ការផ្ទុះវីរុសកូវីដ ១៩ ជុំវិញពិភពលោកប្រហែលជាហេតុការណ៍ថ្មីមួយសម្រាប់សហគ្រិន និងម្ចាស់អាជីវកម្មភាគច្រើនជុំវិញពិភពលោក ។ ទោះជាមានបទពិសោធន៍យ៉ាងណាក៏មានអាជីវកម្មជាច្រើនជួបនូវការលំបាកក្នុងការទប់ទល់នឹងវីរុសនេះណាស់ ចុះទម្រាំតែអាជីវករថ្មីៗទៀត?
ជាក់ស្តែង កូវីដ ១៩ ប្រៀបបានជាការសាកល្បងសម្រាប់ស្ថាប័នជាច្រើន ហើយវាជាការសាកល្បងសម្រាប់អាជីវករផងដែរ ។ ទោះជាវាជាអ្វីដែលអាជីវករមិនអាចគ្រប់គ្រងពិតមែនក្តី នៅតែមានសកម្មភាពមួយចំនួនដែលអាជីវករត្រូវធ្វើដើម្បីកាត់បន្ថយការខាតបង់ធ្ងន់ធ្ងរ ។
១. កុំបោះបង់
វាជារឿងទូទៅទេប្រសិនបើអ្នកជួបនឹងអារម្មណ៍ចង់បោះបង់ក្នុងពេលដែលស្ថានការជុំវិញខ្លួនកាន់តែងងឹតទៅៗ ។ ប៉ុន្តែអ្នកមិនគួរអនុញ្ញាតឲ្យវារារាំងអ្នកទេ ហើយអ្នកក៏មិនគួររងចាំនិងមិនធ្វើអ្វីសោះរហូតដល់បញ្ហាបាត់ទៅដោយខ្លួនឯងដែរ ។ផ្ទុយមកវិញ អាជីវករគួរតែបន្តខិតខំប្រឹងប្រែងជ្រើសរើសផ្លូវដើរដែលត្រឹមត្រូវ ។ វិធីងាយមួយគឺសាកល្បងគិតពីស្ថានការខុសៗគ្នាសម្រាប់ថ្ងៃអនាគត រួចរកកត្តាអ្វីដែលធ្វើឲ្យអ្នកជោគជ័យក្នុងគ្រប់ស្ថានការ ។
២. វិនិយោគលើអនាគតវែងឆ្ងាយ
វាប្រហែលជាពេលល្អក្នុងការវិនិយោគលើអាជីវកម្ម បុគ្គលិក ឬលើខ្លួនអ្នកផ្ទាល់ ។ អ្នកអាចចាប់ផ្តើមគិតពីការផ្លាស់ប្តូរក្នុងអាជីវកម្មរបស់អ្នកដែលមានសារៈសំខាន់សម្រាប់ថ្ងៃអនាគតដូចជាសេវាកុម្ម៉ង់ និងដឹកជញ្ជូនអនឡាញជាដើម ។
៣. ជ្រើសរើសប្រភពព័ត៌មានដោយប្រុងប្រយ័ត្ន
សារព័ត៌មាន និងប្រព័ន្ធសង្គមនឹងនាំយកព័ត៌មាន និងទិន្នន័យជាច្រើនដល់អ្នក ព្រមទាំងប្រាប់ពីការព្យាករណ៍ទៅថ្ងៃអនាគតដែលអាចបង្កឲ្យអ្នកព្រួយបារម្ភច្រើនជាដើម ។ តែមិនមែនគ្រប់ព័ត៌មានគឺសំខាន់សម្រាប់អ្នកទេ ។ ផ្ទុយមកវិញ អ្នកគួរតែស្តាប់អ្នកជំនាញផ្នែកសុខភាពឲ្យបានច្បាស់លាស់វិញមុនធ្វើការសម្រេចចិត្តធ្វើអ្វីមួយ ។
៤. រក្សាទំនាក់ទំនងជាមួយអ្នកដទៃ
ឱកាសត្រូវបានផ្តល់ឲ្យមនុស្សពេលដែលពួកគេខិតខំប្រឹងប្រែង មានការតស៊ូ និងមោះមត់ តែពេលខ្លះឱកាសត្រូវបានផ្តល់ឲ្យពេលដែលអ្នកស្គាល់មនុស្សច្រើនផងដែរ ។ ទោះជាពេលនេះជាពេលដែលមនុស្សជាច្រើនជួបនឹងបញ្ហាពិតមែនក្តី វាអាចជាឱកាសក្នុងការសួរសុខទុក្ខ និងពង្រឹងទំនាក់ទំនងដែលអ្នកមានជាមួយមនុស្សដែលអាចជួយដល់អ្នកនៅថ្ងៃអនាគត ៕
ចែករំលែកព័តមាននេះ