រាជធានីភ្នំពេញ ៖ អគ្គស្នងការដ្ឋាននគរបាលជាតិ បានរៀបចំកិច្ចប្រជុំជាមួយ ក្រសួងប្រៃសណីយ៍ និងទូរគមនាគមន៍ ស្ដីពីការបង្កើតក្រុមការងារប្រព័ន្ធ Hotline ដើម្បីឆ្លើយតបព័ត៌មានពីប្រជាពលរដ្ឋ ពាក់ព័ន្ធនិងការរឹតបន្តឹងច្បាប់ចរាចរណ៍ផ្លូវគោក ។
កិច្ចប្រជុំនេះធ្វើឡើងនាព្រឹកថ្ងៃទី៥ ខែឧសភា ឆ្នាំ២០២០ នៅអគ្គស្នងការដ្ឋាននគរបាលជាតិ ក្រោមអធិបតីភាព ឯកឧត្តម នាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ និងឯកឧត្តម ម៉ូវ ចរិយា ប្រធាននិយ័តករទូរគមនាគមន៍កម្ពុជា ដោយមានការចូលរួមពី អនុប្រធានសេនាធិការ អនុប្រធាននាយកដ្ឋាន មន្ត្រីជំនាញក្រសួងប្រៃសណីយ៍ តំណាងក្រុមហ៊ុនទូរស័ព្ទចល័តទាំងអស់ និងមន្ត្រីពាក់ព័ន្ធជាច្រើនរូបទៀតផងដែរ ។
ការបង្កើតក្រុមការងារចាំទទួលការហៅចូល តាមរយៈប្រព័ន្ធព័ត៌មានទាន់ហេតុការណ៍(117)នេះ ធ្វើឡើងក្នុងគោលបំណងឆ្លើយតបព័ត៌មានពីប្រជាពលរដ្ឋ មកមន្ត្រីជំនាញចរាចរណ៍ ពាក់ព័ន្ធនិងការរឹតបន្តឹងការអនុវត្តន៍ច្បាប់ចរាចរណ៍ផ្លូវគោក ។
ក្រុមការងារ Hotline មានភារកិច្ចតាមដាន ឆ្លើយតប សំនួររបស់ប្រជាពលរដ្ឋ ពាក់ព័ន្ធទៅនឹងកិច្ចប្រតិបត្តិការ ក្នុងដំណើរការអនុវត្តការរឹតបន្តឹងច្បាប់ចរាចរណ៍ផ្លូវគោក ដើម្បីឆ្លើយតបដោះស្រាយបំភ្លឺបានទាន់ពេល ៕
ចែករំលែកព័តមាននេះ