ខេត្តកណ្ដាល ៖ នគរបាលប៉ុស្តិ៍ទួលព្រេជបានចាប់ឃាត់ខ្លួនបុរសម្នាក់នាំយកទៅសាកសួរ និងកសាងសំណុំរឿងចាត់ការតាមច្បាប់ ក្រោយពេលដែលបុរសនោះស្រវឹងស្រា ហើយសុំលុយបងស្រីបង្កើតរបស់ខ្លួនចាយអត់បាន ក៏បង្ខំឲ្យបងស្រីលក់ដីកេរឪពុកម្ដាយ និងផ្ទះដែលកំពុងស្នាក់នៅសព្វថ្ងៃ ដើម្បីយកលុយចាយ ។…
ខេត្តកណ្ដាល ៖ នគរបាលប៉ុស្តិ៍ទួលព្រេជបានចាប់ឃាត់ខ្លួនបុរសម្នាក់នាំយកទៅសាកសួរ និងកសាងសំណុំរឿងចាត់ការតាមច្បាប់ ក្រោយពេលដែលបុរសនោះស្រវឹងស្រា ហើយសុំលុយបងស្រីបង្កើតរបស់ខ្លួនចាយអត់បាន ក៏បង្ខំឲ្យបងស្រីលក់ដីកេរឪពុកម្ដាយ និងផ្ទះដែលកំពុងស្នាក់នៅសព្វថ្ងៃ ដើម្បីយកលុយចាយ ។ ប៉ុន្តែខណៈនោះ បងស្រីមិនព្រមលក់តាមធ្វើឲ្យជននោះខឹងយ៉ាងខ្លាំង បានចាប់អង្រួនទ្វារផ្ទះបណ្ដាលឲ្យបែកកញ្ចក់អស់១ផ្ទាំង រួចអូសម៉ូតូធុនធំ១គ្រឿងទៅដុតចោលក្បែរគំនរចំបើង បណ្ដាលឲ្យឆេះរងការខូចខាតទាំងស្រុងប្រើការលែងកើត។
ហេតុការណ៍នេះ កើតឡើងកាលពីវេលាម៉ោងប្រមាណ៩និង៥៥នាទីព្រឹកថ្ងៃទី២៧ ខែ
មេសា នៅភូមិបឹងរមាស ឃុំទួលព្រេជ ស្រុកអង្គស្នួល ។ បុរសខាងលើឈ្មោះ សួស គង្គា អា
យុ២៨ឆ្នាំ មុខរបរមិនពិតប្រាកដ ចំណែកស្ត្រីជាបងឈ្មោះ សួស សំអាត អាយុ៣៥ឆ្នាំ ជាកសិករ ហើយទាំង២នាក់បងប្អូននេះ រស់នៅក្នុងភូមិខាងលើជាមួយគ្នា ។
តាមប្រភពព័ត៌មានបានឲ្យដឹងថា នៅមុនពេលកើតហេតុ បុរសរូបនេះបានផឹកស្រារហូតស្រវឹង ហើយសុំលុយបងស្រីចាយ ។ ខណៈនោះបងស្រីប្រាប់ថា គាត់គ្មានលុយឲ្យទេ ទើបជននេះរករឿងបង្ខំឲ្យបងស្រីលក់ដីនិងលក់ផ្ទះយកលុយឲ្យខ្លួនចាយទៀត ។ ប៉ុន្តែពេលនោះបងស្រីប្រកែកមិនព្រមលក់ទេ ដោយគាត់និយាយថា បើលក់ដីនិងផ្ទះយកលុយចាយបែបនេះ តើទៅរស់នៅកន្លែងណា បានទីជម្រកអ្វីរស់នៅទៀតទៅ ។
ដោយបងស្រីមិនព្រមឯកភាពលក់ដីនិងផ្ទះបែបនេះ ធ្វើឲ្យជននេះខឹងដាច់ក្បាលដាច់កន្ទុយ រួចចាប់អង្រួនទ្វារផ្ទះបណ្ដាលឲ្យបែកកញ្ចក់អស់១ផ្ទាំង ។ បន្ទាប់មកទៀត បានអូសម៉ូតូ១គ្រឿងម៉ាកហុងដាXR-២៣០ទៅក្បែរគំនរចំបើង រួចដុតចោលបង្កឲ្យឆេះរងការខូចខាតទាំងស្រុងតែម្ដង ។
ប្រភពដដែលបន្តទៀតថា ពេលនោះបង្កឲ្យមានការភ្ញាក់ផ្អើលយ៉ាងខ្លាំង ហើយអ្នកជិតខាងបាននាំគ្នាទៅជួយពន្លត់ ព្រោះខ្លាចភ្លើងឆេះរាលដល់គំនរចំបើង និងផ្ទះដែលស្ថិតនៅក្បែរនោះ ។
ក្រោយមក នគរបាលប៉ុស្តិ៍ទួលព្រេជ បានទៅអន្តរាគមន៍ឃាត់ខ្លួនជននោះនាំមកសាកសួរមួយ
ជំហាន រួចទើបបញ្ជូនទៅកាន់អធិការដ្ឋាននគរបាលស្រុកអង្គស្នួល ដើម្បីសាកសួរនិងកសាងសំណុំរឿងបញ្ជូនបន្តទៅសាលាដំបូងខេត្ត ចាត់ការតាមច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