រាជធានីភ្នំពេញ ៖ គណៈកម្មការចំរុះដឹកនាំដោយលោកលឿង រដ្ឋា មន្ត្រីជំនាញកាំកុងត្រូល និងមានការចូលរួមពីលោកឯក ឃុនឌឿន អភិបាលរងខណ្ឌដូនពេញ នគរបាលនាយកដ្ឋានប្រឆាំងបទល្មើសសេដ្ឋកិច្ច ព្រមទាំងផ្នែកពាក់ព័ន្ធជាច្រើននាក់ទៀត បានឆ្មក់ចូលបង្ក្រាបទីតាំងស្តុកសត្វក្រួច ខូចគុណភាពដ៏ធំមួយកន្លែង នាំចូលពីប្រទេសវៀតណាម នៅផ្ទះលេខ៨៣អឺសូន្យហ្សិត ផ្លូវលេខ១១០ សង្កាត់វត្តភ្នំ ខណ្ឌដូនពេញ កាលពី ព្រឹកថ្ងៃទី៧ ធ្នូ ២០១០ ។ លោកលឿង រដ្ឋា អនុប្រធាននាយកដ្ឋានដោះស្រាយវិវាទ និងគោលនយោបាយទូទៅនៃអគ្គនាយកដ្ឋានកាំកុងត្រូលដែលដឹកនាំសហការជាមួយសមត្ថកិច្ចពាក់ព័ន្ធចុះបង្ក្រាបទីតាំងស្តុកសត្វក្រួចខូចគុណភាពដ៏ធំនេះបានឱ្យដឹងថា បន្ទាប់ពីសមត្ថកិច្ចជំនាញកាំកុងត្រូលធ្វើការតាមដានអស់រយៈពេលជាច្រើនថ្ងៃរួចមក ទើបដឹងថា មានឈ្មួញលួចស្តុកសត្វក្រួច ខូចគុណភាពនាំចូលពីប្រទេសវៀតណាម ដាក់លក់នៅផ្ទះលេខ៨៣អឺសូន្យហ្សិត ផ្លូវលេខ១១០ សង្កាត់វត្តភ្នំ ខណ្ឌដូនពេញនោះ យើងក៏រៀបចំកំលាំងចំរុះចុះបង្ក្រាបតែម្តង គឺនៅព្រឹកថ្ងៃទី៧ ធ្នូ ២០១០ ស្ថាប័នកាំកុងត្រូលបានបង្កើតគណៈកម្មការចំរុះមួយមាននគរបាលនាយកដ្ឋានប្រឆាំងបទល្មើសសេដ្ឋកិច្ច អាជ្ញាធរខណ្ឌដូនពេញ និងមន្ត្រីសង្កាត់ចូលរួមពិនិត្យទីតាំងខាងលើ ។
ជាលទ្ធផលរកឃើញសត្វក្រួចនាំចូលពីវៀតណាមចំនួន៥៩៨គីឡូក្រាមកន្លះ ដែលមានម្ចាស់ឈ្មោះលី គឹមជូ ភេទស្រី អាយុ៥២ឆ្នាំ ស្នាក់នៅផ្ទះលេខ៨៣អឺសូន្យហ្សិត ផ្លូវលេខ១១០ សង្កាត់វត្តភ្នំ ខណ្ឌដូនពេញ កំពុងដាក់លក់ និងត្រៀមចែកចាយទៅ តាមផ្សារផ្សេងៗនៅក្នុងរាជធានីភ្នំពេញ ។ សត្វក្រួចខូចគុណភាពទាំងនេះត្រូវបានឈ្មួញនាំចូលតាមច្រករបៀង៧ដើម ខេត្តកំពង់ចាម ជាប់ព្រំដែនប្រទេសវៀតណាម ហើយយកមកស្តុកទុកនៅទីតាំងខាងលើ ដើម្បីត្រៀមលក់ចេញ ឬចែកចាយបន្តទៀត ។ ប្រជាពលរដ្ឋដែលរស់នៅក្បែរទីតាំងស្តុកសត្វក្រួចខូចគុណភាពខាងលើបាននិយាយថា ទីតាំងខាងលើតែងតែឃើញគេនាំគ្នាសែងកេសស្នោបិទស្កុតយ៉ាងជិតចូលមកស្តុកនៅទីនោះរាប់រយកេស ប៉ុន្តែគ្មានប្រជាពលរដ្ឋដឹងថា ក្នុងកេសនោះដាក់សត្វក្រួចនោះទេ។ លុះដល់ឃើញសមត្ថកិច្ចកាំកុងត្រូលចុះចាប់ទើបម្នាក់ៗនាំគ្នាបើកភ្នែកធំៗគ្រប់ៗគ្នា ។
មន្ត្រីកាំកុងត្រូលបានឱ្យដឹងថា ចំពោះម្ចាស់ផ្ទះខាងលើមិនត្រូវបាននាំខ្លួននោះទេ តែបានធ្វើកិច្ចសន្យាឱ្យបញ្ឈប់សកម្មភាពនាំសត្វក្រួចចូលស្តុកនៅទីតាំងខាងលើ ហើយបើសិនសមត្ថកិច្ចហៅឱ្យចូលបំភ្លឺពេលណាត្រូវតែមានវត្តមាន។ ដោយឡែកសត្វក្រួចដែលដកហូតនោះនឹងយកទៅកំទេចចោលនៅក្នុងសង្កាត់ក្រាំងធ្នង់ ខណ្ឌដង្កោ ។ លោកលឿង រដ្ឋា បានមានប្រសាសន៍ថា ជាទូទៅខាងជំនាញកាំកុងត្រូលតែងតែឃ្លាំមើល និងបង្ក្រាបយ៉ាងតឹងតែងចំពោះទំនិញខូចគុណភាព និងខុសច្បាប់ ប៉ុន្តែការទប់ស្កាត់និងបង្ក្រាបយ៉ាងណាក៏នៅតែមិនអស់…ដូចជាការលួចនាំចូលតាមច្រករបៀងជាដើម ។ ដោយហេតុផលនេះហើយ ទើបអគ្គនាយកដ្ឋានកាំកុងត្រូលបានដាក់បញ្ជាឱ្យមន្ត្រីជំនាញក្រោមឱវាទរបស់ខ្លួនតាមដានទំនិញខូចគុណភាពនៅតាមផ្សារផ្សេងៗ ហាង ឬផ្ទះលួចលាក់ស្តុកទំនិញ ទើបឈានដល់ការចុះបង្ក្រាបដូចខាងលើនេះ ៕
ចែករំលែកព័តមាននេះ