រាជធានីភ្នំពេញ ៖ អ្នកភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ចំនួន៣៥គ្រួសារតំណាងឱ្យ១៤៥គ្រួសារ បានប្រមូលផ្ដុំគ្នាវេលាម៉ោង១១ព្រឹកថ្ងៃទី១៩ មិថុនា ឆ្នាំ២០២០ ធ្វើការរារាំងសកម្មភាពជនមិនស្គាល់មុខដែលមិនដឹងថា ជាយោធាឬខាងណានោះទេ បានបន្តលួចបំពានចាក់ដីនៅលើដីជាង៤ហិកតាប៉ុន្តែពួកគាត់សង្ស័យថាជាយោធាអ្នកចាក់តែម្ដងព្រោះបានចិញ្ចឹមចិត្តចង់បានដីនេះយូរហើយ ។
ចំណែកដីនេះ ត្រូវបានសម្ដេចអគ្គមហាសេនាបតីតេជោ ហ៊ុន សែន បានចេញចំណារបែងចែកប្រគល់ជូនពួកគាត់រួចហើយ ប៉ុន្តែខាងយោធាការពារអាកាសវរសេនាតូច៩១ មិនព្រមប្រគល់ជូនពួកគាត់វិញនោះ និងបង្កជាទំនាស់រាប់ឆ្នាំមកហើយនោះ ។ ហើយអ្នកភូមិទាំងនោះបានសំណូមពរដល់អាជ្ញាធរគ្រប់លំដាក់ថ្នាក់ជួយចេញប័ណ្ណកម្មសិទ្ធិជូនពួកគាត់និងជួយដោះស្រាយអនុវត្តចំណារដ៏ខ្ពង់ខ្ពស់របស់សម្ដេចតេជោផង។ម្យ៉ាងទៀតបើនៅតែគ្មានដំណោះស្រាយទៀតពួកគាត់និងធ្វើការពុះអង្កន់ដីនេះជាឡូត៌ៗ ចែកគ្នាកាន់កាប់ធ្វើផ្ទះនៅហើយមិនអាចឲ្យអ្នកផ្សេងចេះតែរំលោភបំពានយកតទៅទៀតបែបនេះទេ។
និយភូមិបាននិយាយថា ការតវ៉ានេះពុំមែនជាលើកទី១នោះឡើយពួកគាត់បានធ្វើអស់រយៈពេលជិត២០ឆ្នាំមកហើយ តាំងពីចាប់ផ្ដើមមានទំនាស់ដ៏រ៉ាំរ៉ៃជាមួយអង្គភាពយោធា មូលដ្ឋានកងការពារអាកាសវរៈ៩១ ដែលពួកគាត់ចោទថាខ្ចីដីប្រើប្រាស់ហើយមិនព្រមសង។មិនតែប៉ុណ្ណោះក្រោយពីមានទំនាស់ក៏មានចំណាររបស់សម្ដេចអគ្គមហាសេនាបតីតេជោហ៊ុន សែន បែងចែកដីរួចរាល់អស់ហើយក៏នៅតែយោធាអត់ព្រមប្រគល់ដីឲ្យពួកគាត់ទៀត។មិនតែប៉ុណ្ណោះកន្លងមកខាងយោធាក៏តែងតែបានរំលោភបំពានលួចចាក់ដីជាបន្តបន្ទាប់ ហើយនៅពេលណាពួកគាត់តវ៉ាបញ្ឈប់សកម្មភាព លុះដល់ពេលពួកគាត់ស្ងប់ស្ងាត់យោធាបានបន្តការចាក់ដី ដោយឡែកពេលនេះស្រាប់តែមានអ្នកលួចចាក់ដីដដែលនេះទៀត ហើយពួកគាត់ពុំទាន់ដឹងថាតើខាងយោធាជាអ្នកចាក់ឬក៏ជនណាម្នាក់ផ្សេងទៀតឡើយ។
ប្រភពដដែលបានបន្តទៀតថា នៅក្នុងការតវ៉ាលើកនេះ ពួកគាត់សំណូមពរឲ្យអាជ្ញាធរនិងក្រសួងមន្ទីរព្រមទាំងស្ថាប័នពាក់ព័ន្ធនានាមេត្តាជួយធ្វើការដោះស្រាយបញ្ចប់រឿងជូនពួកគាត់ផងព្រោះទំនាស់ជិត២០ឆ្នាំកន្លងមកហើយពុំមែនឆាប់នោះទេ ។ម្យ៉ាងយោងតាមចំណារដ៏ខ្ពង់ខ្ពស់សម្ដេចអគ្គមហាសេនាបតីតេជោហ៊ុន សែនបានកាត់ដីទំហំ៤៣,៧៥០ម៉ែត្រការ៉េប្រគល់ជូនពួកគាត់៣៥គ្រួសារតំណាងឲ្យ១៤៥គ្រួសារ ដែលជាអ្នកភូមិព្រៃទានេះរួចទៅហើយ ប៉ុន្តែមន្ត្រីថ្នាក់ក្រោមអត់អនុវត្តន៍ទើបទំនាស់ចេះតែអូសបន្លាយរហូតមកដល់សព្វថ្ងៃនេះដីកាន់តែរួមតូចទៅៗហើយគ្នានដំណោះស្រាយឡើយ។ដោយឡែកកាលពីអំឡុងចុងឆ្នាំ២០១៩ និងដើឆ្នាំ២០២០កន្លងទៅយោធាបានលួចចាក់ដីកន្លែងនោះដែរហើពួកគាត់បានតវ៉ានិងទាមទារឲ្យក្រុមការងារដែលបង្កើតឡើងដោយក្រសួងការពារជាតិជួយអនុវត្តន៍តាមចំណាររបស់សម្ដេចផងតែដូចជាស្ងាត់ឈឹង។
