ខេត្តកំពង់ឆ្នាំង ៖ ក្រោយពីមានសំណូមពរពីប្រជាពលរដ្ឋក៏ដូចជាអាជ្ញាធរមូលដ្ឋានស្តីពីការស្នើសុំអន្តរាគមន៍រឿងជនខិលខូចបានឈូសឆាយក្នុងបឹងផ្លូវទូក ស្ថិតក្នុងភូមិកោះតាម៉ូវ ឃុំកំពង់ព្រះគគីរ ស្រុកបរិបូរណ៌ ដើម្បីរំលោភយកធ្វើស្រែប្រាំងធ្វើឱ្យប៉ះពាល់ មិនអាចអាស្រ័យផលបានដូចជា ដាក់មង ចងសន្ទូច…
ខេត្តកំពង់ឆ្នាំង ៖ ក្រោយពីមានសំណូមពរពីប្រជាពលរដ្ឋក៏ដូចជាអាជ្ញាធរមូលដ្ឋានស្តីពីការស្នើសុំអន្តរាគមន៍រឿងជនខិលខូចបានឈូសឆាយក្នុងបឹងផ្លូវទូក ស្ថិតក្នុងភូមិកោះតាម៉ូវ ឃុំកំពង់ព្រះគគីរ ស្រុកបរិបូរណ៌ ដើម្បីរំលោភយកធ្វើស្រែប្រាំងធ្វើឱ្យប៉ះពាល់ មិនអាចអាស្រ័យផលបានដូចជា ដាក់មង ចងសន្ទូច និងទុកទឹកអោយគោក្របីផឹកផងនោះ នៅព្រឹកថ្ងៃទី៤ ខែឧសភា ឆ្នាំ២០២០នេះ សមត្ថកិច្ចចម្រុះដឹកនាំដោយមន្ត្រីជលផលបានយកត្រាក់ទ័រទៅឈូសរំលាយភ្លឺដែលជនខិលខូចបានលើកជាធ្វើស្រែប្រាំង ហើយបានបោះបង្គោល ដកហូតបឹងនោះមកវិញហើយ ។
តាមការបញ្ជាក់របស់ប្រជាពលរដ្ឋរស់នៅភូមិកោះតាម៉ូវ បានឱ្យដឹងថា តាំងពីដូនពីតាមកនៅចំណុចបឹងផ្លូវទូកនេះ ឆ្នាំមុនៗមិនដែលរីងស្ងួតបែបនេះឡើយ ។ បឹងនេះនៅរដូវវស្សាជាកន្លែងរកត្រីដាក់មង ចងសន្ទូច នៅរដូវប្រាំងគឺទុកទឹកអោយគោក្របីផឹក ប៉ុន្តែក្នុងពេលថ្មីៗនេះមានជនខិលខូចលួចឈូសឆាយពង្រាបធ្វើជាដីស្រែប្រាំងអស់ប្រមាណជាង១០ហិកតាទៅហើយ ។ ពួកគាត់ជាប្រជាពលរដ្ឋសំណូមពរដល់មន្ត្រីជំនាញជួយទប់ស្កាត់ក្នុងករណីរំលោភយកដីបឹងនេះធ្វើកម្មសិទ្ឋពីសំណាក់ជនខិលខូចផង។
លោក គង់ គឹមហាក់ មេឃុំកំពង់ព្រះគគីរ បានបញ្ជាក់អោយដឹងថា បឹងមួយនេះមានបណ្តោយជាង២គីឡូម៉ែត្រ ហើយមកដល់ពេលនេះត្រូវជនខិលខូចលួចឈូសលប់បឹងធ្វើជាស្រែអស់ជាច្រើហិកតាទៅហើយ ។ កន្លងមកលោកក៏ធ្លាប់បានចុះមកហាមឃាត់និងទប់ស្កាត់មិនអោយអ្នកដាំឈូកទាំងនេះឈូសដី លប់បឹងនេះដែរ តែពេលលោកត្រឡប់ទៅវិញគឺគេលួចឈូសដដែល ។ លោកក៏ស្នើសុំដល់មន្ត្រីជំនាញជួយមានវិធានការទប់ស្កាត់ផង ។
លោក ងិន ហ៊ុន ប្រធានមន្តីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំងបានបញ្ជាក់ថា ក្រោយពីទទួលព័ត៌មានស្តីពីការទន្ទ្រានយកដីបឹងផ្លូវទូក កាលពីព្រឹកថ្ងៃទី៤ ខែឧសភា នេះមន្ត្រីជលផលបានដឹកនាំសមត្ថកិច្ចចម្រុះចុះទៅដកហូតដីនោះមកវិញហើយ គឺប្រើគ្រឿងចក្រឈូសលុបភ្លឺព័ទ្ឋធ្វើស្រែប្រាំង និងបោះបង្គោលព្រំសំគាល់ដីបឹង ។ ហើយក្នុងពេលខាងមុខនេះ មន្ត្រីជំនាញរបស់លោកនឹងចុះអប់រំដល់ប្រជាពលរដ្ឋបញ្ឈប់ការរុករានទន្ទ្រានយកដីបឹងនេះបន្តទៀត ។
សូមបញ្ជាក់ថា នៅកំពង់ព្រះគគីមានសហគមន៍នេសាទ ជាអ្នកមើលថែដីព្រៃលិចទឹក ដីបឹង និងទប់ស្កាត់បទលើ្មសនេសាទ ប៉ុន្តែកន្លងមក បទល្មើសនេសាទចេះតែកើតមានជាហូរហែរ សមត្ថកិច្ចជំនាញបានត្រឹមទៅដកហូតដីព្រៃមកវិញតែប៉ុណ្ណោះ៕ (កែសម្រួលដោយ ៖ ធីតា)
ចែករំលែកព័តមាននេះ