អន្តរជាតិ ៖ កីឡាករ​វាយ​កូន​បាល់ (Tennis) លំដាប់​លេខ ១៩ ពិភពលោក Grigor Dimitrov ដែល​បាន​លេង​នៅ​ក្នុង​ព្រឹត្តិការណ៍ Adria Tour នា​ពេល​ថ្មី​ៗ​នេះ ដែល​បង្កើត​ឡើង​ដោយ​កីឡាករ Novak Djokovic បាន​ធ្វើតេស្តរក​ឃើញ​មាន​កូ​វី​ដ​-១៩​។

កីឡាករ​ប៊ុល​ហ្គា​រី​វ័យ ២៩ ឆ្នាំ​រូប​នេះ បាន​ដកខ្លួន​ចេញពី​ការ​ប្រកួត​លើក​ទី ២ នៅ​ទីក្រុង Zadar ប្រទេស​ក្រូ​អាត​កាលពី​ថ្ងៃ​សៅរ៍ ដោយ​មាន​អាកា​រៈ​ឈឺ​។

បន្ទាប់​ពី​ទទួល​បាន​ដំណឹង​នេះ ​អ្នក​រៀបចំបាន​សម្រេច​លុប​ចោលព្រឹត្តិការណ៍នេះ ដើម្បី​សុវត្ថិភាពដល់​អ្នក​រាល់គ្នា​។ ខណៈ​កីឡាករ​ស៊ែ​ប​វ័យ ៣៣​ឆ្នាំ​រូប​នេះ និងអ្នកដទៃទៀត នឹង​ត្រូវ​ឆ្លងកាត់​ការ​ធ្វើតេស្ត​រក​វីរុស​នេះ​ផង​ដែរ​។ បន្ទាប់​ពួកគេ​មាន​ទំនាក់ទំនង​ជិត​ស្និត​ជាមួយ Dimitrov អំឡុង​ពេលលេង​ព្រឹត្តិការណ៍​នេះ​។

Dimitrov ដែល​បាន​លេង​នៅ​ក្នុង​ព្រឹត្តិការណ៍​ដំបូង​នៅ Belgrade កាលពី​ស​ប្តា​ហ៍​មុន​បាន​សរសេរ​នៅ​លើ Instagram ថា «​ខ្ញុំ​បាន​ធ្វើតេស្ត​វិជ្ជមាន​កូ​វី​ដ​-១៩ នៅ​ប្រទេស​ម៉ូ​ណា​កូ​។ អ្នក​ទាំងអស់​គ្នា​ត្រូវ​មានការ​ប្រុង​ប្រយ័ត្ន​ជា​ចាំបាច់​។ ខ្ញុំ​ពិតជា​សោកស្តាយ​ចំពោះ​រឿង​ដែល​កើតឡើង ដែល​អាច​បង្ក​ឱ្យ​មាន​ហានិភ័យ​។ ឥលូវ​ខ្ញុំ​បាន​ត្រលប់​មក​ផ្ទះ​វិញ​ហើយ ហើយ​ខ្ញុំ​ក៏​បាន​ធូរស្បើយ​បន្តិច​ដែរ​។ សូម​អរគុណ​ចំពោះ​ការ​គាំទ្រ​របស់​អ្នក ហើយ​សូម​មាន​សុវត្ថិភាព និង​សុខភាព​ល្អ​»​។

សូម​ជម្រាប​ជូន​ថា ព្រឹត្តិការណ៍ Adria Tour ត្រូវ​បាន​បង្កើត​ឡើង​ដោយ​កីឡាករ​លំដាប់​លេខ ១ ពិភពលោក Djokovic ដោយ​ធ្វើ​ដំណើរ​ប្រកួត​នៅ​ប្រទេស​ចំនួន​៤ ដើម្បី​រក​ប្រាក់​ជួយ​ដល់​កីឡាករ​វាយ​កូន​បាល់​ទាំងអស់ ដែល​រង​ផល​ប៉ះពាល់​ដោយសារ​កូ​វី​ដ​-១៩​។ ការ​ប្រកួត​នេះ មានការ​ចូលរួម​ពី​កីឡាករ​កំពូល​ទាំង​១០ ក្នុង​នោះ​រួម​មាន Djokovic, Alexander Zverev និង Dominic Thiem ។ ដោយ​បាន​ទាក់ទាញ​អ្នកគាំទ្រ​ជា​ច្រើន​ពាន់​នាក់​ផង​ដែរ​៕ (ដកស្រង់​ចេញពី៖ ESPN)