ឮថា ក្រោយភ្ជាប់ពាក្យ អេ យ៉ានុត ប្រកាសកាត់បន្ថយការប្រដាល់
- ភ្នំពេញ
រាជធានីភ្នំពេញ ៖ បន្ទាប់ពីភ្ជាប់ពាក្យហើយ កាលពីថ្ងៃទី៩ កក្កដា ឆ្នាំ២០២០ កីឡាការិនី អេ យ៉ានុត កូនស្រីអតីតអ្នកប្រដាល់…
រាជធានីភ្នំពេញ ៖ បន្ទាប់ពីភ្ជាប់ពាក្យហើយ កាលពីថ្ងៃទី៩ កក្កដា ឆ្នាំ២០២០ កីឡាការិនី អេ យ៉ានុត កូនស្រីអតីតអ្នកប្រដាល់…
រាជធានីភ្នំពេញ ៖ បន្ទាប់ពីភ្ជាប់ពាក្យហើយ កាលពីថ្ងៃទី៩ កក្កដា ឆ្នាំ២០២០ កីឡាការិនី អេ យ៉ានុត កូនស្រីអតីតអ្នកប្រដាល់ លោក អេ ភូថង បានអះអាងថា នាងនឹងអាចកាត់បន្ថយការប្រដាល់ ឬអាចនឹងលាឈប់ឡើងសង្វៀនតែម្ដង ជាពិសេសបើនាងបានចូលរោងការរួចរាល់ ។ ម្យ៉ាងមកពីនាងយល់ថា ខ្លួនឈានដល់វ័យត្រូវធ្វើជាស្ត្រីមេផ្ទះ និងធ្វើជាភរិយារបស់អនាគតស្វាមីនោះផង ទើបនាងគិតថា បើទោះជានាងនៅចង់ប្រដាល់ ក៏មិនអាចទៅរួច។
កញ្ញា អេ យ៉ានុត បញ្ជាក់ថា ការប្រដាល់គឺនាងនៅតែស្រលាញ់ ប៉ុន្តែបើឱ្យរូបនាងនៅតែទទួលឡើងរេញដដែលជាដដែលទៀត គឺមិនអាចនោះទេ ដើម្បីកុំឱ្យប៉ះពាល់អារម្មណ៍អនាគតស្វាមី និងក្រុមគ្រួសារសាច់ថ្លៃ។ យ៉ាងណាមិញ បើឱ្យនាងឈប់ដាច់ ក៏មិនឈប់នោះដែរ ដោយសារតែនាងនៅស្រលាញ់ និងចង់បន្តការងារជាកីឡាការិនីជម្រើសជាតិឱ្យបានមួយរយៈសិន ។ យ៉ាងហោចអាចធ្វើជាកីឡាការិនីជម្រើសជាតិ នៅពេលកម្ពុជាធ្វើជាម្ចាស់ផ្ទះការប្រកួតស៊ីហ្គេមឆ្នាំ២០២៣ដែលកម្ពុជាធ្វើជាម្ចាស់ផ្ទះសិន ទើបនាងពិចារណាក្នុងការកាត់បន្ថយ ឬលាឈប់ពីការប្រដាល់ដែលខំតស៊ូ។
ក្នុងនោះ នាងក៏អាចបន្តការងារជាគ្រូបង្វឹក ឬ ការងារជួយដល់សហព័ន្ធ ជំនួសឱ្យការកាត់បន្ថយការឡើងរេញផងដែរ ។ នាងថា គូស្នេហ៍នាង មិនហាមឃាត់នាងឡើងប្រកួតនោះទេ ប៉ុន្តែនាងក៏មិនអាចមានគូដណ្ដឹងឬស្វាមីទៅហើយ ចេះតែឡើងប្រកួតដោយគ្មានពេលធ្វើខ្លួនជាស្ត្រីមេផ្ទះបានទេ ។ នាងថា រាល់ការឡើងប្រកួត គឺរវល់ច្រើនណាស់ ទាំងការត្រៀមខ្លួន ទាំងការគិតច្រើន និងការហ្វឹកហាត់ត្រៀម ដូច្នេះហើយទើបនាងពិបាកក្នុងការទទួលប្រកួតច្រើនក្រោយពេលមានគូ ដោយនាងបញ្ជាក់ថា គឺដើម្បីទុកពេលធ្វើខ្លួនឱ្យសមជាស្ត្រីម្ដង។
