រាជធានីភ្នំពេញ ៖ តារាសម្តែងកញ្ញាឌី សូនីតា បានទម្លាយចេញរឿងមួយដែលមហាជនមិនបានដឹង អំឡុងពេលនាងធ្លាប់កើតជំងឺបាក់ទឹកចិត្តខ្លាំង ។ នាងបានបង្ហើបពីមនុស្សម្នាក់ដែលធ្វើឲ្យនាងក្លាយជាមនុស្សបាក់ទឹកចិត្តនាពេលនោះ ។
ឌី សូនីតា បានបង្ហោះសារកាលពីពេល ថ្មីៗកន្លងមកថា «១ឆ្នាំកន្លងមកដែលខ្ញុំញញឹមទាំងទឹកភ្នែក ស្រក់មក ម្តងៗស្ទើរក្លាយជាឈាម កើតជំងឺបាក់ទឹកចិត្តក៏នៅតែស៊ូ ឈឺចាប់ រហូតដល់ឆ្អែត ឆ្អែតរហូតដល់ចាប់ផ្តើមប្រឹងម្តងទៀតសាជាថ្មី ទម្រាំតែរកខ្លួនឯងត្រឡប់មកវិញបាន ស្ទើរតែចុះចាញ់ ម្តងៗ ក៏ព្រោះតែពាក្យថាជួយ ក៏ព្រោះតែពាក្យថាទឹកចិត្ត ក៏ព្រោះតែពាក្យថាស្មោះ ។ វាបានបំផ្លាញខ្ញុំស្ទើរតែមិនអាចរស់បន្តទៀតបានក្នុងអំឡុងពេលនោះ តែខ្ញុំមិនបង្ហាញឲ្យសាធារណៈដឹងទេ ព្រោះខ្ញុំបានសន្យានឹងខ្លួនឯងថា «ខ្ញុំជាមនុស្សដែលឲ្យក្តីសង្ឃឹមទៅគេ មិនមែនរំពឹងក្តីសង្ឃឹមពីគេមកវិញទេ» ។
រហូតមកដល់ពេលដែលខ្ញុំរឹងមាំហើយវិលត្រឡប់មកជាខ្លួនឯងសាជាថ្មី បងក៏ត្រឡប់មកវិញម្តងទៀត សួរថាមកលើកនេះចង់សម្លាប់ខ្ញុំម្តងទៀតមែនទេ ? សម្លាប់ត្រឹមខ្ញុំបាន ព្រោះខ្ញុំបានស្គាល់រសជាតិហើយ តែបើចង់ប៉ះពាល់អារម្មណ៍គ្រួសារខ្ញុំមិនបានទេ ព្រោះអ្នកដែលត្រូវស្លាប់លើកនេះ មិនមែនជាខ្ញុំ ហើយនិងគ្រួសារខ្ញុំ ។ មេរៀននេះខ្ញុំរៀនពីគ្រូ អ៊ីចឹងខ្ញុំគ្រាន់តែយកវាមកអនុវត្តតាមគ្រូវិញប្រហែលមិនខុសទេ កុំចូលមកចង្អៀតក្នុងជីវិតខ្ញុំអី »។
សារដែលឌី សូនីតា បានបង្ហោះនេះអាចបញ្ជាក់ថា នៅពីក្រោយដែលធ្វើឲ្យនាងបាក់ទឹកចិត្តខ្លាំងជាបុរសម្នាក់ដែលនាងមិនបង្ហាញអត្តសញ្ញាណ ។
ឌី សូនីតា បានវិលមកកាន់អាជីពសិល្បៈរបស់ខ្លួនឡើងវិញ បន្ទាប់ពីនាងបានជួបរឿងរ៉ាវដ៏អាប់អួស្ទើរធ្វើឲ្យនាងលែងហ៊ានចេញមុខជាសាធារណៈ ។ បន្ទាប់ពីរឿងរ៉ាវបានវិលមករកភាពល្អប្រសើរវិញនោះ ឌី សូនីតា បានរំលេចខ្លួនចូលឆាកសម្តែងឡើងវិញ ក្នុងនោះនាងបានថតជាវីដេអូ ខ្លីៗជាមួយដៃគូលោកអាឡិច ហ្សូរ៉ា បង្ហោះតាមហ្វេសប៊ុកដែលទទួលបានការគាំយ៉ាងច្រើន។ បច្ចុប្បន្នក្រៅពីការងារសិល្បៈនោះនាង ក៏មានការមមាញឹកផងដែរជាមួយនឹងជំនួញសម្អាងផ្ទាល់ខ្លួនដែលនាងទើបតែដំណើរការ ។
ឌី សូនីតា បានសាងស្នេហ៍ក្រៅឆាកជាមួយនឹងលោកអាឡិច ហ្សូរ៉ា ប៉ុន្តែរហូតមកទល់ពេលនេះអ្នកទាំងពីរនៅមិនទាន់លេចឮដំណឹងចូលរោងការនៅពេលណាមួយនៅឡើយទេ ៕
ចែករំលែកព័តមាននេះ