ខេត្តបាត់ដំបង ៖ សកម្មភាពភាពក្រុមចោរលួច ចោរគាស់ ទម្លុះទម្លាយលំនៅឋាន និងក្រុមចោរដើរកាច់សោ.កលួចយកម៉ូតូនៅតាមទីផ្សារ និងនៅតាមទីប្រជុំជននានានៅក្នុងខេត្តបាត់ដំបង នៅតែជាក្ដីបារម្ភយ៉ាងខ្លាំង នៅក្នុងអារម្មណ៍ពលរដ្ឋ និងធ្វើឲ្យប៉ះពាល់ធ្ងន់ធ្ងរបំផុត ដល់សន្តិសុខនៅក្នុងមូលដ្ឋាន ។ ជាពិសេសធ្វើឲ្យប៉ះពាល់ដល់ «ភូមិ ឃុំ មានសុវត្ថិភាព» ដែលជាគោលនោយោបាយដ៏ចម្បងរបស់រាជរដ្ឋាភិបាល ។
គ្រាន់តែរយៈ២ថ្ងៃជាប់ៗគ្នាកន្លងទៅនេះ ក្រុមចោរបានធ្វើសកម្មភាព «កាច់សោ.កលួចយកម៉ូតូ» របស់ប្រជាពលរដ្ឋអស់ចំនួន២គ្រឿងជាបន្តបន្ទាប់ រួចគេចខ្លួនដោយសុវត្ថិភាព ។ រីឯការទប់ស្កាត់ ឬការបង្ក្រាប ឬសូម្បីតែការកំណត់នូវមុខសញ្ញាជនសង្ស័យ ក៏សមត្ថកិច្ចហាក់មិនទាន់មានតម្រុយនៅឡើយដែរ។
បើតាមការផ្ដល់ព័ត៌មានពីសមត្ថកិច្ចបានឲ្យដឹងថា ក្រុមចោរកាច់សោ.កលួចម៉ូតូបានធ្វើសកម្មភាពជាបន្តបន្ទាប់ ដែលគេមើលឃើញថា ជាសញ្ញាមួយដែលគ្មានការថមថយឡើយ បើទោះជាសមត្ថកិច្ចជំនាញធ្លាប់បង្ក្រាបបានជាបន្តបន្ទាប់ក្ដី។
ជាក់ស្ដែង នៅវេលាម៉ោង៩ព្រឹកថ្ងៃទី០៦ មិថុនា ជនមិនស្គាល់មុខដែលមហាជនអះអាងថា ជា«ចោរ» បានធ្វើសកម្មភាពកាច់សោ.កលួចយកម៉ូតូមួយគ្រឿង នៅចំណុច«ផ្សារលើ» ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង រួចជិះគេចខ្លួនដោយសុវត្ថិភាព ដោយគ្មានខ្លាចញញើតមន្ត្រីនគរបាលដែលយាមជាប្រចាំនៅទីនោះឡើយ។
ម៉ូតូនោះម៉ាកហុងដាឌ្រីម C125 ពណ៌ខ្មៅ ស៊េរីឆ្នាំ២០១៨ ពាក់ស្លាកលេខបាត់ដំបង 1Y-7758 ជារបស់ឈ្មោះ ហោ រដ្ឋា ហៅចិត្ត ភេទប្រុស អាយុ៣៨ឆ្នាំ រស់នៅភូមិវត្តគរ សង្កាត់វត្តគរ ក្រុងបាត់ដំបង។ នៅកន្លែងកើតហេតុ លោកហោ រដ្ឋា ហៅចិត្ត បានប្រាប់កោះសន្តិភាពថា «ខ្ញុំបានទុកម៉ូតូនៅក្បែរផ្សារលើ ប៉ែកខាងត្បូង ដោយបានចាក់សោ.កត្រឹមត្រូវ រួចដើរចូលទៅទិញបន្លែ នៅក្នុងផ្សារ ។ លុះទិញហើយ ដើរមកយកម៉ូតូ ស្រាប់តែបាត់មិនឃើញម៉ូតូ ទើបផ្អើលឆោឡោតែម្ដង តែម៉ូតូនោះ ខ្ញុំមិនបានផ្ញើគេទេ»។
