សម្រាប់លោកមហាសេដ្ឋីជេហ្វ បេសូស (Jeff Bezos) ដែលជានាយកប្រតិបត្តិរបស់ក្រុមហ៊ុន Amazon និងជាបុរសដែលមានទ្រព្យសម្បត្តិច្រើនជាងគេលើលោក មានលុយ ១០០លានដុល្លារប្រៀបដូចជាលុយរាយក្នុងហោប៉ៅប៉ុណ្ណោះ ឬប្រមាណតែ…
សម្រាប់លោកមហាសេដ្ឋីជេហ្វ បេសូស (Jeff Bezos) ដែលជានាយកប្រតិបត្តិរបស់ក្រុមហ៊ុន Amazon និងជាបុរសដែលមានទ្រព្យសម្បត្តិច្រើនជាងគេលើលោក មានលុយ ១០០លានដុល្លារប្រៀបដូចជាលុយរាយក្នុងហោប៉ៅប៉ុណ្ណោះ ឬប្រមាណតែ ០.៧% នៃទ្រព្យសម្បត្តិសរុបរបស់លោក ។
ប៉ុន្តែសម្រាប់អង្គការ Feeding America វិញលុយ ១០០លានដុល្លារដែលលោក បេសូស បានបរិច្ចាគកាលពីខែមេសាកន្លងមក ជាអំណោយធំជាងគេដែលអង្គការមិនគិតប្រាក់ចំណួលទទួលបានសម្រាប់ផ្តល់ជំនួយអាហារ ។
អ្នកស្រី ឃ្លែរ បាប៊ីណូហ្វុនទេណត (Claire Babineaux-Fontenot) ដែលជាប្រធានអង្គការ Feeding America បានចែករំលែកទស្សនៈរបស់អ្នកស្រីលើការបរិច្ចាគនេះ។
អ្នកស្រីបាននិយាយប្រាប់ CNBC Make It ថា ដំបូងអ្នកស្រីទទួលបានអ៊ីមែលមួយពីមនុស្សម្នាក់ដែលប្រាប់ថា ចង់និយាយជាមួយអ្នកស្រី ។ មនុស្សដែលបានផ្ញើអ៊ីមែលនោះមានទំនាក់ទំនងជិតស្និទ្ធនឹងលោក បេសូស ណាស់ ប៉ុន្តែអ្នកស្រីមិនបានបញ្ចេញឈ្មោះទេ ។
បុគ្គលខាងលើបានបន្តប្រាប់ថា លោក បេសូស ដឹងថាការផ្ទុះជំងឺកន្លងមកនេះ បានបង្កបញ្ហាជាច្រើនផ្នែកអាហារក្នុងប្រទេសនេះ ហើយលោកមានចិត្តចង់ចូលរួមជួយ ។ ដូច្នេះអ្នកទាំងពីរក៏បានពិភាក្សាបន្តពីវិធីដែលលោកអាចជួយបាន ។ យ៉ាងណាក្តី អ្នកស្រីមិនបានផ្តល់ព័ត៌មានលម្អិតពីផែនការរបស់អ្នកទាំងពីរក្នុងការប្រើថវិកាបរិច្ចាគខាងលើទេ ។
កាលពីឆ្នាំ ២០១៧ លោក បេសូស ធ្លាប់បានសរសេរលើ Twitter របស់លោកថា លោកកំពុងគិតរកយុទ្ធសាស្ត្រសប្បុរសធម៌ដែលផ្ទុយពីអ្វីដែលលោកកំពុងធ្វើជាមួយ Amazon ដែលផ្តោតសំខាន់លើពេលវែងឆ្ងាយទៅមុខ ។
គួរបញ្ជាក់ដែរថា លោក បេសូស ត្រូវបានរិះគន់ម្តងហើយម្តងទៀតពីការអសកម្មក្នុងការចូលរួមធ្វើអំពើសប្បុរសធម៌ ប៉ុន្តែបន្ទាប់ពីលោកបានសរសេរលើ Twitter នោះមក លោកបានចាប់ផ្តើមមូលនិធិ Day One Fund 2018 ដែលមានថវិកា ២ប៊ីលានដុល្លារ និងបានប្រកាសថាលោកបរិច្ចាគ ១០ប៊ីលានដុល្លារសម្រាប់ការដោះស្រាយបញ្ហាកំណើនសីតុណ្ហភាពផែនដីជាដើម ។
ក្រៅពីថវិកាពីលោកបេសូសហើយ Feeding America ក៏ទទួលបានការបរិច្ចាគពី All In Challenge ដែលបានជួយប្រមូលការបរិច្ចាគបានប្រមាណច្រើនជាង ៥៦លានដុល្លារទៅទៀត និងមានការចូលរួមពីតារាៗ និងកីឡាករចំនួន ៤៨៣នាក់ ៕ ដកស្រង់ចេញពីវេបសាយ ៖ cnbc
ចែករំលែកព័តមាននេះ