ប្រទេសអាហ្សង់ទីន ៖ Sebastián Galleguillo អាយុ ១៨ឆ្នាំគឺជាកីឡាករហែលទឹកប៉ារ៉ាឡាំពិកជនជាតិអាហ្សង់ទីន បានធ្វើឱ្យមានការភ្ញាក់ផ្អើលសារព័ត៌មានធំៗជាច្រើន បន្ទាប់ពីរូបគេបានរកឃើញវិធីសាស្ត្រមួយក្នុងការហ្វឹកហាត់ អំឡុងពេលប្រទេសត្រូវបិទទ្វារជិត ៤ខែទាំងនៅក្នុង…
ប្រទេសអាហ្សង់ទីន ៖ Sebastián Galleguillo អាយុ ១៨ឆ្នាំគឺជាកីឡាករហែលទឹកប៉ារ៉ាឡាំពិកជនជាតិអាហ្សង់ទីន បានធ្វើឱ្យមានការភ្ញាក់ផ្អើលសារព័ត៌មានធំៗជាច្រើន បន្ទាប់ពីរូបគេបានរកឃើញវិធីសាស្ត្រមួយក្នុងការហ្វឹកហាត់ អំឡុងពេលប្រទេសត្រូវបិទទ្វារជិត ៤ខែទាំងនៅក្នុង និងជុំវិញរដ្ឋធានី Buenos Aires ដោយសារតែការរាតត្បាតពីកូវីដ១៩។
ដោយមានជំនួយពីឪពុកដែលអ្នកផលិតឥដ្ឋ Galleguillo បានបង្កើតអាងហែលទឹកបណ្តោះអាសន្ននៅទីធ្លាខាងក្រោយផ្ទះ ដែលមានទីតាំងនៅសង្កាត់ក្រីក្រនៃទីក្រុង ដោយប្រើប្រាស់ធុងចាស់ និងប្លាស្ទិក បង្កើតបានជាអាងមួយមានចំណុះ ៤០០លីត្រ។
ឪពុករបស់គេគឺលោក Edmundo Hernandez ដែលមានវ័យ ៤៧ឆ្នាំបានប្រាប់ Reuters ឱ្យដឹងថា «យើងបានធ្វើអ្វីៗ ដែលយើងមាននៅទីនេះ ហើយយើងក៏បានចាប់ផ្តើមបង្កើតវាឡើងតែម្តង» ។
Sebastián Galleguillo គឺជាផ្នែកមួយនៃក្រុមហែលទឹកថ្លង់របស់ប្រទេសអាហ្សង់ទីន និងកំពុងហ្វឹកហាត់ ដើម្បីចូលរួមការប្រកួតព្រឹត្តិការណ៍ហែលទឹកមនុស្សថ្លង់ប្រចាំឆ្នាំ២០២១ នៅប្រទេសប្រេស៊ីល (Deaflympics 2021) បាននិយាយថា«ជាមួយនឹងការហែលទឹក គឺតែងតែនៅជាមួយខ្ញុំទាំងស្រុង និងរៀងរាល់ថ្ងៃ។ នៅទីនោះខ្ញុំមិនពឹងផ្អែកលើការស្តាប់នោះទេ។ ខ្ញុំត្រូវការតែរាងកាយរបស់ខ្ញុំប៉ុណ្ណោះ ដើម្បីធ្វើការហ្វឹកហាត់»។
សូមបញ្ជាក់ថា រដ្ឋាភិបាលអាហ្សង់ទីន បានដាក់ចេញនូវវិធានការចាក់សោរប្រទេសជាចាំបាច់ចាប់តាំងថ្ងៃទី២០ ខែមីនា ដែលត្រូវបានពន្យាពេលនៅជុំវិញរដ្ឋធានី Buenos Aires រហូតដល់ថ្ងៃទី១៧ ខែកក្កដា ដោយសារតែការកើនឡើងនូវករណីឆ្លងថ្មីៗ ដោយបច្ចុប្បន្នចំនួនអ្នកឆ្លងមានជាង ១០ម៉ឺននាក់ និងអ្នកស្លាប់ជិត ២,០០០នាក់៕
ចែករំលែកព័តមាននេះ