រាជធានីភ្នំពេញ ៖ ពលរដ្ឋខ្មែររយៈពេលប៉ុន្មានឆ្នាំចុងក្រោយនេះពេញនិយមហាត់ប្រាណជាខ្លះ ដូចជាមុនមានវត្តមានកូវីដ ១៩ គឺពលរដ្ឋនៅភ្នំពេញ និងតាមបណ្តាខេត្តមួយចំនួននិយមហាត់ប្រាណជាក្រុមតាមសួនច្បារតាមរយៈការរាំ ឬកាយវិការហាត់ប្រាណផ្សេងៗ ខ្លះទៀតក៏រត់តិចៗ ឬក៏វាយសី…
រាជធានីភ្នំពេញ ៖ ពលរដ្ឋខ្មែររយៈពេលប៉ុន្មានឆ្នាំចុងក្រោយនេះពេញនិយមហាត់ប្រាណជាខ្លះ ដូចជាមុនមានវត្តមានកូវីដ ១៩ គឺពលរដ្ឋនៅភ្នំពេញ និងតាមបណ្តាខេត្តមួយចំនួននិយមហាត់ប្រាណជាក្រុមតាមសួនច្បារតាមរយៈការរាំ ឬកាយវិការហាត់ប្រាណផ្សេងៗ ខ្លះទៀតក៏រត់តិចៗ ឬក៏វាយសី ខ្លះក៏ហាត់នៅក្លឹបហាត់ប្រាណជាមួយនឹងឧបករណ៍ចម្រុះភាព ដើម្បីលើកជាសាច់ដុំ និងបញ្ចេញញើស ។
ហើយខណៈមានវត្តមានកូវីដ មនុស្សងាកមកហាត់ប្រាណភាគច្រើនតាមរយៈការជិះកង់ក្នុងបុរីលំនៅឋាន ឬតាមចិញ្ចើមផ្លូវ និងសួនច្បារសាធារណៈ ។ ក៏ប៉ុន្តែលោកឧកញ្ញ៉ាវេជ្ជបណ្ឌិត គួច ម៉េងលី ស្ថាបនិកប្រធានក្រុមប្រឹក្សាភិបាល និងជាអគ្គនាយកប្រតិបត្តិនៃក្រុមហ៊ុន ម៉េងលីជេ.គួច អេឌ្យូខេសិន ម.ក ក្នុងបទសម្ភាសន៍ជាមួយនឹងសហការីនៃសារព័ត៌មានកោះសន្តិភាព បានមានប្រសាសន៍ថា មនុស្សភាគច្រើនបានធ្វើការហាត់ប្រាណមិនត្រឹមត្រូវនោះទេ ដូចជា ហាត់ប្រាណនៅតាមចិញ្ចើមផ្លូវ ការហាត់ប្រាណទាញឧបករណ៍សាច់ដុំខ្លាំងពេកជាដើម ។
លោកឧកញ្ញ៉ាវេជ្ជបណ្ឌិត គួច ម៉េងលី បានបង្ហើបឲ្យដឹងថា ពេលវេលាហាត់ប្រាណដែលល្អបំផុតសម្រាប់សុខភាពរបស់មនុស្ស គឺពេលព្រលឹម និងពេលល្ងាច ចន្លោះពីម៉ោង៣ ទៅម៉ោង ៥ រសៀល ព្រោះពេលវេលានេះ គឺជាពេលវេលាពោរពេញដោយសារជាតិវីតាមីន D ដែលខ្លួនមនុស្សយើងស្រូបយកទៅប្រើប្រាស់ច្នៃប្រែទៅជាកាល់ស្យូមអីបានដែលជួយទប់ឆ្អឹង ដែលជាវីតាមីនពីធម្មជាតិ ។
