រាជធានីភ្នំពេញ ៖ ម៉ូតូមួយគ្រឿងម៉ាកហុងដាឌ្រីម ធុនសេ១២៥ ត្រូវបានជនមិនស្គាល់មុខយកទៅប្លុងចោលនៅក្នុងទឹកត្រពាំងមួយកន្លែង ហើយត្រូវបានអ្នកភូមិទៅបេះត្រកួនប្រទះឃើញ រួចរាយការណ៍ជូននគរបាលឲ្យចុះទៅពិនិត្យមើល និងយកទៅរក្សាទុក ។ ប៉ុន្តែអ្វីដែលជាការកត់សម្គាល់នោះគឺនៅត្រង់ថា…
រាជធានីភ្នំពេញ ៖ ម៉ូតូមួយគ្រឿងម៉ាកហុងដាឌ្រីម ធុនសេ១២៥ ត្រូវបានជនមិនស្គាល់មុខយកទៅប្លុងចោលនៅក្នុងទឹកត្រពាំងមួយកន្លែង ហើយត្រូវបានអ្នកភូមិទៅបេះត្រកួនប្រទះឃើញ រួចរាយការណ៍ជូននគរបាលឲ្យចុះទៅពិនិត្យមើល និងយកទៅរក្សាទុក ។ ប៉ុន្តែអ្វីដែលជាការកត់សម្គាល់នោះគឺនៅត្រង់ថា នៅមានកូនសោរជាប់នៅនឹងម៉ូតូ ព្រមទាំងមានអត្តសញ្ញាណប័ណ្ណ និងកាតគ្រី ព្រមទាំងឯកសារមួយចំនួនទៀតនៅក្នុងកូនកាបូបទុកនៅក្រោមកែបម៉ូតូនោះថែមទៀតផង ហើយនគរបាលកំពុងធ្វើការស្រាវជ្រាវរកម្ចាស់ឲ្យមកទទួលយកវិញ។
ហេតុការណ៍ខាងលើនេះបានកើតឡើងកាលពីវេលាម៉ោង៨ព្រឹកថ្ងៃទី១១ ខែមិថុនា ឆ្នាំ២០២០ នៅក្នុងទឹកត្រពាំង ស្ថិតនៅក្នុងភូមិត្រពាំងអណ្ដូង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
ម៉ូតូមួយគ្រឿងដែលប្រទះឃើញក្នុងទឹកត្រពាំងខាងលើម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ ភ្នំពេញ ១GL-២៨២៥ បើយោងតាមកាតគ្រីដែលទុកនៅក្រោមកែបម៉ូតូនេះគឺជាកម្មសិទ្ធិរបស់ក្រុមហ៊ុន ខេខេហ្វាន់ លីសុីង ភីអិលសុី (KK FUND LEASING PLC) ដែលមានអាស័យដ្ឋានផ្ទះលេខ៧៥៩ ផ្លូវលេខ៩៣ សង្កាត់បឹងត្របែក ខណ្ឌចំការមន រាជធានីភ្នំពេញ។
ដោយឡែកអត្តសញ្ញាណប័ណ្ណ១សន្លឹកទៀតដែលទុកនៅក្រោមកែបម៉ូតូជាមួយកាតគ្រីដែរនោះលេខ 101334718 មានឈ្មោះខាន់ ម៉ៅ កើតថ្ងៃទី១៣ ខែតុលា ឆ្នាំ១៩៨៥ នៅឃុំបឹងត្រាញ់ខាងត្បូង ស្រុកសំរោង ខេត្តតាកែវ ។ អាស័យដ្ឋានបច្ចុប្បន្នភូមិដំណាក់រវាង ឃុំពពេល ស្រុកត្រាំកក់ ខេត្តតាកែវ។ក្រៅពីនេះក៏នៅមានកាតATM រួមនិងប័ណ្ណបើកបររថយន្តផងដែរ។
តាមប្រភពព័ត៌មានបានឲ្យដឹងថា នៅមុនពេលកើតហេតុ អ្នកភូមិបាននាំគ្នាទៅបេះបន្លែត្រកួននៅចំណុចវាលស្រែនោះ ហើយបានប្រទះឃើញម៉ូតូមួយគ្រឿងនេះនៅក្នុងទឹកត្រពាំងខាងលើ រួចក៏រាយការណ៍ជូននគរបាលឲ្យចុះទៅពិនិត្យមើល ។ ភ្លាមៗនោះនគរបាលប៉ុស្តិ៍ត្រពាំងក្រសាំក៏បានចុះទៅយកម៉ូតូរួចនាំទៅកាន់ប៉ុស្តិ៍នគរបាលដើម្បីរក្សាទុក និងធ្វើការស្រាវជ្រាវរកម្ចាស់ឲ្យមកទទួលយកត្រឡប់ទៅវិញ តែដោយសារតែម៉ូតូនេះមានកូនសោជាប់នឹងម៉ូតូស្រាប់ ទើបនគរបាលក៏បានចាក់បើកកែបមើល ឃើញកាតគ្រី និងអត្តសញ្ញាណប័ណ្ណ ព្រមទាំងប័ណ្ណបើកបររថយន្ត និងកាតATM នៅក្នុងកូនកាបូបដៃមួយ ។ ខណៈនោះនគរបាលបាននាំយកម៉ូតូខាងលើទៅរក្សាទុកនៅប៉ុស្តិ៍ត្រពាំងក្រសាំងជាបណ្ដោះអាសន្នសិនរង់ចាំស្វែងរកម្ចាស់ឲ្យទៅទទួលយកវិញ។
តាមប្រភពពីនគរបាលបាននិយាយថា ម៉ូតូមួយគ្រឿងខាងលើនោះត្រូវបានជនមិនស្គាល់មុខរុញទម្លាក់ចូលទៅក្នុងទឹកត្រពាំង ហើយដោយសារតែបច្ចុប្បន្ននៅតំបន់នោះកំពុងអភិវឌ្ឍន៍ចាក់ដីលុបថ្លុក និងត្រពាំងព្រមទាំងស្រែជម្រៅស្ទើរអស់ ទើបធ្វើឲ្យត្រពាំងទឹកខាងលើក្លាយទៅជាមានទឹកជម្រៅត្រឹមទ្រូង ហើយម៉ូតូ លិចបាត់ទៅក្នុងទឹក ។ បើមើលពីលើគោកទៅគឺអត់ឃើញទេ ប៉ុន្តែករណីនេះដោយសាេតែអ្នកភូមិចុះទៅបេះត្រកួន ទើបប្រទះឃើញ កុំអីមិនងាយនឹងឃើញឡើយ ហើយក៏មិនទាន់ដឹងថា តើម៉ូតូខាងលើត្រូវចោរលួចយកមកប្លុងចោលឬមានករណីអ្វីផ្សេងក្រៅពីនេះនៅឡើយទេ ទាល់តែម្ចាស់ទើបដឹងច្បាស់ ហើយពេលនេះកម្លាំងកំពុងស្វែងរកម្ចាស់តាមកាតគ្រីនិងអត្តសញ្ញាណប័ណ្ណហើយ៕ (កែសម្រួលដោយ ៖ ធីតា)
ចែករំលែកព័តមាននេះ