ខេត្តបាត់ដំបង៖ បន្ទាប់ពីដាំក្បាលចុះយ៉ាងគំហុកកាលពីអំឡុងផ្ទុះជំងឺកូវីដ-១៩ ថ្មីរយៈពេល ៤ ខែដើមឆ្នាំនេះស្រាប់តែឈានចូលខែឧសភាតម្លៃគ្រាប់ឈូកទុំ ហាក់ស្ទុះ
ងើបឡើងវិញបន្តិចក្រោយពីជំងឺដ៏កាចសាហាវនេះមានសភាពធូរស្រាលនៅក្នុងប្រទេសកម្ពុជា។ នេះបើតាមការអះអាងរបស់កសិករដាំឈូកនៅក្នុង «អាងកំពីងពួយ» ដែលស្ដិតនៅភូមិតាង៉ែន ឃុំតាគ្រាម ស្រុកបាណន់។
កសិករឈ្មោះ សូន ស៊ត ភេទស្រីអាយុ៣៨ឆ្នាំ បានប្រាប់សារព័ត៌មានកោះសន្តិភាពឲ្យ
ដឹងថា តម្លៃគ្រាប់ឈូកបានធ្លាក់ដល់៣,០០០រៀល ឬ ៣,៥០០រៀល ក្នុង១គីឡូក្រាម កាលនារយៈពេលប៉ុន្មានខែដើមឆ្នាំ ២០២០ នេះគឺក្នុងអំឡុងពេលផ្ទុះជំងឺ «កូវីដ១៩ ថ្មី» ខ្លាំងពាសពេញពិភពលោក និងនៅកម្ពុជានោះ ។ ប៉ុន្តែពេលនេះ តំលៃគ្រាប់ឈូកហាក់ងើបឡើងវិញបន្តិចហើយស្របពេលដែលដំណាំឈូកក្នុងពេលនេះ កសិករកំពុងប្រមូលផល។
អ្នកស្រី សូន ស៊ត បានបញ្ជាក់ថា ពេលនេះតម្លៃគ្រាប់ឈូកបានខ្ពស់ជាងបន្តិចហើយ គឺគ្រាប់ឈូកទុំក្នុងមួយគីឡូក្រាមអាចលក់បានថ្លៃចន្លោះពី៤,៥០០រៀល ដល់ ៥,០០០រៀល។ ហើយគេរំពឹងថា តំលៃគ្រាប់ឈូកនេះ នឹងអាចឡើងថ្លៃជាងនេះរហូតដល់ជិត១ម៉ឺនរៀលក្នុង១គីឡូក្រាម នៅក្នុងខែ៧ ឬខែ៨ខាងមុខនេះ។
ដោយឡែកឈ្មូញកណ្ដាលដែលធ្លាប់ទទួលទិញគ្រាប់ឈូកជារៀងរាល់ឆ្នាំ ក៏បាន
បង្ហាញពីការរំពឹងទុកដូចការលើកឡើងរបស់កសិករដែរ។ ឈ្មូញកណ្ដាលរូបនេះបាននិយាយថា បច្ចុប្បន្នកសិករបានចាប់ផ្ដើមប្រមូលផលឈូកជាបណ្ដើរៗហើយ ហើយតម្លៃគ្រាប់ឈូកក៏ល្អជាងប៉ុន្មានខែមុនដែរ។ នៅក្នុងអំឡុងនៃការផ្ទុះជំងឺកូវីដ១៩ថ្មី ។ ទីផ្សារគ្រាប់ឈូកហាក់ដាំក្បាលចុះយ៉ាងខ្លាំង តែពេលនេះងើបឡើងវិញជាបន្តបន្ទាប់។
សូមបញ្ជាក់ថា ជារៀងរាល់ឆ្នាំ ប្រជាកសិករបាននាំគ្នាដាំដំណាំឈូករាប់រាយហិចតា នៅក្នុង « អាងកំពីងពួយ » ដែលជាតំបន់ទេសចរណ៏ដ៏ល្បីល្បាញ នៅក្នុងស្រុកបាណន់ ខេត្ត បាត់ដំបង។ ក្រៅពីធ្វើស្រែចំការ ប្រជាពលរដ្ឋមួយចំនួន ដែលរស់នៅតំបន់នោះបាននាំគ្នាដាំឈូក ដើម្បីយកផ្លៃខ្ចី ឬ ចាស់លក់ ដើម្បីរកប្រាក់ចំណូលក្នុងគ្រួសារ។
ចំណែកកសិករខ្លះបានជួលដីគេដើម្បីដាំឈូក រីឯខ្លះទៀតបានដាំដុះលើដីខ្លួនឯង នៅក្នុងអាងទឹកដ៏ធំសម្បើមនេះ ។
ពាក់ព័ន្ធនឹងការដាំដំណាំឈូកនេះ ទិន្និផលដែលប្រមូល
បានវិញបើតាមការអះអាងរបស់កសិករថាឆ្នាំនេះដំណាំឈូកដែលកសិករបានដាំស្ទើរគ្រប់ៗគ្នាហាក់ទទូលបានទិន្និផលល្អគួរសម បើប្រៀបធៀបទៅនឹងឆ្នាំមុនៗ។ កសិករបានបញ្ជាក់ថា ដំណាំឈូកដាំលើផ្ទៃដីទំហំ២ហិចតា អាចប្រមូលបានគ្រាប់ប្រហែលជិត១តោន ហើយកសិករអាចទទូលបានប្រាក់ចំណេញច្រើន ព្រោះដាំណាំឈូកមិនសូវចំណាយទុនច្រើន ដូចដាំំណាំកសិកម្មផ្សេងៗទេ ។
សូមបញ្ជាក់ថា ឈូកគឺជាដំណាំផ្តល់សារប្រយោជន៍ជាច្រើនតាំងពីមើម ស្លឹក ផ្កា ផ្លែខ្ចីនិងថ្លែទុំ ជាក់ស្តែង ផ្ការបស់វាត្រូវបានគេយកទៅថ្វាយព្រះ ខណៈស្លឹកទុកសម្រាប់ខ្ចប់បន្លែ សាច់ ។ បន្ថែមពីលើនេះក្រអៅឈូកអាចយកចម្អិនជាម្ហូបដ៏មានឱជារសបានច្រើនប្រភេទ ទាំងស្ងោរ ឆា ឬស្លរបានច្រើនប្រភេទ ។ ចំណែកផ្លែឈូកខ្ចីគឺជាចំណីញ៉ាំលេងយ៉ាងផ្អែមឆ្ងាញ់ជក់មាត់ ហើយ ផ្លែឈូកទុំវិគ ដែលហាលស្ងួតកំពុងមានទីផ្សារសម្រាប់ធ្វើបង្អែម ឬគ្រលីងឈូកគ្រប់រសជាតិ ៕
ចែករំលែកព័តមាននេះ