយសារតែលោកប្រកាសបានតែប្រកាស ប៉ុន្តែនៅពេលមហាជនចាប់អារម្មណ៍ ហើយមានការស្នើឱ្យឡើងប្រកួត ក៏ឃើញមុខឡើងរេញដដែលជាដដែល ដែលពិបាកជឿថា តើការប្រកាសលើកនេះអាចទុកចិត្តបានឬយ៉ាងណា ។ យ៉ាងណាមិញ វង្ស ណយ ក៏មិនទាន់ទុកចិត្តពីជំហររបស់ខ្លួននោះដែរ បើផ្អែកតាមសម្ដីមិត្តភក្តិ ដែលបានសួរនាំក្រោយការប្រកាសរបស់លោក ៕
ចែករំលែកព័តមាននេះ