យោងតាមការអះអាង កញ្ញា អេ យ៉ានុត បានសម្រេចចិត្តភ្ជាប់ពាក្យជាមួយគូដណ្ដឹងឈ្មោះ លៀប ប៉ហេង កាលពីថ្ងៃទី៩ កក្កដា ឆ្នាំ២០២០ បន្ទាប់ពីបានចំណាយពេលស្វែងយល់ចិត្តគ្នាជាយូរមកហើយ ដោយមានឪពុកម្ដាយទាំងសងខាងទទួលដឹងឮ ។ គូដណ្ដឹងរបស់នាង ត្រូវបានគេអះអាងថា គឺជាមន្ត្រីបម្រើការនៅក្នុងក្របខ័ណ្ឌនគរបាលជាតិ តែនៅមិនទាន់មានការបង្ហើបថា មានតួនាទីជាអ្វីនៅឡើយទេ ដោយគ្រាន់តែមានការបង្ហើបថា គឺជាកូនអ្នកមានមុខមាត់ម្នាក់ដែរនៅក្នុងជួរមន្ត្រីរាជការ ។
អ្នកទាំងពីរធ្លាប់ត្រូវបានគេឃើញបណ្ដើរគ្នា និងស្រលាញ់ពេញចិត្តគ្នាជាយូរមកហើយ តែមកពីមិនសូវមានការចាប់អារម្មណ៍ ទើបម្នាក់ៗមានការភ្ញាក់ផ្អើលនៅពេលអេ យ៉ានុតបង្ហាញមុខគូដណ្ដឹងនៅថ្ងៃភ្ជាប់ពាក្យ។ ពិធីនេះ ក៏បង្ហាញថាកីឡាការិនីរូបនេះ រកឃើញគូអនាគត ខុសពីការបារម្ភរបស់អ្នកគាំទ្រ ដែលថាកីឡាការិនីប្រដាល់ នឹងពិបាករកគូស្នេហ៍ ដោយសារតែបុរសៗមិនសូវចង់បាននារីៗពូកែក្បាច់គុន និងវាយតប់ ដើម្បីយកមកធ្វើជាភរិយានោះ ។
អ្នកទាំងពីរនៅមិនទាន់កំណត់ពិធីមង្គលការពេលណាឱ្យប្រាកដនៅឡើយទេ នៅក្នុងកាលៈទេសៈ ដែលជំងឺកូវីដ-១៩នៅមិនទាន់ស្ងប់ស្ងាត់នាពេលនេះ។ ភាគីខាងលោក អេភូថង បានត្រឹមតែបង្ហើបថា នឹងចាំអ៊ុតមើលវេលាសិន ហើយបើល្អត្រូវចំខែណា ពេលណា គឺនឹងចាត់ចែងតាមហ្នឹង។
គួរបញ្ជាក់ផងដែរថា អេ យ៉ានុត គឺជាកីឡាការិនីជម្រើសជាតិផ្នែកប្រដាល់សាកល ដែលមានឱកាសស្នងប្រដាល់ពីឪពុក ដោយសារតែទេពកោសល្យ និងក្ដីស្រលាញ់ ។ នាងធ្លាប់បង្ហាញមុខលើឆាកអន្តរជាតិជាច្រើនលើកមកហើយ ដោយមិនរាប់បញ្ចូលការហ្វឹកហាត់នៅក្រៅប្រទេសនោះផង ។ ប្រទេសដែលនាងធ្លាប់ទៅប្រកួតរួមមាន ចិន ថៃ ភូមា វៀតណាម និងមានសមត្ថភាពក្នុងការបង្វឹកផ្នែកប្រដាល់ និងផ្នែកល្បុក្កតោផងដែរ ។
លោក អេ ភូថង ក៏ឯកភាពផងដែរឱ្យនាងឃ្លាតឆ្ងាយពីការប្រដាល់ ខណៈដែលលោកប្រាប់ថា បើទោះមិនឈប់ទាំងស្រុង ក៏មិនអាចទទួលប្រកួតញឹកញាប់ផងដែរ។ អេ យ៉ានុត គឺជាកីឡាការិនីវ័យ១៩ឆ្នាំ ដែលមានទម្ងន់៥៤គីឡូក្រាម កម្ពស់១,៦៥ម៉ែត្រនិងជាសិស្សរៀននៅវិទ្យាល័យបាក់ទូកសព្វថ្ងៃ។ នាងអាចនឹងគិតគូមង្គលការនៅក្រោយបាក់ឌុបដែលអាចក្នុងរង្វង់ឆ្នាំ២០២២ឬមុនក្រោយនោះ ដោយមិនទាន់ច្បាស់លាស់នៅឡើយទេ៕ (កែសម្រួលដោយ ៖ បុប្ផា)
ចែករំលែកព័តមាននេះ