កត្តា​ចិត្តសាស្ត្រ ៣ ដែល​ជំរុញ​ឱ្យ​អ្នក​ចាយវាយ​ខ្ជះខ្ជាយ !


ការ​ទិញ​ទំនិញ​មាន​ទំនាក់ទំនង​ច្រើន​ណាស់​ជាមួយ​ចិត្តសាស្ត្រ​របស់​មនុស្ស ហើយ​មនុស្ស​ម្នាក់​ៗ​តែងតែមាន​កត្តា​ចិត្តសាស្ត្រ​ដែល​ជំរុញ​ឲ្យ​ពួក​គេ​រមាស់​ដៃ​ចាយវាយ ។ ការ​យល់​ដឹង​ពី​កត្តា​ទាំងនេះ​អាច​ជួយ​ឲ្យ​មនុស្ស​ចៀសវាង​ធ្លាក់ខ្លួន​ចាញ់បោក​វា​ទៀត និង​ចៀសវាង​ការ​ចាយវាយ​ខ្ជះខ្ជាយ​លើ​របស់​ដែល​មិន​ត្រូវការ​ចាំបាច់ ។ កត្តា​ចិត្តសាស្ត្រ​ដែល​ជំរុញ​ឲ្យ​មនុស្ស​ចាយវាយ​ខ្ជះខ្ជាយ​មាន​ដូច​ខាងក្រោម​នេះ ៖

១. អារម្មណ៍​សប្បាយចិត្ត
ការ​ស្រាវជ្រាវ​ជា​ច្រើន​បាន​ប្រទះ​ឃើញ​ថា មនុស្ស​មួយ​ចំនួន​មាន​អារម្មណ៍ល្អ​ជាង​មុន​បន្ទាប់​ពី​បាន​ចាយវាយ​លុយ​លើ​អ្វីមួយ​ហើយ ។ នេះ​ជា​មូលហេតុ​ដែល​មនុស្ស​មួយ​ចំនួន​ចូល​ចិត្ត​ទិញ​ទំនិញ​ទោះជា​ពួក​គេ​មិន​ត្រូវការ​វា​ចាំបាច់​ពិតមែន​ក្តី ។
រាល់ពេល​ដែល​អ្នកមាន​អារម្មណ៍​មិន​សប្បាយចិត្ត អ្នក​គួរតែ​រក​សកម្មភាព​ដទៃ​ទៀត​ដែល​ជួយ​ឲ្យ​អ្នក​សប្បាយចិត្ត ដូច​ជា​ចំណាយពេល​ជាមួយ​មនុស្ស​ជាទី​ស្រលាញ់ ធ្វើ​លំ​ហាត់ប្រាណ ឬ​អាន​សៀវភៅ​ជាដើម ។

២. ការ​ប្រកួតប្រជែង
មនុស្ស​ជា​ច្រើន​អនុញ្ញាត​ឲ្យ​ការ​ប្រកួតប្រជែង​ជាមួយ​អ្នក​ដទៃ​ជំរុញ​ឲ្យ​ពួក​គេ​ទិញ​របស់​ដែល​ពួក​គេ​មិន​មាន​សមត្ថភាព​ទិញ​ផង ជា​ពិសេស​ប្រសិនបើ​អ្នក​ដទៃ​នោះ​ជា​សមាជិកគ្រួសារ មិត្តភក្តិ ឬ​អ្នក​ជិតខាង​ដែល​មាន​របស់​ជាង​ខ្លួន​ជាដើម ។
អ្នក​ត្រូវ​ចង​ចាំ​ថា ការ​ទិញ​ទំនិញ​មិនមែន​ជា​ហ្គេ​ម​ទេ ហើយ​វា​គ្មាន​អ្នក​ឈ្នះ ឬ​អ្នក​ចាញ់​ឡើយ ។ ផ្ទុយ​មក​វិញ អ្នក​ដែល​ជោគជ័យ​ជាងគេ​ប្រហែលជា​មនុស្ស​ដែល​ទិញ​តែ​អ្វី​ដែល​ពួក​គេ​ត្រូវការ ។

៣. ការ​ចង់​សន្សំ​លុយ
ខួរក្បាល​របស់​មនុស្ស​ឆ្លើយ​តប​យ៉ាង​ចម្លែក​ពេល​ដែល​មើលឃើញ​ការ​លក់​បញ្ចុះតម្លៃ ។ ឧទាហរណ៍​ពេល​ដែល​មើលឃើញ​ផ្លា​ក​សរសេរ​ថា​បញ្ចុះតម្លៃ ៥០% ខួរក្បាល​គិតតែ​ពី​ការ​សន្សំ ៥០% ទេ និង​មិន​គិត​ពី​ការ​ចាយ ៥០% ទៀត​ឡើយ ។ ប៉ុន្តែ​វា​គ្រាន់តែ​ជា​ល្បិច​មួយ​ក្នុង​ចំណោម​ល្បិច​ជា​ច្រើន​ដែល​ព្យា យាម​បោកប្រាស់​អ្នកទិញ​ឲ្យ​ទិញ​ផលិតផល​របស់​ពួក​គេ​ឲ្យ​បាន​ច្រើន​ប៉ុណ្ណោះ ។

អ្នក​ត្រូវ​ដឹង​ថា អ្នក​មិន​អាច​សន្សំ​លុយ​បាន​ទេ​ប្រសិនបើ​អ្នក​កំពុង​តែ​ចាយវាយ ។ ជាក់ស្តែង ការ​លក់​បញ្ចុះតម្លៃ​អាច​ជួយ​ឲ្យ​អ្នក​ចាយវាយ​តិច​ជាង​មុន​ពិតមែន​ដើម្បី​ទទួល​បាន​អ្វី​ដែល​អ្នក​ចង់បាន តែ​វា​មិន​អាច​ជួយ​ឲ្យ​អ្នក​សន្សំ​លុយ​បាន​ទេ ៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