ប្រទេសជប៉ុន ៖ កីឡាអាជីពក្នុងប្រទេសជប៉ុន បានចាប់ផ្តើមការប្រកួតប្រជែងរបស់ខ្លួន ដោយអនុញ្ញាតឱ្យមានវត្តមានអ្នកគាំទ្រ ចូលរួមទស្សនាផ្ទាល់ក្នុងកីឡដ្ឋាន កាលពីចុងសប្តាហ៍មុន ដោយតម្រូវឱ្យកំណត់ចំនួនជាអតិបរមា ៥០០០នាក់។ ជាក់ស្តែងកាលពីសប្តាហ៍មុន…
ប្រទេសជប៉ុន ៖ កីឡាអាជីពក្នុងប្រទេសជប៉ុន បានចាប់ផ្តើមការប្រកួតប្រជែងរបស់ខ្លួន ដោយអនុញ្ញាតឱ្យមានវត្តមានអ្នកគាំទ្រ ចូលរួមទស្សនាផ្ទាល់ក្នុងកីឡដ្ឋាន កាលពីចុងសប្តាហ៍មុន ដោយតម្រូវឱ្យកំណត់ចំនួនជាអតិបរមា ៥០០០នាក់។
ជាក់ស្តែងកាលពីសប្តាហ៍មុន ក្នុងការប្រកួតក្របខណ្ឌលីគកំពូលជប៉ុន J League បានឈានដល់សប្តាហ៍ទី៤ ដោយបានអនុញ្ញាតឱ្យអ្នកគាំទ្រចូលរួមទស្សនាផ្ទាល់ក្នុងកីឡដ្ឋានជាលើកដំបូង បន្ទាប់ត្រូវលេងដោយបិទទ្វារកីឡដ្ឋានចាប់តាំងពីចុងខែមិថុនា ក្រោយការរីករាលដាលនៃវីរុសកូវីដ១៩។
បើទោះបីជាអនុញ្ញាតឱ្យអ្នកគាំទ្រទស្សនាផ្ទាល់ក៏ពិតមែន ប៉ុន្តែគេសង្កេតឃើញថា វិធានការដ៏តឹងរឹងជាច្រើនត្រូវបានអនុវត្ត មុនពេលអ្នកគាំទ្រអាចដើរចូលក្នុងកីឡដ្ឋានបាន។ អនុលោមតាមគោលការណ៍ណែនាំ ដែលត្រូវបានបង្កើតឡើងក្រោមការត្រួតពិនិត្យរបស់អ្នកឯកទេសខាងជំងឺឆ្លង បន្ថែមពីលើការពាក់ម៉ាស់ការពារ អ្នកទស្សនាតម្រូវឱ្យស្ទង់កម្តៅ និងមានជែលសម្លាប់មេរោគនៅពេលចូលក្នុងកីឡដ្ឋាន។
អ្នកទស្សនាត្រូវបានដាក់ឱ្យអង្គុយនៅចន្លោះឆ្ងាយពីគ្នា តាមច្បាប់រក្សាគម្លាតពីសង្គមរបស់ប្រទេស។ លើសពីនេះទៅទៀត ដើម្បីការពារការឆ្លងដោយសារការទំនាក់ទំនងគ្នា ការគាំទ្រអំឡុងពេលការប្រកួតត្រូវបានរឹតត្បិត ហើយការស្រែកខ្លាំងៗ ការច្រៀងចម្រៀង, ការអបអរជាមួយគ្នា, កន្សែងរុំ និងទង់ជាតិតំណាងក្រុមតម្រូវឱ្យមានការកាត់បន្ថយ។
សូមបញ្ជាក់ថាឆ្លងកាត់ការប្រកួតចំនួន ៤ សប្តាហ៍កន្លងមក ក្រុម Kawasaki Frontale កំពុងឈរកំពូលតារាងមិនទាន់ស្គាល់បរាជ័យមាន ១០ពិន្ទុ ស្មើពិន្ទុគ្នាជាមួយក្រុម Urawa Red Diamonds ដែលនៅចំណាត់ថ្នាក់លេខ២៕ (ដកស្រង់ចេញពី NHK)
ចែករំលែកព័តមាននេះ