អ្នកប្រើប្រាស់ម៉ូតូគ្រប់រូបប្រាកដជាចំណាយថវិកាមិនតិចទ្បើយ ក្នុងការទិញវាចូលផ្ទះ បើរបស់ជាទីស្រទ្បាញ់នោះបាត់បង់ដោយប្រការណាមួយ គឺពិតជាគួរឱ្យសោកស្តាយខ្លាំងណាស់។ ជាក់ស្តែងក្នុងរយៈពេលចុងក្រោយនេះ គេសង្កេតឃើញមានអំពើចោរកម្មហាក់កើតទ្បើងជារឿយៗ ដែលធ្វើឱ្យអ្នកប្រើមធ្យោបាយចល័តទាន់សម័យមួយចំនួនមានក្តីបារម្ភពីបញ្ហានេះ ។ ដូចនេះ កោះសន្តិភាពសូមលើកយកនូវវិធីសាស្ត្រការពារម៉ូតូកុំឱ្យចោរលួចស្រួលៗដូចតទៅ៖
១-បំពាក់ឬដំទ្បើងនូវឧបករណ៍ផ្សេងៗ ដែលរារាំងឬបង្ខាំងរាល់សកម្មភាពចលនារបស់ម៉ូតូ ប៉ុន្តែសូមលៃលកយ៉ាងណាត្រឹមតែជាគ្រឿងផ្តល់ឧបសគ្គ សម្រាប់ចោរទៅបានហើយចៀសវាងហួសព្រំដែននាំឱ្យខូចម៉ូតូឬមានទោសទណ្ឌទៅវិញ ។
២-ចាក់សោលើសំណុំថាសហ្វ្រាំងម៉ូតូឱ្យបានត្រឹមត្រូវនិងទៀងទាត់ ក្រោយពេលចាកចេញទៅណាមកណាម្តងកាល ។ ព្រោះថាកាលណាថាសហ្វ្រាំងរបស់ម៉ូតូជាប់សោហើយនោះ គឺពួកចោរមិនអាចជិះចេញបានទ្បើយ ។
៣-បង្កើតគំនិតច្នៃប្រឌិតនៅត្រង់លក្ខណៈបច្ចេកទេសផ្សេងៗ ដើម្បីធ្វើឱ្យលោកចោរលំបាកនឹងលួចបាន ។ ឧទាហរណ៍ លោកអ្នកអាចបិទឬផ្តាច់ហ្វុ៊យហ្ស៊ីបភ្លើងបណ្តោះអាសន្ន ឬក៏ទាញគម្របប៊ូស៊ីឱ្យរបូត និងបិទសាំងជាដើម ។ ធ្វើបែបនេះអាចមានសង្ឃឹមខ្លះថា ចោរមួយចំនួននឹងស្មានថា ម៉ូតូអ្នកខូចឬដាក់បំពាក់កុងតាក់ពិសេសណាមួយ ។ មួយវិញទៀត ពួកគេអាចនឹងបោះបង់ចោលសកម្មភាពនោះ ភ្លាមៗជាមិនខាន ។
៤-ភ្ជាប់នូវប្រព័ន្ធតេទ្បេបញ្ជាដោយសម្ងាត់ ដែលអាចឱ្យម៉ូតូបិទបើក ឬបញ្ឆេះបានតាមបំណងអ្នក ។ ដូច្នេះក្រោយពេលចោរលួចបានបន្តិចពួកគេប្រាកដជាមិនអាចរកគន្លឹះបញ្ឆេះទាន់ពេលទ្បើយ ម្យ៉ាងទៀត នៅពេលចោរយកបានយើងជាម្ចាស់ឃើញភ្លាមក៏គ្រាន់តែចុចបញ្ជាពីចម្ងាយនោះម៉ូតូនឹងរលត់ម៉ាស៊ីនភ្លាមមិនអាចបន្តដំណើរទៅមុខទៀតទេ ។
៥-ចតម៉ូតូរបស់អ្នកនៅទីតាំងស្រទ្បះនិងមមាញឹក ប្រសិនបើអ្នកចេញទៅណាមកណាមួយខណៈ ពិសេសគឺកន្លែងណាមួយដែលអ្នកអាចមើលឃើញច្បាស់ ។
៦-ចាក់សោច្រវាក់់ជាប់គ្នានៅតាមស្ថានីយ៍ ឬកន្លែងណាមួយប្រសិនបើមាន ។
៧-កុំទម្លាប់បញ្ឆេះម៉ូតូចោល បើទុកជាអ្នកធ្វើកិច្ចការណាមួយតែប៉ុន្មាននាទីក៏ដោយ ។ ព្រោះថាមួយប៉ប្រិចភ្នែកនោះមានសារសំខាន់ចំពោះលោកចោរ ឬជនឆ្លៀតឱកាសមួយចំនួនខ្លាំងណាស់ ។ ជាងនេះទៅទៀត ក៏កុំព្យាយាមលាក់ទុកកូនសោត្រង់កន្លៀតណាមួយក្នុងម៉ូតូឱ្យសោះ ។
*សម្គាល់ ៖ ជម្រើសចុងក្រោយដើម្បីធានាបាននូវសុវត្ថិភាពពេញលេញនោះលោកអ្នកគួរតែសម្រេចចិត្តដំទ្បើង ឬបំពាក់ប្រព័ន្ធតាមដានសកម្មភាពរបស់ម៉ូតូអ្នកដូចជា ឧបករណ៍ GPS ជាដើម ទើបកាន់តែមានទំនុកចិត្តថែមទៀត ។ បច្ចុប្បន្នទីផ្សារកម្ពុជានៃយើងក៏មានសេវាកម្មនេះដែរ ៕
ចែករំលែកព័តមាននេះ