លោកឧកញ្ញ៉ាវេជ្ជបណ្ឌិត បានបញ្ជាក់ថា «ការហាត់ប្រាណល្អបំផុត គឺហាត់ប្រាណកន្លែងណាដែលមានធម្មជាតិបរិសុទ្ធ ដើម្បីយើងដកដង្ហើម ។ ព្រោះពេលយើងហាត់ប្រាណបេះដូងយើងលោតខ្លាំង អ៊ីចឹងយើងដកដង្ហើមលឿនណាស់ អ៊ីចឹងពេលដកដង្ហើមលឿនយើងស្រូបខ្យល់ចូលខ្លាំងទើបត្រូវរកកន្លែងមានខ្យល់បរិសុទ្ធល្អ» ។ «តែខ្ញុំសង្កេតយើងបងប្អូនយើងខ្លះហាត់ប្រាណនៅចិញ្ចើមផ្លូវ កន្លែងឡានម៉ូតូបើកទូទៅ ។ ត្រង់នេះយើងគិតថា យើងល្ងង់ក៏បានដែរ ព្រោះគេមិនឲ្យហាត់ប្រាណកន្លែងណាដែលមានយានយន្តច្រើន អញ្ចឹងទេ ព្រោះពេលហាត់ប្រាណ គឺយើងហត់ ហើយយើងដកដង្ហើមខ្លាំង ដល់ពេលដកដង្ហើមខ្លាំង គឺ យើងបឺតជាតិពុលច្រើនហើយ ។
អញ្ចឹងការហាត់ប្រាណ គឺគេឲ្យហាត់ប្រាណកន្លែងណាស្រឡះធម្មជាតិ កន្លែងណាដែលមានខ្យល់បរិសុទ្ធ និងពេលព្រលឹម ជាពេលអត់ទាន់មានជាតិពុល និងការហាត់ពេលរសៀល ថ្ងៃលិចទៅពោរពេញដោយវីតាមីន D ។ ហើយហាត់ប្រាណមិនមែនជិះកង់មិនមែនលើកអាល់ទែរ ហើយហាត់ប្រាណមិនមែនរត់ឲ្យខ្លាំងៗណាណីនោះទេ ព្រោះវានាំឲ្យខូចសាច់ដុំ វាប៉ះទង្គិចអនាគតវាឆាប់ចាស់ និងឆាប់ស្លាប់ទៅវិញទេ ឆាប់ខូចសាច់ដុំ ឆាប់ខូចសរសៃ ។
នេះជាការអះអាងរបស់លោកឧកញ្ញ៉ាវេជ្ជបណ្ឌិត គួច ម៉េងលី អ្នកជំនាញខាងសុខភាពរូបនេះបានបន្តថា ការហាត់ប្រាណត្រឹមត្រូវបំផុត គឺគេឲ្យយើងធ្វើមួយអាទិត្យ ត្រឹម ៣ ទៅ ៤ ដង ហើយរាល់ការហាត់ប្រាណម្តងៗគួរធ្វើត្រឹមចន្លោះ ៣០នាទី ទៅ ៤៥ នាទី គឺគ្រប់គ្រាន់សម្រាប់សុខភាពហើយ ។
លោកបានបន្តថា ទោះបីជាលោកអ្នកចំណាយពេលហាត់ប្រាណយូរលើសពី ៣០ ទៅ ៤៥ នាទីក៏អត់បានប្រយោជន៍អីដែរ ព្រោះរាងកាយមិនចាំបាច់ត្រូវធ្វើដល់ថ្នាក់នោះឡើយ ។ សំខាន់ជាងនេះទៅទៀត លោកឧកញ្ញ៉ាវេជ្ជបណ្ឌិតបានថ្លែងបញ្ជាក់យ៉ាងច្បាស់ៗថា «ការហាត់ប្រាណត្រឹមត្រូវ និងល្អបំផុតសម្រាប់សុខភាព គឺមានតែពីររបៀបប៉ុណ្ណោះ គឺការហាត់ប្រាណរបៀបរត់ល្មមៗ (jogging) និងការដើរ (Walking) ដើម្បីឲ្យបេះដូងយើងធាក់ទៅស៊ាំ ។ មិនចាំបាច់ហាត់ប្រាណខ្លាំងទាញខ្លាំងៗ លើកធ្ងន់ៗ ឬធាក់ជើងសាច់ដុំ វាជួយបានដែរ តែល្អបំផុត គឺ walk និង jogging» ៕
ចែករំលែកព័តមាននេះ