មន្ត្រីនគរបាលដែលយាមផ្សារលើនេះ លោកឆុន វ៉ាន់នី បានប្រាប់ដែរថា នៅផ្សារលើនេះ ក៏មានកន្លែងផ្ញើម៉ូតូដែរ តែគេមិនយកទៅផ្ញើទេ ព្រោះស្ដាយលុយ៥០០រៀល។ លោកបាននិយាយថា លោកបានដើរ
ចល័តឃ្លាំមើលគ្រប់ទីកន្លែងនៅក្នុងផ្សារ ហើយថែមទាំងបានណែនាំជាប្រចាំដល់បងប្អូនដែលជិះម៉ូតូមកផ្សារឲ្យគាត់យកទៅផ្ញើ តែពួកគាត់មិនស្ដាប់ ហើយទុកម៉ូតូធ្វេសប្រហែស រហូតមានការបាត់បង់បែបនេះ។
ដោយឡែក សាក្សីនៅទីនោះបានបញ្ជាក់ដែរថា គ្មាននរណាបានចាប់អារម្មណ៍ទៅលើចោរលួចម៉ូតូទេ ព្រោះរវល់លក់ដូរ តែមុនពេលកើតហេតុ គេឃើញមនុស្សម្នានៅជុំវិញម៉ូតូនោះ លុះស្ងាត់មនុស្ស ស្រាប់តែបាត់ម៉ូតូដែរ។
ពាក់ព័ន្ធនឹងអំពើចោរកម្មលួចម៉ូតូនេះ បើតាមសេចក្ដីរាយការណ៍ពីសមត្ថកិច្ចបានឲ្យដឹងថា កាលពីព្រឹកថ្ងៃទី០៥ មិថុនា ក៏មានជនមិនស្គាល់មុខ (ចោរ) ចូលកាច់សោលួចយកម៉ូតូមួយគ្រឿងបានសម្រេចដែរ ដែលជារបស់កូនសិស្សលោកនៅក្នុង«វត្តពោធិក្នុង» ស្ថិតក្នុងភូមិរតនៈ សង្កាត់រតនៈ ក្រុងបាត់ដំបង។ ប៉ុន្តែនៅពេលសមត្ថកិច្ចកំពុងធ្វើការស្រាវជ្រាវ មិនទាន់កំណត់បាននូវមុខសញ្ញានេះផង ស្រាប់តែនៅព្រឹកថ្ងៃទី០៦ មិថុនា ចោរបានធ្វើសកម្មភាព កាច់សោលួចយកម៉ូតូនៅផ្សារលើអស់មួយគ្រឿងទៀត.. ពិតជាគ្រាន់បើមែនលោកចោរ ?
បើតាមសមត្ថកិច្ចបានបញ្ជាក់ថា នៅថ្ងៃដែលចោរលួចម៉ូតូកូនសិស្សលោកនៅក្នុង «វត្តពោធិក្នុង» ប្រជាពលរដ្ឋក៏បានប្រទះជនម្នាក់បានព្យាយាមកាច់សោលួចយកម៉ូតូគេមួយគ្រឿង នៅម្ដុំខាងមុខអតិតបន្ទាយ
«គុយសេ» ក្នុងភូមិកម្មករ សង្កាត់ស្វាយប៉ោ ខាងលិចផ្សារលើប្រហែលជាង២០០ម៉េត្រ តែមិនបានសម្រេច ដោយសារម្ចាស់ម៉ូតូក្រឡេកឃើញទាន់ ហើយជននោះ បានងើបដើចេញពីម៉ូតូ គេចខ្លួនបាត់
ស្រមោលភ្លាមៗដែរ ។
