រាជធានីភ្នំពេញ ៖ កម្មការិនីរោងចក្រកាត់ដេរ ដែលប្ដីមានមុខរបរជាអ្នកលក់នំបុ័ងនិងមានកូនចំនួន៤នាក់ទៅហើយនៅតែមិនស្កប់ ថែមទាំងបានផិតក្បត់ទៅស្រឡាញ់ប្រុសក្មេងម្នាក់ជាកម្មកររោងចក្រកាត់ដេរជាមួយគ្នាទៀត ។ មិនតែប៉ុណ្ណោះបានដឹកដៃគ្នាចូលក្រេបទឹកឃ្មុំនៅក្នុងផ្ទះសំណាក់យ៉ាងត្រេកត្រអាលជាញឹកញាប់ ខណៈដែលប្ដីចេញទៅលក់នំប៉័ង
រាជធានីភ្នំពេញ ៖ កម្មការិនីរោងចក្រកាត់ដេរ ដែលប្ដីមានមុខរបរជាអ្នកលក់នំបុ័ងនិងមានកូនចំនួន៤នាក់ទៅហើយនៅតែមិនស្កប់ ថែមទាំងបានផិតក្បត់ទៅស្រឡាញ់ប្រុសក្មេងម្នាក់ជាកម្មកររោងចក្រកាត់ដេរជាមួយគ្នាទៀត ។ មិនតែប៉ុណ្ណោះបានដឹកដៃគ្នាចូលក្រេបទឹកឃ្មុំនៅក្នុងផ្ទះសំណាក់យ៉ាងត្រេកត្រអាលជាញឹកញាប់ ខណៈដែលប្ដីចេញទៅលក់នំប័ុង មិនបានដឹងនោះឡើយ ហើយលើកចុងក្រោយនេះពួកគេបានណាត់ជួបគ្នានៅក្នុងផ្ទះតែម្ដង តែត្រូវបុរសជាប្ដីទៅទាន់ ក៏ប្ដឹងប៉ូលិសឲ្យឃាត់ខ្លួនបានទាំង២នាក់នាំយកទៅសាកសួរ និងកសាងសំណុំរឿងចាត់ការតាមផ្លូវច្បាប់ ។
រឿងរ៉ាវនេះបង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីយប់ ថ្ងៃទី២ វិច្ឆិកា នៅផ្ទះជួលបន្ទប់លេខ១០៤ ស្ថិតក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ ។ ស្ត្រីដែលត្រូវបានប៉ូលិសឃាត់ខ្លួនតាមបណ្ដឹងផ្ទាល់មាត់របស់បុរសជាប្ដីនោះឈ្មោះ ប៉ែត ចាន់ណា ហៅ ស្រីហឿង អាយុ៣៣ឆ្នាំ រីឯបុរសជាប្ដីឈ្មោះ ផៃ ភាន់ អាយុ៣៦ឆ្នាំ មានកូនចំនួន៤នាក់នៅក្នុងបន្ទុក ។ ដោយឡែកយុវជនដែលជាប់ចោទថាជាប្រុសសហាយនោះឈ្មោះ សៀង រ៉ូត អាយុ២៤ឆ្នាំ ស្នាក់នៅផ្ទះជួលក្នុងភូមិ ត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សនជ័យ ត្រូវប៉ូលិសឃាត់ខ្លួនខណៈពេលកំពុងរត់ទៅពួននៅក្នុងបន្ទប់ទឹក ។
មន្ត្រីប៉ូលិសប៉ុស្ដិ៍ចោមចៅ បានឲ្យដឹងថា យុវជនជាប់ចោទជាកម្មកររោងចក្រកាត់ដេរជាមួយនឹងស្ត្រីម្នាក់នោះដែរ ហើយអ្នកទាំងពីរមានទំនាក់ទំនងស្នេហាជាមួយគ្នារយៈពេលជាង៥ខែមកហើយ ។ មិនតែប៉ុណ្ណោះបានដឹកដៃគ្នាចូលផ្ទះសំណាក់រួមមេត្រីជាញឹកញាប់ ចំណែកបុរសជាប្ដីមិនបានដឹងរឿងនោះឡើយ ព្រោះជាប់រវល់ចេញទៅលក់នំប័ុងបាត់ៗមិនសូវបាននៅផ្ទះ ហើយមានពេលខ្លះបានទៅរកស៊ីនៅឯប្រទេសថៃថែមទៀតផង ។
ប្រភពដដែលបានបន្តថា ដោយឡែកនៅយប់កើតហេតុ អ្នកទាំងពីរនោះមិនបានទៅក្រេបទឹកឃ្មុំនៅផ្ទះសំណាក់ដូចពេលមុនៗនោះទេគឺបានណាត់ជួបគ្នានៅបន្ទប់ផ្ទះជួលរបស់ស្ត្រីនោះតែម្ដង ។ ខណៈពេលដែលកំពុងបើកប្រតិបត្តិការ ឡើងឋានសួគ៌យ៉ាងផ្អែមល្ហែមនោះ ស្រាប់តែប្ដីមកដល់បានស្រែកឲ្យប្រពន្ធបើកទ្វារ ដោយមិនបានដឹងថា ប្រពន្ធកំពុងដេកជាមួយប្រុសក្មេងនោះឡើយ ប៉ុន្តែខណៈនោះប្រពន្ធមិនព្រមបើកទ្វារឲ្យ ទើបកើតការសង្ស័យនិងប្ដឹងប៉ូលិសឲ្យជួយអន្តរាគមន៍ភ្លាមៗតែម្ដង ។ មន្ត្រីរូបនោះបន្តទៀតថា ពេលប៉ូលិសទៅដល់បានគាស់ទ្វារបន្ទប់រួចចូលទៅមើល ក៏ឃើញចោរលួចបេះដូងកំពុងពួននៅបន្ទប់ទឹកហើយក៏បានឃាត់ខ្លួនមកសាកសួរ ទើបបែកធ្លាយរឿងសហាយស្មន់របស់ពួកគេ ។ បន្ទាប់មកសមត្ថកិច្ចបាននាំទាំងស្ត្រី និងជនសង្ស័យទៅកាន់ប៉ុស្ដិ៍រដ្ឋបាលដើម្បីសាកសួរបន្តមួយជំហានរួច ទើបបញ្ជូនទៅកាន់ផ្នែកព្រហ្មទណ្ឌខណ្ឌពោធិ៍សែនជ័យ ដើម្បីចាត់ការបន្តទៀត ។ នេះជារឿងអាស្រូវកេរ្តិ៍មួយដែលកម្រកើតមានលើស្ត្រីខ្មែរណាស់ ។ ការផិតក្បត់បែបនេះវាបានកើតចេញពីការភ្លើតភ្លើនតណ្ហា ៕
ចែករំលែកព័តមាននេះ