អ្នកភូមិបានរម្លឹកថា រយៈពេលជិត២០ឆ្នាំកន្លងមកនេះពួកគាត់តវ៉ារហូត ដោយកាលពីឆ្នាំ១៩៨៧ យោធាខាងលើស្នើរសុំខ្ចីដី ពីពួកគាត់ទំហំសរុបជាង៩ហិកតា ៣០អារដើម្បីធ្វើជាមូលដ្ឋានកងទ័ពឈរជើងការពារដែនអាកាសជាបណ្ដោះអាសន្នដោយបានសន្យាថានិងប្រគល់មកឲ្យវិញនៅពេលដែលអ្នកភូមិត្រូវការ។ដោយសារតែមានការសន្យាបែបនេះ ទើបពួកគាត់យល់ព្រមឲ្យខ្ចីដោយមិនបានគិតថាយោធាមិនគោរពពាក្យសន្យាបែបនេះឡើយ លុះដល់ឆ្នាំ២០០២ពួកគាត់បានទាមទារយកដីមកវិញដើម្បីចែកកូនចៅក្នុងភូមិ ដែលមានប្ដីមានប្រពន្ធត្រូវបែកគ្រួសារសម្រាប់រស់នៅស្រាប់តែយោធាមិនព្រមប្រគល់ឲ្យវិញឡើយ។ទើបចាប់ពីពេលនោះមកក៏មានរឿងទំនាស់កើតឡើងរហូតមកដែលកាលណោះមានលោកឧត្តមសេនីយ៍សុខ ប៉ាង ជា មេបញ្ជាការកងទ័ពវរៈ៩១នោះ ហើយការតវ៉ានេះក៏មានអាជ្ញាធរគ្រប់លំដាប់ថ្នាក់រួមនិងក្រសួងការពារជាតិផងបានចូលរួមដោះស្រាយជាបន្តបន្ទាប់។
ពួកគាត់បញ្ជាក់ថា លុះដល់ថ្ងៃទី៩ ខែកុម្ភៈ ឆ្នាំ២០១៧ សម្ដេចនាយក រដ្ឋមន្ត្រីបានចេញចំណារលេខ«០៥៩»បែងចែកដីជា៣ចំណែកទៅតាមទៅតាមសំណើរក្រសួងការពារជាតិគឺទី១,កាត់ដីទំហំជាង៣៤៣៧៣ម៉ែត្រការ៉េជូនទៅគ្រួសារកងទ័ពនៅជុំវិញបន្ទាយចំនួន១២៤គ្រួសារថែមទាំងផ្ដល់ជូនប័ណ្ណកម្មសិទ្ធិផងដែរ។ទី២,កាត់ដីទំហំ៤៣,៧៥០ម៉ែត្រការ៉េប្រគល់ជូនពួកគាត់៣៥គ្រួសារតំណាងឲ្យ១៤៥គ្រួសារ ដែលជាអ្នកភូមិព្រៃទា និងទី៣,រក្សាដីដែលនៅសល់ទំហំជាង១៤២៦៣ម៉ែត្រការ៉េប្រគល់ជូនទៅកងទ័ពរួមជាមួយដី២ហិចតាកន្លះទៀតស្ថិតនៅក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ ។បន្ទាប់មកទៀតនៅថ្ងៃទី១៤ ខែកុម្ភៈ ឆ្នាំ២០១៧ ក្រសួងការពារជាតិបានចេញសេចក្ដីសម្រេច«លេខ០៩៩សណ ២០១៧»។
បង្កើតក្រុមការងាររួមមាន៖១,នាយកដ្ឋានអធិការកិច្ចក្រសួងការពារជាតិជាប្រធាន ២ ,នាយកដ្ឋានវិស្វកម្មក្រសួងការពារជាតិជាអនុប្រធាន ៣,តំណាងអគ្គបញ្ជាការដ្ឋានកងយោធពលខេមរភូមិន្ទជាសមាជិក ៤,តំណាងបញ្ជាការដ្ឋានកងទ័ពជើងគោកជាសមាជិក ៥,តំណាងអាជ្ញាធរដែនដីរាជធានីភ្នំពេញជាសមាជិក ។អនុវត្តន៍នូវ«ចំណារដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានបែងចែកដីនេះដឹងចំណែករួចអស់ហើយនោះ »ប្រគល់ដីជូនពួកគាត់ដើម្បីបញ្ចប់រឿងទំនាស់ដ៏រ៉ាំរៃនេះ តែ ក្រោយមកនៅរយៈពេលត្រឹមតែ២ថ្ងៃទៀត ប៉ុណ្ណោះនឹងដល់ពេលត្រូវវាស់វែងប្រគល់ទៅតាមចំណែកនីមួយៗទៅហើយ ស្រាប់តែក្រុមការងារខាងលើដកខ្លួនថយអស់មិនអនុវត្តតាមចំណាររបស់សម្ដេចតេជោប្រគល់ដីនេះឲ្យអ្នកភូមិសោះទើបទំនាស់អូសបន្លាយរហូតមកសព្វថ្ងៃនេះ៕
ចែករំលែកព័តមាននេះ