ខេត្តប៉ៃលិន ៖ បើតាមសេចក្តីរាយការណ៍បានឱ្យដឹងថា ក្មេងប្រុសអាយុ៣ឆ្នាំម្នាក់ ត្រូវដើមឈើរលំសង្កត់ចំក្បាលរងរបួសធ្ងន់ ខណៈពេលដែលអ្នកបើកគ្រឿងចក្រម្នាក់បានបើកអេស្កាវ៉ាទ័រទៅជីកកកាយដើមឈើចេញ លុះមិនបានប្រយ័ត្ន ក៏បណ្តាលឱ្យរលំសង្កត់ក្មេងប្រុសរងគ្រោះតែម្តង បង្កឱ្យមានការភ្ញាក់ផ្អើលកាលពីម៉ោង៨និង៣០នាទីព្រឹក ថ្ងៃទី១ ខែមិថុនា ឆ្នាំ២០២០ ស្ថិតនៅក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ។
សេចក្តីរាយការណ៍បន្តថា អ្នកបើកបរគ្រឿងចក្រខាងលើមានឈ្មោះ កុង សុខនី ភេទប្រុស អាយុ២២ឆ្នាំ មុខរបរបើកគ្រឿងចក្រធ្វើផ្លូវឱ្យក្រុមហ៊ុនឯកជន រស់នៅភូមិទួលម្កាក់ សង្កាត់លាប ក្រុងពោធិ៍សាត់ ខេត្តពោធិ៍សាត់ ។ ចំណែកក្មេងប្រុសរងគ្រោះឈ្មោះ វ៉ាន់ រ៉ាវីត អាយុ៣ឆ្នាំ រស់នៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ រងរបួសធ្ងន់ ។
បើតាមប្រភពពីកន្លែងកើតហេតុបានឱ្យដឹងថា មុនពេលកើតហេតុ បុរសអ្នកបើកបរគ្រឿងចក្រអេស្កាវ៉ាទ័រ បានបើកគ្រឿងចក្រទៅជីកកកាយដើមឈើចេញ ដោយសារតែខ្វះការប្រុងប្រយ័ត្ន ស្រាប់តែដើមឈើមួយដើមនោះរលំមកសង្កត់ចំក្បាលក្មេងប្រុសរងគ្រោះតែម្តង បណ្តាលឱ្យរងរបួសធ្ងន់ ។ ក្រោយពេលកើតហេតុ ក្មេងប្រុសរងគ្រោះត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ប៉ុន្តែដោយសាររបួសធ្ងន់ធ្ងរ ក៏ត្រូវគេបញ្ជូនបន្តទៅសង្គ្រោះនៅមន្ទីរពេទ្យខេត្តបាត់ដំបងតែម្តង ។
បច្ចុប្បន្ននេះក្មេងប្រុសរងគ្រោះ ត្រូវបានមេការក្រុមហ៊ុនបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង ចំណែកឯវត្ថុតាងត្រូវបានមេការក្រុមហ៊ុនយកទៅចតនៅទីស្នាក់ការប្រជាការពារភូមិអូរឈើក្រំ ដើម្បីរង់ចាំធ្វើការដោះស្រាយ ៕ (កែសម្រួលដោយ ៖ បុប្ផា)
ចែករំលែកព័តមាននេះ