រាជធានីភ្នំពេញ ៖ តារាសម្តែងវ័យក្មេងនាង សិទ្ធី នីកា បានវិលមកកាន់ការសម្តែងរបស់ខ្លួនវិញហើយ បន្ទាប់ពីនាងបានសម្ងំសម្រាកបានកូនប្រុសដ៏គួឲ្យស្រឡាញ់ម្នាក់ ក្រោយពីនាងបានភ្ជាប់ទំនាក់ទំនងស្នេហ៍ជាមួយបុរសដែលជាសែរាជវង្សមួយរូប អស់រយៈពេលប៉ុន្មានឆ្នាំមកនេះ។
តារារូបនេះនៅតែទទួលបានតំណែងតួឯកនៅក្នុងខ្សែភាពយន្តលើកដំបូង បន្ទាប់ពីសម្រាលកូន ដោយនាងបានចាប់ដៃគូសម្តែងជាមួយតួឯកប្រុសរូបសង្ហារ គឺលោក ខាត់ វ៉ៃហាំង ក្នុងរឿង «ពណ៌ជីវិត» ខណៈពេលខ្សែភាពយន្តភាគថ្មីនេះនឹងត្រូវចាក់ផ្សាយនាពេលឆាប់ៗខាងមុខនេះ។
តារាសម្តែងក្នុងបទ «មេឃកំពុងភ្លៀងហើយ» នាង សិទ្ធី នីកា បានអះអាងប្រាប់តាមសារអេឡិចត្រូនិចថា នេះជារឿងដែលនាងសម្តែងលើកដំបូង បន្ទាប់ពីបាត់មុខមួយរយៈ ហើយជាក៏ជារឿងភាគលើកដំបូងផងដែរ ដែលនាងបានសម្តែងរួមគ្នាជាមួយតួប្រុសលោក ខាត់ វ៉ៃហាំង។
នាងបញ្ជាក់ថា ខ្សែរឿងថ្មីនេះ គឺជាការឆ្លើយតបទៅកាន់ប្រិយមិត្តគាំទ្រ ដែលបានទន្ទឹងរង់ចាំការសម្តែងរបស់នាង និងលោក ខាត់ វ៉ៃហាំង បន្ទាប់ពីអ្នកទាំងពីរពុំដែលបានចាប់ដៃគូសម្តែងជាមួយគ្នាពីមុនមកនោះឡើយ បើទោះបីជាអ្នកទាំងពីរបានបង្ហាញវត្តមានសម្តែងជាបន្តបន្ទាប់ក្តី។
ដោយឡែកពាក់ព័ន្ធទៅនឹងការវិលមកការសម្តែងជាថ្មីឡើងវិញនាពេលនេះ ត្រូវបាននាង សិទ្ធី នីកា លើកឡើងថា នេះគឺជាការសម្រេចរបស់នាង ដោយមានការឯកភាពទាំងស្រុងពីស្វាមីរបស់នាងផងដែរ ទើបនាងបានចាប់ផ្តើមឱកាសទទួលយកការសម្តែងឡើងវិញនាពេលនេះ។
នាងថា ហើយការវិលត្រលប់ចូលសម្ដែងវិញ គឺមានការយល់ស្របពីគ្រួសារ គឺគាត់អត់បិទសិទ្ធិទេ ចំណែកមូលហេតុដែលចូលថតវិញ ពីព្រោះខ្ញុំស្រឡាញ់ការងារសិល្បៈ ហើយខ្ញុំទទួលថតគ្រប់ធម្មតា គ្រាន់តែកាងារខ្លះអត់បានទទួល ដោយសារខ្ញុំមិនមានពេលគ្រប់គ្រាន់។
ជាការកត់សម្គាល់ បន្ទាប់ពីបានភ្ជាប់ទំនាក់ទំនងស្នេហ៍ជាមួយបុរសដែលជាសែរាជវង្សមក សិទ្ធី នីកា បានផ្តាច់ការងារសិល្បៈមួយរយៈប្រមាណ២ឆ្នាំ ដោយសារតែនាងបានសម្ងំពពោះកូនដំបូងរបស់ខ្លួន ខណៈពេលដែលនាងបានទទួលការថ្នាក់ថ្នមយ៉ាងល្អពីស្វាមីរបស់នាង។ ការកសាងគ្រួសារជាមួយបុរសសែរាជវង្សនេះ ត្រូវបានទស្សនិកជជាច្រើនយល់ឃើញថា តារារូបនេះនឹងមិនអាចវិលមករកការសម្តែងជាថ្មីឡើងវិញនោះឡើយ ដោយសារតែនាងត្រូវមានភារកិច្ចមើលថែកូន និងគ្រួសារ ជាមួយនឹងការរស់នៅក្នុងជីវភាពយ៉ាងសុខដុម។
យ៉ាងណាអ្វីៗបានខុសពីការពិត ដោយសារតែពេលនេះ នាងបានបង្ហាញវត្តសម្តែងជាថ្មីឡើងវិញ បន្ទាប់ពីកូនរបស់នាងកាន់តែចម្រើនវ័យ ជាមួយនឹងការបើកភ្លើងខៀវពីគ្រួសារផងនោះ ទើបនាងមានឱកាសចូលប្រឡូកសិល្បៈនេះតាមក្តីបំណងរបស់ខ្លួន។
ទោះជាយ៉ាងណា តាមរយៈខ្សែភាពយន្តថ្មីដែល សិទ្ធី នីកា បានចូលរួមសម្តែងឡើងវិញនាពេលនេះ ត្រូវបានទស្សនិកជនរំពឹងថា នឹងទទួលបានការគាំទ្រច្រើនពីអ្នកទស្សនា ខណៈពេលដែលតារាសម្តែងកូនរូបនេះនៅតែមានរូបសម្រស់ស្រស់ស្អាត បូករួមជាមួយនឹងទេពកោលស្យសម្តែងដ៏សាកសមផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