ជុំវិញសកម្មភាពនៃអំពើចោរកម្ម ដែលគ្មានសញ្ញាថមថយនេះ គេមិនទាន់ដឹងថា តើលោកស្នងការខេត្ត ត្រូវរៀបចំយុទ្ធសាស្ត្រថ្មី ផែនការថ្មី ឬវិធានការថ្មីបែបណានោះទេ ដើម្បីទប់ស្កាត់ និងបង្ក្រាបបទល្មើសឲ្យកាន់តែមានប្រសិទ្ធភាព ខណៈលោកស្នងការរងទទួលផែនព្រហ្មទណ្ឌថ្មី ទើបចូលកាន់តំណែងបានជាងកន្លះខែ ជំនួសលោកស្នងការរងចាស់ ដែលទើបត្រូវព្រះមហាក្សត្រដាក់ឱ្យចូលនិវត្តន៍មុននេះបន្តិច ។
អតីតស្នងការរងទទួលផែនព្រហ្មទណ្ឌនៃស្នងការខេត្តបាត់ដំបង គឺលោកជេត វណ្ណនី ត្រូវមន្ត្រីនៅក្នុងអង្គភាព និងមន្ត្រីស្ទើរគ្រប់ស្ថាប័នរដ្ឋ រួមទាំងមហាជនទូទៅផងទទួលស្គាល់ថា លោកជាថ្នាក់ដឹកនាំមួយរូប ដែលមានសមត្ថភាពខ្ពស់ ក្នុងការទប់ស្កាត់ និងបង្ក្រាបបទល្មើស បើទោះជាមិនបានល្អឥតខ្ចោះក្ដី ។ ប៉ុន្តែលោកត្រូវបានព្រះមហាក្សត្រដាក់ឲ្យចូលនិវត្តន៍ កាលពីជាងកន្លះខែមុននេះ ហើយជំនួសមកវិញដោយលោកវរៈសេនីយ៍ទោ លឹម ពុទ្ធីឡា ស្នងការរងទទួលផែនព្រហ្មទណ្ឌនៃស្នងការខេត្តបាត់ដំបង ។
បើគិតចាប់តាំងពីថ្ងៃប្រកាសតំណែង លោកលឹម ពុទ្ធីឡា បានចូលកាន់តំណែងស្នងការរងទទូលផែនព្រហ្មទណ្ឌនេះ បានរយៈពេលជាង៣សប្ដាហ៍មកហើយ ស្របពេលដែលបទល្មើសនានាបានកើតឡើងជាបន្តបន្ទាប់។ ដូចជាករណី«លួច ឆក់» ហើយក៏មានបទល្មើស «ឧក្រិដ្ឋ» កើតឡើងផងដែរ។
យ៉ាងណាក៏ដោយ ទាំងមន្ត្រីនៅក្នុងអង្គភាព ទាំងមន្ត្រីតាមបណ្ដាស្ថាប័ននានា រួមទាំងប្រជាពលរដ្ឋនៅក្នុងខេត្តទាំងមូលផង សង្ឃឹមថា លោកលឹម ពុទ្ធីឡា ស្នងការរងទទូលផែនព្រហ្មពណ្ឌ ដែលទើបទើបចូលក្ដោបដំណែងបានជាង២០ថ្ងៃកន្លងទៅនេះ នឹងមិនធ្វើឲ្យពលរដ្ឋបារម្ភពីបញ្ហាអសន្តិសុខ ឬបញ្ ហា«ភូមិមានសុវត្ថភាព»ឡើយ។ ប៉ុន្តែយ៉ាងណា មហាជនហាក់កំពុងផ្ដោតខ្លាំងបំផុត ទៅលើល្បែងស៊ីសង ដែលកំពុងផុសផុលនៅក្នុងខេត្ត។ ពិសេស ល្បែង«ឆ្នោត និងល្បែងហ្គេម» ដែលជ្រកក្រោមស្លាកអុីនធើរណេត តើលោកស្នងការរងដែលទើបឡើងថ្មីរូបនេះ អាចទប់ស្កាត់ ឬបង្ក្រាបបានកម្រិតណានោះទេ ? ព្រោះល្បែងស៊ីសងទាំងនេះ អាចជាដើមចមនាំឲ្យមានអំពើចោរកម្មផ្សេងៗ ៕
ចែករំលែកព័តមាននេះ