រាជធានីភ្នំពេញ ៖ តារាសម្តែង តារាចម្រៀង និងជាពិធីករលោកបញ្ញា សិទ្ឋិ ទើបតែទិញរថយន្តថ្មីមួយគ្រឿងបន្ទាប់ពីរថយន្តរបស់លោកត្រូវចោរលួចយកទៅបាត់នោះ ។
ដោយមិនមានសង្ឃឹមរករថយន្តឃើញវិញ ព្រោះអស់រយៈពេលជាច្រើនខមកហើយនោះ លោកបញ្ញា សិទ្ឋិ សម្រេចចិត្តទិញរថយន្តថ្មី ទាំងអារម្មណ៍នៅស្តាយរថយន្តដែលបាត់នោះនៅឡើយ ។ លោកបញ្ញា សិទ្ឋិ ចំណាយប្រាក់ទិញរថយន្តថ្មី ដោយសារតែតាំងពីបាត់រថយន្តមក លោកលំបាករាល់ពេលធ្វើដំណើរទៅណាមកណា ដោយត្រូវបង្ខំចិត្តពឹងអ្នកស្គាល់គ្នាឱ្យជួយដោះទាល់ ឬត្រូវជិះរថយន្តតាក់ស៊ី ។ ម្ល៉ោះហើយទើបលោកប្រមូលប្រាក់បានពីការងារ និងជំនួញមួយចំនួនទិញរថយន្តថ្មី ដើម្បីសម្រួលដល់កិច្ចការដែលចាំបាច់បំពេញនៅចំពោះមុខ ។
ម្ចាស់ពានរង្វាន់អប្សរាឆ្នាំ២០១៤ផ្នែក«តារាសម្តែងបានគ្រប់ទម្រង់» និងផ្នែក «គោរពពេលវេលាបានល្អឥតខ្ចោះ» បាននិយាយកាលពីពេល ថ្មីៗនេះថា «មិនអាចនៅទាំងអត់មានរថយន្តថ្មីជិះទៀតទេ ព្រោះយើងត្រូវទៅណាមកណាដោយមធ្យោបាយផ្ទាល់ខ្លួន ។ យើងមិនអាចចេះតែពឹងគេជូនទៅនេះ ជូនទៅនោះបានស្រេចចិត្តឡើយ ព្រោះអ្នកផ្សេងក៏មានការងារបំពេញដូចយើងដែរ មិនអាចចេះតែមកជូនយើងស្រេចតែចិត្តនោះទេ ។ អុីចឹងហើយទើបសម្រេចចិត្តទិញរថយន្តថ្មីតែម្តងទៅ បើទោះជាមានប្រាក់ខ្លះបានអ្នកផ្ទះជួយក៏ត្រូវតែទិញដោយសារតែរាល់ថ្ងៃនេះត្រូវទៅបំពេញការងារច្រើនគ្រប់កន្លែងបើជិះតាក់ស៊ីវិញពិតជាចំណាយច្រើន បើម្តងម្កាលនោះពិតជាមិនអីនោះទេ ។
រហូតមកទល់ពេលនេះខ្ញុំនៅមិនទាន់មានតម្រុយលើសំណុំរឿងរថយន្តចាស់ដែលបានបាត់នោះទេ ព្រោះតែយូរខែទៅហើយនៅមិនទាន់មានពន្លឺ ។ ម្ល៉ោះហើយខ្ញុំខ្ជិលតាមដានតទៅទៀតទុករឿងនេះឲ្យប៉ូលិសស្រាវជ្រាវតែម្តងទៅអាចមានសំណាងរកឃើញវិញ ។ បើទោះជាក្នុងចិត្តស្តាយប្រាក់ញើសឈាមក៏មិនដឹងទៅដើររកទីណា បើយូរទៅស្ងាត់ឈឹងបែបនេះ» ។
រថយន្តថ្មីដែលលោកបញ្ញា សិទ្ឋិ ទិញនោះគឺមា៉កឡិចស៊ីសមានតម្លៃជាង១ម៉ឺនដុល្លារ ។ លោកគ្មានបំណងចង់បង្ហាញរថយន្តថ្មីដល់សាធារណជនប៉ុន្មានទេ ដោយសារតែមានអ្នកប្រើល្អជាង និងមិនមានគំនិតអួតអាងឡើយ។ លោកទិញរថយន្តថ្មីជិះនេះដើម្បីសម្រួលការ ងារ ។ តាំងពីទិញរថយន្តមក ទៅណាមកណាមិនខកខានទេ ពោលគឺគោរពពេលវេលាការងារបានល្អដោយមិនធ្វើឲ្យអ្នកដែលលោកទទួលការងារជាមួយខកខាន ឬអាក់អន់ចិត្ត និងមិនចង់ឲ្យគេវាយតម្លៃថា ជាតារាលេងឫកពាមកយឺតយា៉វទេ ។
ចំពោះគម្រោងទៅអាមេរិកដែលត្រូវខកដំណើរជាច្រើនលើក ព្រោះស្ថានទូតអាមេរិកមិនអនុញ្ញាតនោះ លោកបញ្ញា សិទ្ឋិ បញ្ជាក់ថា នៅពាក់កណ្តាលខែមករាខាងមុខ លោកត្រូវចូលស្ថានទូតអាមេរិកសម្ភាសន៍ទៀតហើយ។ ម្តងនេះលោកត្រៀមសំណុំឯកសារដែលខ្វះខាតពីមុនតាមការប្រាប់ពីស្ថានទូតដោយរំពឹងថាទទួលបានជោគជ័យ ។ រឿងទៅអាមេរិកនេះលោកព្យាយាមច្រើនដើម្បីបញ្ជាក់ថា ពិតជាគ្មានបំណងគេចចេញពីស្រុកខ្មែរឡើយ ។ បើចង់គេចនៅអាមេរិក លោកមិនហ៊ានរកអ្នកធានាទេ ហើយក៏មិនហ៊ានយកប្លង់ដី ប្លង់ផ្ទះរបស់ឪពុកទៅដាក់ធានាដើម្បីបញ្ជាក់ភាពស្មោះត្រង់ចំពោះរឿងទៅអាមេរិកនេះដែរ ។
លោកបញ្ញា សិទ្ឋិ បានប្រឡូកអាជីពសិល្បៈអស់រយៈពេលជិត១០ឆ្នាំមកហើយ ។ លោកសិទ្ធិ ធ្លាប់សម្តែងក្នុងរឿង«ទឹកចិត្តឪពុក» «មមាជប្រឡែងភ្លើង» និងរឿង«ឃា្លតទៅសែនឆ្ងាយ» ជាដើម ។ លោកបានក្លាយជាសមាជិកក្រុមចម្រៀងរបស់ផលិតកម្មក្លាស៊ីករយៈពេលជាង២ឆ្នាំ និងចុងក្រោយនេះ ធ្វើជាពិធីករនៅស្ថានីយទូរទស្សន៍មួយចំនួនទៀត ។
លោកបញ្ញា សិទ្ឋិ រំភើបរីករាយដោយសារតែឆ្នាំ២០១៤កន្លង មហាជនបោះឆ្នោតគាំទ្រលោកឱ្យជាប់ «ជាតារាសម្តែងបានគ្រប់ទម្រង់» ក្នុងកម្មវិធីប្រកួតដណ្តើមពានរង្វាន់អប្សរាឆ្នាំ២០១៤ និងបានពាន «តារាគោរពពេលវេលាល្អ» ៕
ចែករំលែកព័តមាននេះ