ខេត្តប៉ៃលិន ៖ ប្រជាពលរដ្ឋស្ទើរគ្រប់គ្នាដែលរស់នៅក្នុងស្រុកសាលាក្រៅ ហើយប្រកបរបរធ្វើស្រែបានត្អូញត្អែរ និងស្រែកថ្ងូរប្រាប់ឱ្យដឹងថា ទិន្នផលកសិផលដំណាំស្រូវនាឆ្នាំ២០២០នេះ មានការធ្លាក់ចុះជាងមុនជិតពាក់កណ្តាល ខណៈខ្វះខាតទឺក ព្រោះរាំងស្ងួតអស់រយ:ពេលយូរមកហើយ ។ លុះដល់ពេលប្រមូលផលរួច ស្រាប់តែឈ្មួញទិញក្នុងតម្លៃថោកជាងឆ្នាំមុន បើគិតពីថ្លៃឈ្នួលកម្មករ និងថ្លៃថ្នាំបាញ់ស្មៅ ដាក់ជី គឺខាតចុង ខាតដើម មិនចំណេញនោះឡើយ ។
បើតាមសម្តីបុរសឈ្មោះ ប្រាក់ សារិន អាយុ៦៧ឆ្នាំ មានប្រពន្ធឈ្មោះ វ៉ាន សឿម អាយុ៥០ឆ្នាំ រស់នៅភូមិភ្នំកុយ ឃុំសាលាក្រៅ ស្រុកសាលាក្រៅ បានរៀបរាប់ឱ្យដឹងកាលពីម៉ោង៣និង៣០នាទីរសៀល ថ្ងៃទី២៨ ខែឧសភា ឆ្នាំ២០២០នេះឱ្យដឹងថា គ្រួសាររបស់គាត់បានជួលដីគេធ្វើស្រែប្រាំង ដែលបានរយៈពេល៣ទៅ៤ខែ ។ ហើយនៅដើមឆ្នាំនេះ មានការខ្សត់ទឹកខ្លាំង ដោយរាំងភ្លៀងរយ:ពេលយូរ បណ្តាលឱ្យទឹកប្រឡាយ និងទឹកស្ទឹង រីងខះស្ទើរអស់ អត់មានទឹកបូមដាក់ស្រែនោះឡើយ ។
គាត់បន្តទៀតថា កាលពីឆ្នាំមុនស្រែដែលគាត់ជួលគេធ្វើចំនួន២ហិកតានេះ ប្រមូលផលបានរហូតដល់ចំនួន៥ទៅ៦តោនឯណោះ ប៉ុន្តែរហូតមកដល់ពេលនេះ គាត់ជួលម៉ាស៊ីនច្រូតស្រូវយកទៅប្រមូលផលបានត្រឹមតែ២តោនប៉ុណ្ណោះ ដោយខាតអស់ជាងពាក់កណ្តាល ។ ចំណែលការជួលស្រែគេ២ហិកតាធ្វើនេះ គឺ១ហិកតា ត្រូវបង់ឱ្យស្រូវម្ចាស់ស្រែចំនួន៦បាវ និងថ្លៃម៉ាស៊ីនច្រូត១ហិកតា គេទារចំនួន២០ម៉ឺនរៀល ខណៈឆ្នាំមុនស្រូវ១តោន អាចលក់បាន៨០០០ទៅ១០០០០បាត(ប្រាក់ថៃ) ចំណែកនៅឆ្នាំនេះ ១តោនលក់បានត្រឹមតែជាង៦០០០បាតប៉ុណ្ណោះ។
គាត់បញ្ជាក់ថា ដូច្នេះរូបគាត់ក៏សំណូមពរឱ្យអាជ្ញាធរខេត្ត ក៏ដូចជាមន្ទីរកសិកម្ម និងរុក្ខាប្រមាញ់ជួយរកទីផ្សារជូនប្រជាកសិករផង ព្រោះបន្ទាប់ពីប្រមូលផលរួច បែរជាជំពាក់គេបន្តទៀត ។
ចំណែកឈ្មួញម្នាក់ឈ្មោះ រៀម ភេទស្រី អាយុ៥០ឆ្នាំ រស់នៅខេត្តបាត់ដំបង បានឱ្យដឹងថា គាត់ទិញស្រូវក្នុង១តោន តម្លៃ៧៨០០បាត (ប្រាក់ថៃ) ដោយពេលនេះគាត់ទិញបានជាង១០តោនហើយ ។ ចំណែកតម្លៃទីផ្សារស្រូវអត់ទៀងនោះទេ ជួនកាលឡើងថ្លៃ ជួនកាលចុះថោក ដោយនៅឆ្នាំនេះ ទីផ្សារស្រូវក៏ឡើងរហូតដល់១តោន ជាង៨០០០បាតដែរ ប៉ុន្តែរហូតមកដល់ឥឡូវទើបតែនឹងធ្លាក់ចុះថ្លៃ ។
គាត់បន្តទៀតថា គាត់ដឹកស្រូវទាំងនេះ យកទៅលក់បន្តនៅក្នុងខេត្តបាត់ដំបង ហើយគាត់ក៏មិនដឹងពីមូលហេតុនៃការធ្លាក់ចុះនេះដែរ ។ លើសពីនេះក្នុងនាមជាឈ្មួញកណ្តាល គាត់ក៏មិនដឹងធ្វើយ៉ាងម៉េចដែរ បើថៅកែប្រាប់ថា ធ្លាក់ថ្លៃ គាត់ក៏ទិញពីប្រជាពលរដ្ឋក្នុងតម្លៃថោកដែរ ។
ចំណែកកសិករម្នាក់ឈ្មោះ វណ្ណា ស៊ីម៉េង បានឱ្យដឹងដែរថា ការធ្វើស្រែឆ្នាំ២០២០នេះ ខណៈគាត់ធ្វើស្រែចំនួន២ហិកតា ប្រមូលផលបានត្រឹមតែជាង៣តោនប៉ុណ្ណោះ ដោយទិន្នផលធ្លាក់ចុះជាងឆ្នាំមុនជាងពាក់កណ្តាល ព្រោះអត់មានទឹកបូមដាក់ស្រែ ៕ (កែសម្រួលដោយ ៖ បុប្ផា)
ចែករំលែកព័តមាននេះ