ក្នុងកំឡុងពេលដែលពិភពលោកប្រឈមមុខនឹងជំងឺកូវីដ ១៩ តាំងពីដើមឆ្នាំ ២០២០ កន្លងមកនេះ មនុស្សជាច្រើនបានមើលឃើញមហាសេដ្ឋីធំៗជុំវិញពិភពលោកកាន់តែមានស្តុកស្តម្ភព្រោះតែកំណើននៃតម្លៃភាគហ៊ុនក្រុមហ៊ុនរបស់ខ្លួនដូចជាលោកជេហ្វ បេសូស (Jeff Bezos) របស់ Amazon ជាដើម។
ប៉ុន្តែក្នុងកំឡុងពេលនេះដែរ មានមហាសេដ្ឋីមួយចំនួនទៀតដែលបានខាតបង់ទ្រព្យសម្បត្តិរាប់លាន និងរាប់ប៊ីលានព្រោះតែកូវីដ១៩ ដូចជាលោកប៊ឺណាដ អាណូល (Bernard Arnault) ដែលជានាយកប្រតិបត្តិរបស់ក្រុមហ៊ុន LVMH ជាដើមដែលបាត់បង់អស់ ៣០ប៊ីលានដុល្លារ។ ក្រៅពីនោះហើយ មានមហាសេដ្ឋីជនជាតិចិនប៉ុន្មានរូបទៀតដែលបានជួបនឹងការខាតបង់ក្នុងមួយរំពេចភ្នែកបែបនេះដែរ។
១. ជៀ យូធីង (Jia Yueting)
លោកយូធីងបានបង្កើតក្រុមហ៊ុន Leshi Internet Information and Technology Corp (LeTV) តាំងពីឆ្នាំ ២០០៤ មក ហើយវាបានលូតលាស់មកក្លាយជាLeEco Group ដែលផ្គត់ផ្គង់ឧបករណ៍អេឡិចត្រូណិច ផ្តល់សេវាទស្សនាភាពយន្ត និងវីឌីអូផងដែរ។ លោកបានក្លាយជាមហាសេដ្ឋីនៅឆ្នាំ ២០១៦ ដោយមានទ្រព្យសម្បត្តិរួមប្រមាណ៦ប៊ីលានដុល្លារ។
បន្ទាប់ពី LeTV ទទួលរងការប៉ះពាល់ពីវិបត្តិហិរញ្ញវត្ថុក្នុងឆ្នាំ ២០១៧ លោកបានចាកចេញពី Faraday Future វិញដែលជាក្រុមហ៊ុនផលិតរថយន្តអគ្គិសនីនៅសហរដ្ឋអាមេរិក។ នៅខែតុលាឆ្នាំ ២០១៩ លោកបានប្រកាសក្ស័យធុន។
២. លោកហ្វេង ស៊ីន (Feng Xin)
ឡើងកាន់តែខ្ពស់ ធ្លាក់កាន់តែលឿន។ លោកស៊ីនដឹងពីបទពិសោធន៍នេះច្បាស់លាស់ពេលដែលលោកជានាយកប្រតិបត្តិរបស់ក្រុមហ៊ុន Baofeng Group។ នៅឆ្នាំ ២០១៥ ក្រុមហ៊ុនមានតម្លៃសរុប ១.៥៨ប៊ីលានដុល្លារមុននឹងកើនដល់ ៥១.៦ប៊ីលានដុល្លារក្នុងកំឡុងពេល៤០ថ្ងៃបន្ទាប់។
ប៉ុន្តែព្រោះតែចង់ប្រកួតប្រជែងជាមួយនឹងលោកយូធីងខាងលើ លោកស៊ីនបានទិញភាគហ៊ុន ៦៥%នៃភាគហ៊ុនរបស់ក្រុមហ៊ុន MP & Silva ក្នុងឆ្នាំ ២០១៦ ដែលបានប្រកាសក្ស័យធុនក្នុងរយៈពេល២ឆ្នាំក្រោយមក។ បច្ចុប្បន្ននេះ លោកត្រូវបានចាប់ឃុំដោយប៉ូលីសបន្ទាប់ពីបានព្យាយាមសូកប៉ាន់ ហើយក្រុមហ៊ុន Baofeng កំពុងជួបបញ្ហាហិរញ្ញវត្ថុ និងមានបុគ្គលិកតែ ១០នាក់ទេដែលនៅសេះសល់។
៣. អ្នកស្រីជូ សៀវហ្គ័ង (Zhou Xiaoguang)
អ្នកស្រីជូមានជីវិតដូចស៊ីនដេរីឡាដែរពេលដែលអ្នកស្រីក្រោកពីការរស់នៅក្នុងក្រុមគ្រួសារសាមញ្ញឡើងទៅរស់នៅជាមួយទ្រព្យសម្បត្តិ ៤៦ប៊ីលានដុល្លារ។ ពេលដែលនៅជាយុវនារី អ្នកស្រីធ្លាប់លក់រូបប៉ាក់តាមចិញ្ចើមថ្នល់។ នៅឆ្នាំ ១៩៩៥ អ្នកស្រីបានបង្កើតក្រុមហ៊ុន Neoglory Holdings Group ជាមួយស្វាមី។
១០ឆ្នាំក្រោយមក អ្នកស្រីជូមានបង្កើតឈ្មោះសម្រាប់ខ្លួនក្នុងវិស័យគ្រឿងអលង្ការ និងបានក្លាយជាអ្នកនាំមុខក្នុងវិស័យសម្លៀកបំពាក់ផងដែរ។ ប៉ុន្តែពួកគេបានជួបនូវការផ្លាស់ប្តូរទាំងស្រុងពេលដែលប្រឡូកចូលក្នុងវិស័យអចលនទ្រព្យ។ ការទិញដូរមិនស្មោះត្រង់ជាច្រើនបានធ្វើឲ្យអ្នកទាំងពីរជាប់ក្នុងបំណុលរហូតដល់សុំជំនួយពីរដ្ឋាភិបាល ៕
ចែករំលែកព័តមាននេះ